ഭരണങ്ങാനം: മാർ തോമ്മാശ്ലീഹായുടെ പ്രേഷിത തീക്ഷ്ണതയും ചൈതന്യവും ഉൾകൊണ്ട് പ്രേഷിത പ്രവർത്തനം നടത്താൻ സ്ഥാപിതമായ ഡോട്ടേഴ്സ് ഓഫ് സെന്‍റ് തോമസ് (ഡിഎസ്ടി) മിഷനറി സന്യാസിനീ സമൂഹം സുവർണ ജൂബിലി നിറവിൽ.
സുവർണജൂബിലി സമാപനം ജൂലൈ ഒന്നിന് ഭരണങ്ങാനം സെന്‍റ് മേരീസ് ഫൊറോനപള്ളിയിൽ നടക്കും. ഉച്ചകഴിഞ്ഞ് രണ്ടിന് കൃതജ്ഞതാബലി. സീറോ മലബാർ സഭ മേജർ ആർച്ച്ബിഷപ്പ് കർദിനാൾ മാർ ജോർജ് ആലഞ്ചേരി മുഖ്യകാർമികത്വം വഹിക്കും.
വൈകുന്നേരം നാലിനു പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ടിന്‍റെ അധ്യക്ഷതയിൽ നടക്കുന്ന പൊതുസമ്മേളനം കർദിനാൾ മാർ ആലഞ്ചേരി ഉദ്ഘാടനം ചെയ്യും. ചങ്ങനാശേരി ആർച്ച് ബിഷപ് മാർ ജോസഫ് പെരുന്തോട്ടം അനുഗ്രഹപ്രഭാഷണം നടത്തും.
ബിഷപ്പുമാരായ മാർ ജോസഫ് പള്ളിക്കാപറന്പിൽ, മാർ സെബാസ്റ്റ്യൻ വടക്കേൽ, മാർ ജോസഫ് കൊടകല്ലിൽ, മാർ ജെയിംസ് അത്തിക്കളം, ജോസ് കെ. മാണി എംപി, എംഎസ്ടി ഡയറക്ടർ ജനറാൾ ഫാ.ആന്‍റണി പെരുമാനൂർ എംഎസ്ടി, കപ്പൂച്ചിൻ കോട്ടയം സെന്‍റ് ജോസഫ് പ്രൊവിൻസ് പ്രൊവിൻഷ്യൽ ഫാ.ജോസഫ് പുത്തൻപുര, കുറവിലങ്ങാട് മേജർ ആർക്കി എപ്പിസ്കോപ്പൽ മർത്ത് മറിയം ചർച്ച് ആർച്ച്പ്രീസ്റ്റ് ഫാ.ജോസഫ് തടത്തിൽ, മൂവാറ്റുപുഴ ലിസ്യൂ സെന്‍റർ ഡയറക്ടർ ഫാ.അഗസ്റ്റിൻ വാലുമ്മേൽ ഒഡിസി, രാഷ്‌ട്രദീപിക മാനേജിംഗ് ഡയറക്ടർ ഫാ. മാത്യു ചന്ദ്രൻകുന്നേൽ, ഭരണങ്ങാനം ഫൊറോനപള്ളി വികാരി ഫാ.അഗസ്റ്റിൻ കൊഴുപ്പംകുറ്റി, സിസ്റ്റർ ലിസി വടക്കേചിറയാത്ത് എസ്എബിഎസ്, മുൻഎംപി ജോയി ഏബ്രഹാം , ഭരണങ്ങാനം പഞ്ചായത്ത് പ്രസിഡന്‍റ് ബേബിച്ചൻ പരുന്തുവീട്ടിൽ, സിസ്റ്റർ നീറാ പുതുമന എസ്എൻഡി തുടങ്ങിയവർ ആശംസാപ്രസംഗം നടത്തും. ഡിഎസ്ടി സുപ്പീരിയർ ജനറൽ സിസ്റ്റർ ലിസാ ജോസ് പൂവത്തോലിൽ സ്വാഗതവുംഅസിസ്റ്റന്‍റ് ജനറൽ സിസ്റ്റർ സലോമി മൂക്കൻതോട്ടം കൃതജ്ഞതയും പറയും.
1969 ജൂലൈ മൂന്നിന് അരുവിത്തുറയിൽ പിറവികൊണ്ട ഡിഎസ്ടി സന്യാസിനീസമൂഹം കേരളത്തിലും ഇന്ത്യയിലെ വിവിധ സംസ്ഥാനങ്ങളിലും വിദേശത്തും ശുശ്രൂഷ ചെയ്യുന്നു. കേരളത്തിൽ ഒൻപത് രൂപതകളിലായി 24 ശാഖാ ഭവനങ്ങളും കേരളത്തിനു പുറത്ത് 17 രൂപതകളിലായി 36 ശാഖാ ഭവനങ്ങളും വിദേശ രാജ്യങ്ങളിൽ ഒൻപത് ഭവനങ്ങളും ശുശ്രൂഷാവേദികളായുണ്ട്. രണ്ട് പ്രൊവിൻസുകളിലും ഒരു റീജിയനിലുമായി നാനൂറോളം സിസ്റ്റേഴ്സും 85 അർത്ഥിനികളുമുണ്ട്.
1991ൽ എപ്പാർക്കിയൻ പദവിയും 2003ൽ മേജർ എപ്പിസ്കോപ്പൽ പദവിയും ലഭിച്ചു. കേരളം, തമിഴ്നാട്, കർണാടക, മഹാരാഷ്‌ട്ര, ഒഡീഷ, ആന്ധ്രപ്രദേശ്, മധ്യപ്രദേശ്, ഉത്തർപ്രദേശ്, ഉത്തരാഖണ്ഡ്, ഡൽഹി, ആസാം, മേഘാലയ എന്നീ സംസ്ഥാനങ്ങളിലും ജർമനി, അമേരിക്ക, ഇറ്റലി എന്നീ വിദേശരാജ്യങ്ങളിലും സേവനം ചെയ്യുന്നു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.