കുന്നംകുളം: പഴഞ്ഞി സെന്‍റ് മേരീസ് ഓർത്തഡോക്സ് കത്തീഡ്രലിൽ പരിശുദ്ധ യൽദോ മാർ ബസേലിയോസ് ബാവായുടെ 339-ാം ഓർമപ്പെരുന്നാളിന് കൊടിയേറി. രാവിലെ ഏഴിന് സെന്‍റ് ജോർജ് ചാപ്പലിൽ പരിശുദ്ധ ഗീവർഗീസ് സഹദായുടെ പെരുന്നാളിനോട് അനുബന്ധിച്ച് റമ്പാൻ എം.ഡി. യൂഹനോൻ കോർ എപ്പിസ്കോപ്പ വിശുദ്ധ കുർബാന അർപ്പിച്ചു.
കുർബാനയ്ക്കും പ്രദക്ഷിണത്തിനുംശേഷം റമ്പാൻ കോർ എപ്പിസ്കോപ്പയുടെ പ്രധാന കാർമികത്വത്തിൽ പെരുന്നാൾ കൊടിയേറ്റം നടത്തി. ശുശ്രൂഷകൾക്ക് ഇടവക വികാരി ഫാ. ജോൺ ഐസക്, സഹവികാരി ഫാ. ആന്‍റണി പൗലോസ്, ഫാ.ജോസഫ് തോലത്ത്, ഫാ. സൈമൺ വഴപ്പിള്ളി, ഫാ. ഗീവർഗീസ് കെ. വിൽസൺ, ഫാ. ജോസഫ് ജോസ് കെ, ഫാ. കുരിയാക്കോസ്, ഫാ. ജോർജ് ചാക്കോ എന്നിവർ സഹകാർമികരായി. കൈസ്ഥാനി സി.ജെ. സന്തോഷ്, സെകട്ടറി സിന്റോ കെ. ശീമോൻ, മാനേജിംഗ് കമ്മിറ്റി അംഗങ്ങൾ ചടങ്ങുകൾക്ക് നേതൃത്വംനൽകി. ഒക്ടോബർ 2,3 തീയതികളിലാണ് പഴഞ്ഞി പെരുന്നാൾ.