എസ്എസ്എൽസി പരീക്ഷ ഇന്ന് അവസാനിക്കും
Wednesday, March 29, 2023 12:42 AM IST
തിരുവനന്തപുരം: സംസ്ഥാനത്തെ എസ്എസ്എൽസി പരീക്ഷ ഇന്ന് പൂർത്തിയാകും. ഒന്നും രണ്ടും വർഷ ഹയർസെക്കൻഡറി, വൊക്കേഷണൽ ഹയർസെക്കൻഡറി പരീക്ഷകൾ നാളെ അവസാനിക്കും. ഒന്നു മുതൽ ഒൻപതു വരെയുളള ക്ലാസുകളിലെ പരീക്ഷകളും നാളെ പൂർത്തിയാകും. മധ്യവേനൽ അവധിക്കായി 31നു സ്കൂളുകൾ അടയ്ക്കും.
ഏപ്രിൽ മൂന്നിന് എസ്എസ്എൽസി ഉത്തരക്കടലാസ് മൂല്യനിർണയം ആരംഭിക്കും. സംസ്ഥാനത്തെ 70 മൂല്യനിർണയക്യാന്പുകളിലായി 18000 അധ്യാപകരാണു മൂല്യനിർണയം നടത്തുന്നത്.
നിലവിൽ പ്രഖ്യാപിച്ചത് അനുസരിച്ച് മേയ് പകുതിയോടെ എസ്എസ്എൽസി ഫലപ്രഖ്യാപനം ഉണ്ടാവും. 4.19 ലക്ഷം വിദ്യാർഥികളാണ് എസ്എസ്എൽസി പരീക്ഷ എഴുതിയത്. 4.42 ലക്ഷം വിദ്യാർഥികളാണ് രണ്ടാം വർഷ ഹയർസെക്കൻഡറി പരീക്ഷ എഴുതുന്നത്.
80 ക്യാന്പുകളിലായി ഏപ്രിൽ മൂന്നു മുതൽ ഹയർസെക്കൻഡറി മൂല്യനിർണയവും ആരംഭിക്കും. 25000 ത്തോളം അധ്യാപകർ മൂല്യനിർണയത്തിൽ പങ്കെടുക്കും.