ഇൻസ്റ്റിറ്റ്യൂട്ട് ഓഫ് ഫോറസ്റ്റ് മാനേജ്മെന്റിൽ പോസ്റ്റ് ഗ്രാജ്വേറ്റ് കോഴ്സുകൾ
വനം, പരിസ്ഥിതി, പ്രകൃതി വിഭവങ്ങൾ എന്നിവ സംരക്ഷിക്കുന്നതിനുള്ള പ്രഫഷണലുകൾക്കു വേണ്ട പരിശീലനം നല്കുന്ന പ്രമുഖ സ്ഥാപനമാണു ഭോപ്പാലിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ഫോറസ്റ്റ് മാനേജ്മെന്റ് (ഐഐഎഫ്എം). ഇൻസ്റ്റിറ്റ്യൂട്ട് നടത്തുന്ന പോസ്റ്റ് ഗ്രാജ്വേറ്റ് ഡിപ്ലോമ ഇൻ ഫോറസ്ട്രി മാനേജ്മെന്റ്, പോസ്റ്റ് ഗ്രാജ്വേറ്റ് ഡിപ്ലോമ ഇൻ സസ്റ്റൈനബിലിറ്റി മാനേജ്മെന്റ് കോഴ്സുകളിലേക്ക് ഇപ്പോൾ അപേക്ഷിക്കാം. രണ്ടു വർഷത്തെ കോഴ്സുകൾക്ക് ഏതെങ്കിലും വിഷയത്തിൽ 50 ശതമാനം മാർക്കോടെ ബിരുദം നേടിയവർക്കും അവസാന വർഷ വിദ്യാർഥികൾക്കും അപേക്ഷിക്കാം.
പട്ടിക ജാതിവർഗക്കാർക്ക് 45 ശതമാനം മാർക്കു മതി. ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെന്റ് നടത്തുന്ന ക്യാറ്റ്, എക്സ്എൽആർഐ നടത്തുന്ന സേവ്യർ ആപ്റ്റിറ്റ്യൂഡ് ടെസ്റ്റ് എന്നിവയിലെ സ്കോറിന്റെ അടിസ്ഥാനത്തിലാണ് അഡ്മിഷൻ. ഇൻസ്റ്റിറ്റ്യൂട്ടിലെ പ്രവേശനത്തിനു പ്രത്യേകമായും അപേക്ഷിക്കണം. അപേക്ഷാ ഫീസ് 1,000 രൂപ. പിക ജാതിവർഗക്കാർക്ക് 500 രൂപ. ഫെബ്രുവരി 20 നകം അപേക്ഷിക്കണം. കണ്സർവേഷൻ ആൻഡ് ലൈവ്ലിഹുഡ്, ഡെവലപ്മെന്റ് മാനേജ്മെന്റ്, എൻവയണ്മെന്റ് മാനേജ്മെന്റ് എന്നീ സ്പെഷലൈസേഷനോടു കൂടിയതാണ് ഫോറസ്റ്റ് മാനേജ്മെന്റ് കോഴ്സ്.
ഷോർട്ട് ലിസ്റ്റ് ചെയ്യുന്നവരെ കൊച്ചി, ഭോപ്പാൽ, ബംഗളൂരു, ന്യൂഡൽഹി, കോൽക്കത്ത, ഗോഹട്ടി എന്നിവിടങ്ങളിൽ നടത്തുന്ന ആപ്റ്റിറ്റ്യൂഡ് ടെസ്റ്റിന്റെയും തുടർന്ന് ഗ്രൂപ് ഡിസ്കഷൻ, ഇന്റർവ്യു എന്നിവയുടെയും അടിസ്ഥാനത്തിലാണ് അന്തിമ തെരഞ്ഞെടുപ്പ്. 3,74,400 രൂപയാണ് ആദ്യ വർഷം ട്യൂഷൻ ഫീസ്. പട്ടിക ജാതിവർഗക്കാർക്ക് 2,49,600 രൂപ. ഫോണ്: 07552763466.