തോമസിനു ഹൃദയവും കരളും വലതുഭാഗത്താണ്... : Deepika.com Kerala News |

Click here for detailed news of all items

തോമസിനു ഹൃദയവും കരളും വലതുഭാഗത്താണ്...

Wednesday, September 30, 2020 12:47 AM IST

കടുത്തുരുത്തി: മുട്ടുചിറ ടൗണിൽ ബേക്കറി നടത്തുന്ന തോമസിന്‍റെ ഹൃദയമിടിപ്പറിയണമെങ്കിൽ വലതുഭാഗത്തെ നെഞ്ചിൽ കൈ വയ്ക്കണം. കാര്യമറിയാതെ ഇടതുനെഞ്ചിൽ കൈ വച്ചാൽ ഡോക്ടറാണെങ്കിൽപോലും ഞെട്ടും.

കൈയുടെ കുഴപ്പമാണെന്നു കരുതി സ്റ്റെതസ്കോപ്പ് വച്ചാലും ഹൃദയം മിടിക്കുന്നത് കണ്ടെത്താനാവില്ല. തോമസിനു ഹൃദയം ഇല്ലാത്തതല്ല ഈ ഞെട്ടലിനു കാരണം. അദ്ദേഹത്തിന്‍റെ ഹൃദയം വലതുവശത്താണെന്നതുതന്നെ കാരണം. ലക്ഷത്തിൽ ഒരാൾക്കു മാത്രമേ വലതുവശത്തു ഹൃദയം വരാറുള്ളൂ. ആദിത്യപുരം കുഴിപ്പിൽ കെ.എ. തോമസിന്‍റെ (67) ഹൃദയം മാത്രമല്ല കരളും പ്ലീഹയും മറ്റ് ആന്തരിക അവയവങ്ങളെല്ലാം വലതുവശത്താണ്.

പത്താം വയസിൽ കാലിലെ സന്ധികൾക്കു നീരും വേദനയും വന്നപ്പോൾ ചികിത്സയുടെ ഭാഗമായി നടത്തിയ പരിശോധനയിലാണ് ഹൃദയവും മറ്റ് ആന്തരിക അവയവങ്ങളും വലതു വശത്താണെന്ന യാഥാർഥ്യം തിരിച്ചറിഞ്ഞത്. മനുഷ്യരുടെ ഹൃദയവും ആന്തരികാവയവങ്ങളും ഇരിക്കുന്നത് സാധാരണ ശരീരത്തിന്‍റെ ഇടതു ഭാഗത്താണ്. ഹൃദയം വലതു വശത്ത് സ്ഥിതി ചെയ്യുന്നവരെ പലയിടത്തും കാണാറുണ്ടെങ്കിലും എല്ലാ ആന്തരികാവയവങ്ങളും വലതു വശത്തുള്ള മനുഷ്യർ അപൂർവമാണെന്ന് ഡോക്ടർമാരും പറയുന്നു. "ഡിസ്ട്രോകാഡിയാ സൈറ്റ് ഓഫ് ഇൻവേഴ്സസ്' എന്ന് ഡോക്ടർമാർ വിളിക്കുന്ന പ്രതിഭാസമാണിത്. ജന്മനാ അവയവങ്ങൾക്ക് സ്ഥാനമാറ്റം ഉണ്ടെങ്കിലും നാളിതുവരെ പറയത്തക്ക ആരോഗ്യ പ്രശ്നങ്ങളൊന്നുമുണ്ടായിട്ടില്ലെന്നു തോമസ് പറയുന്നു. പരേതയായ സോഫിയാണ് തോമസിന്‍റെ ഭാര്യ. സോളി, സോണി എന്നിവരാണ് മക്കൾ.

ബിജു ഇത്തിത്തറ

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.