സീറോ മലബാർ സഭയിൽ ഇന്‍റർനെറ്റ് ശൃംഖലയുമായി മൊബൈൽ ആപ്ലിക്കേഷൻ : Deepika.com Kerala News

കൊച്ചി: സീറോ മലബാർ സഭയിലെ എല്ലാ രൂപതകളെയും ഇടവകകളെയും വിശ്വാസികളെയും ഇന്‍റർനെറ്റ് ശൃംഖലയിലൂടെ ബന്ധിപ്പിക്കുന്ന മൊബൈൽ ആപ്ലിക്കേഷൻ സജ്ജമായി. സഭാസംബന്ധമായ അറിയിപ്പുകളും വാർത്തകളും ഉൾപ്പെടെ സമഗ്രവിവര വിനിമയം ലക്ഷ്യമാക്കി സഭയുടെ ഇന്‍റർനെറ്റ് മിഷനാണ് ആപ്ലിക്കേഷനു രൂപം നൽകിയിട്ടുള്ളത്.

സഭയിലെ സ്ഥാപനങ്ങൾ, സന്യാസ സമൂഹങ്ങൾ, പ്രസ്ഥാനങ്ങൾ എന്നിവയെല്ലാം നെറ്റ് വർക്കിന്‍റെ ഭാഗമാകും. പ്ലേസ്റ്റോറിൽനിന്നോ ആപ്പ് സ്റ്റോറിൽനിന്നോ ആപ്ലിക്കേഷൻ ഡൗണ്‍ലോഡ് ചെയ്ത് ഉപയോഗിക്കാം.

ഇടവകകളിൽ പേരും മൊബൈൽ നന്പറും അനുബന്ധ വിവരങ്ങളും ചേർത്തിട്ടുള്ള എല്ലാവർക്കും ഇതിന്‍റെ സേവനം ലഭ്യമാകും. രജിസ്റ്റർ ചെയ്യാത്തവർക്കു താത്കാലികമായി ഉപയോഗിക്കാൻ സീറോ മലബാർ സഭയുടെ ലോഗോയോടു കൂടിയ പബ്ലിക് ആപ്ലിക്കേഷൻ ഉപയോഗിക്കാം.

രൂപത മെത്രാന് വൈദികരുമായോ വിശ്വാസികളുമായോ സംഘടനകളുമായോ ആശയവിനിമയം നടത്താൻ ഇതിലൂടെ സാധിക്കും. ഇടവകയിൽനിന്നോ രൂപതയിൽനിന്നോ വിശ്വാസികൾക്ക് ആവശ്യമായ കൂദാശകൾ സംബന്ധിച്ചും മറ്റുമുള്ള സർട്ടിഫിക്കറ്റുകൾ, അനുമതിപത്രങ്ങൾ എന്നിവ സമീപഭാവിയിൽ മൊബൈൽ ആപ്ലിക്കേഷൻ വഴി ആവശ്യപ്പെടാം.

വികാരിക്കോ ബന്ധപ്പെട്ട അധികാരികൾക്കോ അപേക്ഷ പരിശോധിച്ച് നെറ്റ് വർക്ക് വഴി തന്നെ ആവശ്യപ്പെടുന്ന രേഖകൾ അയച്ചു നൽകാനും സാധിക്കും. സീറോ മലബാർ ഡയറക്ടറി, കലണ്ടർ, അനുദിന സഭാവാർത്തകൾ, പ്രാർഥനകൾ, ഫോണ്‍ നന്പറുകൾ എന്നിവയെല്ലാം മൊബൈൽ ആപ്പു വഴി ലഭ്യമാകും.

ആരാധാനാക്രമമനുസരിച്ചുള്ള ഓരോ ദിവസത്തെയും ബൈബിൾ ഭാഗങ്ങൾ, വചനസന്ദേശങ്ങൾ എന്നിവയും ലഭിക്കുമെന്നു സീറോ മലബാർ ഇന്‍റർനെറ്റ് മിഷൻ ഡയറക്ടർ ഫാ. ജോബി മാപ്രക്കാവിൽ പറഞ്ഞു. കോട്ടയം, തലശേരി, മാനന്തവാടി രൂപതകളിൽ എല്ലാ ഇടവകകളുടെയും മൊബൈൽ ആപ്പുകൾ ഇതിനകം തയാറായിക്കഴിഞ്ഞു.