രണ്ടാം സെമസ്റ്റർ എംഎസ് സി അപ്ലൈഡ് കെമിസ്ട്രി പരീക്ഷാഫലം
2018 ജൂണിൽ നടത്തിയ രണ്ടാം സെമസ്റ്റർ എംഎസ് സി അപ്ലൈഡ് കെമിസ്ട്രി (സി‌സിഎസ്എസ്) പരീക്ഷാഫലം പ്രസിദ്ധീകരിച്ചു.
പുനർമൂല്യനിർണയഫലം
2017 ഡിസംബറിൽ നടത്തിയ ഒന്നാം സെമസ്റ്റർ എംബിഎ പുനർമൂല്യനിർണയഫലം പ്രസിദ്ധീകരിച്ചു.
എക്സാമിനേഴ്സ് മീറ്റിംഗ്
ആറാം സെമസ്റ്റർ ബിഎസ് സി ഫിസിക്സ് പ്രാക്ടിക്കൽ പരീക്ഷയുമായി ബന്ധപ്പെട്ട എക്സാമിനേഴ്സ് മീറ്റിംഗിന് കോഴിക്കോട്, വയനാട് ജില്ലകളിലെ കോളജുകളിലെ ഫിസിക്സ് അധ്യാപകർ 28ന് രാവിലെ 10.30ന് കോഴിക്കോട് സാമൂതിരി ഗുരുവായൂരപ്പൻ കോളജിൽ ഹാജരാവണം.
സർവകലാശാല ജീവനക്കാർക്ക് ട്രോമാ കെയർ പരിശീലനപരിപാടി സംഘടിപ്പിച്ചു
തേഞ്ഞിപ്പലം: കാലിക്കട്ട് സർവകലാശാല എൻഎസ്എസ് ഓപ്പണ്‍ യൂണിറ്റ് മലപ്പുറം ജില്ലാ ട്രോമാ കെയറിന്‍റെ സഹകരണത്തോടെ പ്രഥമശുശ്രൂഷ, ജീവൻരക്ഷാപ്രവർത്തനങ്ങൾ, റോഡ് സുരക്ഷ എന്നിവയിൽ പരിശീലന പരിപാടി സംഘടിപ്പിച്ചു.
വൈസ് ചാൻസലർ ഡോ. കെ. മുഹമ്മദ് ബഷീർ ഉദ്ഘാടനം ചെയ്തു. ഓപ്പണ്‍ യൂണിറ്റ് പ്രോഗ്രാം ഓഫീസർ ഡോ. ഇ. ശ്രീകുമാരൻ, ട്രോമാ കെയർ മലപ്പുറം ജില്ലാ സെക്രട്ടറി കെ.പി. പ്രതീഷ് എന്നിവർ പ്രസംഗിച്ചു. പ്രഥമശുശ്രൂഷ, ജീവൻരക്ഷാ പ്രവർത്തനങ്ങൾ എന്നിവയിൽ മഞ്ചേരി മെഡിക്കൽ കോളേജിലെ ഡോ. യാസിറും റോഡ് സുരക്ഷയെക്കുറിച്ച് തിരൂരങ്ങാടി മോട്ടോർ വെഹിക്കിൾ ഇൻസ്പെക്ടർ സുരേഷും ക്ലാസുകൾ നയിച്ചു. മലപ്പുറം ജില്ലാ ട്രോമാ കെയറിൽ എൻറോൾ ചെയ്ത 68 സർവകലാശാല ജീവനക്കാർക്കുവേണ്ടിയാണ് പരിശീലനപരിപാടി സംഘടിപ്പിച്ചത്. എം.എം.ടി. ആസിഫ്, പി. ഉബൈദുള്ള, തേഞ്ഞിപ്പലം പോലീസ് സ്റ്റേഷനു കീഴിലെ ട്രോമാ കെയർ വോളണ്ടിയർമാർ എന്നിവർ നേതൃത്വം നൽ‌കി. സാമൂഹിക സേവനം കരിക്കുലത്തിന്‍റെ ഭാഗമാക്കുന്നതിന്‍റെ ഭാഗമായി എൻഎസ്എസ് പ്രോഗ്രാം കോഓർഡിനേറ്റർമാർക്കുള്ള ശിൽപശാലയും സംഘടിപ്പിച്ചു. വിദ്യാർഥിക്ഷേമവിഭാഗം ഡീൻ പി.വി. വൽസരാജൻ നേതൃത്വം നല്കി.
ബോട്ടണി പഠനവിഭാഗം പൂർവവിദ്യാർഥി സംഗമം സംഘടിപ്പിച്ചു
തേഞ്ഞിപ്പലം: കാലിക്കട്ട് സർവകലാശാല ബോട്ടണി പഠനവിഭാഗത്തിന്‍റെ ആഭിമുഖ്യത്തിൽ അന്പതാമത് പൂർവവിദ്യാർഥി സംഗമം സംഘടിപ്പിച്ചു. ആദ്യ ബാച്ചിലെ വിദ്യാർഥികൾ ഉൾപ്പെടെ അന്പതുവർഷത്തെ വിവിധ ബാച്ചുകളിലെ അധ്യാപകരും വിദ്യാർഥികളും പങ്കെടുത്തു. പ്രഫ. ലീലാവതി, പ്രഫ. ഏലിയാമ്മ തോമസ്, പ്രഫ. കെ.വി. മോഹനൻ എന്നിവരെ ചടങ്ങിൽ ആദരിച്ചു. ഡോ. ജോണ് ഇ. തോപ്പിൽ, ഡോ. എ. കെ. പ്രദീപ് തുടങ്ങിയവർ പ്രസംഗിച്ചു.
എം.എം. ഗനി അവാർഡ് ജേതാക്കൾ
തേഞ്ഞിപ്പലം: കാലിക്കട്ട് സർവകലാശാലയുടെ കീഴിലുള്ള അഫിലിയേറ്റഡ് കോളജുകളിലെ മികച്ച അധ്യാപകർക്കുള്ള പ്രഫസർ എം.എം. ഗനി അവാർഡിന് ഡോ. സാബു തോമസ് (കോഴിക്കോട് സെന്‍റ് ജോസഫ്സ് കോളജ്, സുവോളജി വിഭാഗം), ഡോ. എൻ.ആർ. മംഗളാംബാൾ (ഇരിങ്ങാലക്കുട സെന്‍റ് ജോസഫ്സ് കോളജ് ഗണിതവിഭാഗം), ഡോ. കെ. ഷെയ്ഖ് മുഹമ്മദ് (മലപ്പുറം പുളിക്കൽ മദീനത്തുൽ ഉലൂം അറബി കോളജ്), ഡോ. സിസ്റ്റർ റോസ് ആന്‍റോ (ഇരിങ്ങാലക്കുട സെന്‍റ് ജോസഫ്സ് കോളജ് ഹിന്ദി വിഭാഗം), ഡോ. പി. ചാക്കോ ജോസ് (ചാലക്കുടി സേക്രഡ് ഹാർട്ട് കോളജ് സാന്പത്തികശാസ്ത്ര വിഭാഗം), ഡോ. ടി. സോണി ജോണ് (ഇരിങ്ങാലക്കുട ക്രൈസ്റ്റ് കോളജ് കായികവിഭാഗം) എന്നിവർ അർഹരായി.
201516 , 1617 അധ്യയനവർഷങ്ങളിലേയ്ക്കുള്ള നാമനിർദ്ദേശങ്ങളിൽനിന്നാണ് ഇവരെ തെരഞ്ഞെടുത്തത്. വൈസ് ചാൻസലർ, പ്രോ വൈസ് ചാൻസലർ, രജിസ്ട്രാർ, ഡോ. എം. ജി. എസ്. നാരായണൻ, സിൻഡിക്കറ്റ് അംഗങ്ങൾ, സിഡിസി ഡയറക്ടർ തുടങ്ങിയവരടങ്ങിയ സമിതിയാണ് അവാർഡ് ജേതാക്കളെ തെരഞ്ഞെടുത്തത്.