മാനന്തവാടി: വന്യജീവികൾ ജനവാസ മേഖലയിലിറങ്ങി മനുഷ്യജീവനും കൃഷിക്കും നാശം വരുത്തുന്നത് തടയുക, വനം വന്യജീവി നിയമത്തിൽ ഭേദഗതി വരുത്തുക തുടങ്ങിയ ആവശ്യങ്ങളുന്നയിച്ച് കേരള കർഷക സംഘത്തിന്‍റെ നേതൃത്വത്തിൽ മാനന്തവാടി ഡിഎഫ്ഒ ഓഫീസ് ഉപരോധിച്ചു.
നിരവധി കർഷകരാണ് പ്രതിഷേധ സമരത്തിൽ പങ്കാളിയായത്. കഐസ്കെടിയു സംസ്ഥാന കമ്മിറ്റിയംഗം സി.കെ. ശശീന്ദ്രൻ സമരം ഉദ്ഘാടനം ചെയ്തു. കർഷക സംഘം ജില്ലാ പ്രസിഡന്‍റ് എ.വി. ജയൻ അധ്യക്ഷത വഹിച്ചു. സംസ്ഥാന ജോയിന്റ് സെക്രട്ടറി പി.കെ. സുരേഷ്, ജസ്റ്റിൻ ബേബി, കെ.എം. വർക്കി എന്നിവർ പ്രസംഗിച്ചു.