പാലാ: ഒക്ടോബര്‍ രണ്ട് ഞായറാഴ്ച സ്‌കൂളുകളില്‍ ലഹരി വിമുക്തബോധവത്കരണം നടത്താനുള്ള തീരുമാനം പിന്‍വലിച്ചു മറ്റൊരു ദിവസത്തേക്കു മാറ്റി നടത്തണമെന്ന് സീറോ മലബാര്‍ മെത്രാന്‍ സമിതിയുടെ സിനഡല്‍ എഡ്യൂക്കേഷന്‍ കമ്മിറ്റി സര്‍ക്കാരിനോട് അഭ്യര്‍ഥിച്ചു.
ഞായറാഴ്ചകള്‍ ക്രൈസ്തവര്‍ പവിത്രമായി മതകര്‍മ്മങ്ങള്‍ ആചരിക്കുന്ന ദിവസമാണെന്നും ആ ദിവസം തന്നെ സ്‌കൂള്‍ തുറന്ന് ലഹരിബോധവല്‍ക്കരണം നടത്തണമെന്ന് നിര്‍ദേശിക്കുന്നത് ക്രൈസ്തവരോടുള്ള വെല്ലുവിളിയാണെന്നും ഞായറാഴ്ച ആചരണത്തിനുള്ള മതപരമായ അവകാശം ഹനിക്കുന്നതായും സമിതി വിലയിരുത്തി.
സിനഡല്‍ കമ്മിറ്റി ഫോര്‍ എഡ്യൂക്കേഷന്‍ അംഗങ്ങളായ ആര്‍ച്ച് ബിഷപ് മാര്‍ ജോസഫ് പാംപ്ലാനി, ബിഷപ് തോമസ് തറയില്‍, സെക്രട്ടറി ഫാ. ബെര്‍ക്കുമാന്‍സ് കുന്നുംപുറം എന്നിവര്‍ പങ്കെടുത്തു.
കെസിഎസ്എൽ
കൊച്ചി: ഒക്ടോബർ രണ്ട് ഞായറാഴ്ച സ്‌കൂളുകള്‍ക്ക് പ്രവൃത്തിദിനമാക്കുന്നതിനെതിരേ കേരള കത്തോലിക്കാ വിദ്യാര്‍ഥി സഖ്യം (കെസിഎസ്എല്‍) സംസ്ഥാന സമിതി. വിശുദ്ധ കുര്‍ബാനയിലും വിശ്വാസപരിശീലനക്ലാസുകളിലും പങ്കെടുക്കേണ്ട കുട്ടികളും അധ്യാപകരും രക്ഷിതാക്കളും അന്നേദിവസം സ്‌കൂളുകളില്‍ ബോധവത്കരണക്ലാസുകള്‍ ഉള്‍പ്പെടെയുള്ള വിവിധ പരിപാടികളില്‍ പങ്കെടുക്കണമെന്ന നിര്‍ദേശം ന്യായീകരണമില്ലാത്തതാണ്.
പ്രസിഡന്‍റ് ബേബി തദേവൂസ് ക്രൂസിന്‍റെ അധ്യക്ഷതയില്‍ ചേര്‍ന്ന പ്രതിഷേധയോഗത്തില്‍ സംസ്ഥാന ഡയറക്ടര്‍ ഫാ. കുര്യന്‍ തടത്തില്‍, ജനറല്‍ ഓര്‍ഗനൈസര്‍ മനോജ് ചാക്കോ, ബോബി ജോണ്‍, കെ.എസ്. അശ്വിന്‍ ആന്‍റോ, അലിറ്റാ മനോജ് എന്നിവര്‍ പ്രസംഗിച്ചു.
ചെറുപുഷ്പ മിഷൻ ലീഗ്
പാലാരിവട്ടം(കൊച്ചി): അടുത്ത ഞായറാഴ്ച പ്രവൃത്തിദിനമാക്കാനുള്ള സംസ്ഥാന സർക്കാരിന്‍റെ തീരുമാനം അപലപനീയവും പ്രതിഷേധാർഹവുമാണെന്ന് ചെറുപുഷ്പ മിഷൻലീഗ് സംസ്ഥാന സമിതി. ക്രൈസ്തവർക്കെതിരേ മാത്രം നിരന്തരമായി നടത്തുന്ന സംസ്ഥാനസർക്കാരിന്‍റെ ഈ വെല്ലുവിളി അവസാനിപ്പിക്കണമെന്നു യോഗം ആവശ്യപ്പെട്ടു.
യോഗത്തിൽ സംസ്ഥാന പ്രസിഡന്‍റ് ബേബി പ്ലാശേരി അധ്യക്ഷത വഹിച്ചു. ഡയറക്‌ടർ ഫാ. ഷിജു ഐക്കരക്കാനായിൽ, വൈസ് ഡയറക്‌ടർ ഫാ. ജിതിൻ വേലിക്കകത്ത്, സിസ്റ്റർ ലിസ്നി എസ്‌ഡി, ജനറൽ സെക്രട്ടറി ജിന്‍റോ തകിടിയേൽ, ജനറൽ ഓർഗനൈസർ അരുൺ ജോസ് പുത്തൻപുരയ്ക്കൽ, വൈസ് പ്രസിഡന്‍റ് അതുല്യ ജോസ്, ജോയിന്‍റ് സെക്രട്ടറി ടി.ജെ. മെയ്ജോ മോൾ, റീജണൽ ഓർഗനൈസർമാരായ സിബിൻ മർക്കോസ്, കിരൺ അഗസ്റ്റിൻ, രഞ്ജിത്ത് മുതുപ്ലാക്കൽ, തോമസ് അടുപ്പുകല്ലുങ്കൽ, സോയി ദേവസ്യ എന്നിവർ പ്രസംഗിച്ചു.
കേരള എയ്ഡഡ് സ്കൂൾ മാനേജേഴ്സ് അസോ.
തിരുവനന്തപുരം: ഗാന്ധിജയന്തി ദിനമായ ഒക്ടോബർ രണ്ട് ഞായറാഴ്ച ലഹരിവിരുദ്ധ പ്രചാരണ പ്രവർത്തനത്തിന്‍റെ സംസ്ഥാനതല ഉദ്ഘാടനം നടക്കുന്പോൾ അന്നേ ദിവസം പ്രവൃത്തിദിനമാക്കണമെന്നുള്ള വിദ്യാഭ്യാസ വകുപ്പിന്‍റെ സർക്കുലർ പിൻവലിക്കണമെന്ന് കേരള എയ്ഡഡ് സ്കൂൾ മാനേജേഴ്സ് അസോസിയേഷൻ ആവശ്യപ്പെട്ടു.
ഞായറാഴ്ചകൾ ക്രൈസ്തവർ വളരെ പ്രാധാന്യം കൽപ്പിക്കുകയും പ്രത്യേകമായി ആചരിക്കുകയും ചെയ്യുന്ന ദിവസമാണ്. ഈ ദിവസം ഔദ്യോഗിക പരിപാടികൾ നടത്തുന്നതിനായി മാറ്റിവയ്ക്കുന്നത് തീർത്തും അപലപനീയമാണ്.
ഒക്ടോബർ രണ്ടിന് സംസ്ഥാനവ്യാപകമായി നിശ്ചയിച്ചിരിക്കുന്ന പരിപാടികൾ മറ്റൊരു ദിവസത്തേക്ക് മാറ്റിവയ്ക്കാനുള്ള നടപടികൾ എത്രയും പെട്ടെന്ന് സ്വീകരിക്കണമെന്ന് കേരള എയ്ഡഡ് സ്കൂൾ മാനേജേഴ്സ് അസോസിയേഷൻ പ്രസിഡന്‍റ് റവ .ഡോ. വർക്കി ആറ്റുപുറത്ത്, ജനറൽ സെക്രട്ടറി ഫാ. സിജോ ഇളംകുന്നപ്പുഴ എന്നിവർ ആവശ്യപ്പെട്ടു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.