പ്രഫഷണൽ കോഴ്സ് പ്രവേശനം: അവസാന തീയതി 25
തിരുവനന്തപുരം: 202021 അധ്യയനവർഷത്തെ എൻജിനിയറിംഗ്/ ആർക്കിടെക്ചർ/ഫാർമസി/മെഡിക്കൽ/മെഡിക്കൽ അനുബന്ധ കോഴ്സുകളിലേക്കു പ്രവേശനത്തിനായുള്ള ഓണ്ലൈൻ അപേക്ഷ, പ്രവേശന പരീക്ഷാ കമ്മീഷണറുടെ വെബ്സൈറ്റിലൂടെ സമർപ്പിക്കാവുന്ന അവസാന തീയതി 25.
അപേക്ഷകർ നേറ്റിവിറ്റി, ജനനത്തീയതി എന്നിവ തെളിയിക്കാനുള്ള രേഖ 25നകം ഓണ്ലൈൻ അപേക്ഷയോടൊപ്പം അപ്ലോഡ് ചെയ്യണം.
നേറ്റിവിറ്റി, ജനനത്തീയതി എന്നിവ ഒഴികെയുള്ള മറ്റു രേഖകൾ അപ് ലോഡ് ചെയ്യുന്നതിന് 29ന് വൈകുന്നേരം അഞ്ചുവരെ സമയമുണ്ട്. സമയം നീട്ടി നൽകില്ല.
നീറ്റ് യുജി 2020 പരീക്ഷയ്ക്ക് അപേക്ഷ സമർപ്പിച്ച വിദ്യാർഥികൾ കേരളത്തിലെ സർക്കാർ/ സ്വാശ്രയ കോളജുകളിൽ മെഡിക്കൽ, മെഡിക്കൽ അനുബന്ധ കോഴ്സുകളിൽ പ്രവേശനം ആഗ്രഹിക്കുന്നവർ 25ന് മുന്പായി കീം വഴി ഓണ്ലൈൻ അപേക്ഷ സമർപ്പിക്കണം.
നോണ് ക്രീമിലെയർ സർട്ടിഫിക്കറ്റ് ആവശ്യമായി വരുന്ന വിദ്യാർഥികൾ അതതു വില്ലേജ് ഓഫീസർമാർ കേരളത്തിലെ വിദ്യാഭ്യാസ ആവശ്യങ്ങൾക്കായി നൽകുന്ന സർട്ടിഫിക്കറ്റുകൾ മാത്രമേ സമർപ്പിക്കാവൂ. കേരളത്തിലെ ജോലി ആവശ്യങ്ങൾക്കായോ കേന്ദ്ര ആവശ്യങ്ങൾക്കായോ നൽകുന്ന നോണ്ക്രീമിലയർ സർട്ടിഫിക്കറ്റ് സ്വീകരിക്കില്ല. അപൂർണവും അവ്യക്തവും നിശ്ചിത മാതൃകയിലല്ലാത്തുമായ സർട്ടിഫിക്കറ്റ് സംവരണം/ ആനുകൂല്യം എന്നിവയ്ക്കായി പരിഗണിക്കില്ല.
നിശ്ചിത തീയതിക്കു ശേഷം ലഭിക്കുന്ന അപേക്ഷകളും സർട്ടിഫിക്കറ്റുകളും പ്രവേശനത്തിനായി പരിഗണിക്കില്ല. ഒരു ഓണ്ലൈൻ അപേക്ഷയേ സമർപ്പിക്കാവൂ.
ഹെൽപ്പലൈൻ: 0471 2525300, 2335523 155300.