സർക്കാർ വാർഷികം: 1300 കേന്ദ്രങ്ങളിൽ ഇന്നു യുഡിഎഫ് ധർണ
Friday, May 20, 2022 2:15 AM IST
തിരുവനന്തപുരം: പിണറായി സർക്കാരിന്റെ ഒന്നാം വാർഷികം വിനാശത്തിന്റെ വർഷമായി യുഡിഎഫ് ആചരിക്കും. പിണറായി സർക്കാർ സത്യപ്രതിജ്ഞ ചെയ്തതിന്റെ ഒന്നാം വാർഷികദിനമായ ഇന്ന് 1300 കേന്ദ്രങ്ങളിൽ യുഡിഎഫ് സായാഹ്ന ധർണ നടത്തും. വൈകുന്നേരം നാലു മുതൽ ആറുവരെയാണ് ധർണ.
സംസ്ഥാനതല ഉദ്ഘാടനം പ്രതിപക്ഷ നേതാവ് വി.ഡി.സതീശൻ തൃക്കാക്കര നഗരസഭയിൽ നിർവഹിക്കും. സിൽവർലൈൻ ഉൾപ്പെടെയുള്ള ജനകീയ വിഷയങ്ങൾ ഉന്നയിക്കും.
കെപിസിസി പ്രസിഡന്റ് കെ.സുധാകരൻ കണ്ണൂരിലും ഉമ്മൻചാണ്ടി തൃശൂരിലും രമേശ് ചെന്നിത്തല ആലപ്പുഴയിലും എം.എം.ഹസൻ തിരുവനന്തപുരത്തും പി.കെ കുഞ്ഞാലിക്കുട്ടി മലപ്പുറത്തും ധർണയിൽ പങ്കെടുക്കും.