ഡ്രമാറ്റിക് ആർട്സിൽ ത്രിവത്സര ഡിപ്ലോമ
കേന്ദ്ര സാംസ്കാരിക മന്ത്രാലയത്തിനു കീഴിലുള്ള സ്വയംഭരണ സ്ഥാപനമായ നാഷണൽ സ്കൂൾ ഓഫ് ഡ്രാമ, ഡ്രമാറ്റിക് ആർട്സിൽ ത്രിവത്സര ഡിപ്ലോമ കോഴ്സിന് അപേക്ഷ ക്ഷണിച്ചു. അഭിനയം, ഡിസൈൻ, നാടകവുമായി ബന്ധപ്പെട്ട മറ്റു മേഖലകൾ എന്നിവയിൽ പ്രഫഷണലുകളായിത്തീരാൻ വിദ്യാർഥികളെ പരിശീലിപ്പിക്കുന്നതാണു കോഴ്‌സ്.
ആറു നാടകാവിഷ്കാരങ്ങളിലെങ്കിലും പങ്കെടുത്ത ബിരുദധാരികൾക്ക് അപേക്ഷിക്കാം. പ്രായം 2020 ജൂലൈ ഒന്നിന് 18 നും 30നും മധ്യേ. പട്ടികജാതിവർഗക്കാർക്ക് അഞ്ചു വർഷത്തെ ഇളവുണ്ട്. ആകെ 26 സീറ്റുകളാണുള്ളത്.
അപേക്ഷകൾ വിദഗ്ധ സമിതി പരിശോധിച്ചു വിലയിരുത്തിയ ശേഷം പ്രാഥമിക പരീക്ഷ, ഓഡിഷൻ എന്നിവ നടത്തിയായിരിക്കും തെരഞ്ഞെടുപ്പ്. ജയ്പൂർ, പാറ്റ്ന, ഭുവനേശ്വർ, ഡൽഹി, ബംഗളൂരു, മുംബൈ, ഭോപ്പാൽ, ചണ്ഡിഗഡ്. ലക്നോ, കോൽക്കത്ത, ഗോഹട്ടി, ചെന്നൈ, എന്നിവിടങ്ങളിലാണു പ്രാഥമിക പരീക്ഷയ്ക്കു കേന്ദ്രങ്ങൾ. ഇതിൽ തെരഞ്ഞെടുക്കപ്പെടുന്നവരെ അഞ്ച് ദിവസം നീണ്ടുനിൽക്കുന്ന ശില്പശാലയിൽ പങ്കെടുപ്പിക്കും. ഇതിന്‍റെ അടിസ്ഥാനത്തിലാണു തെരഞ്ഞെടുപ്പ്. ശില്പശാലയിൽ പങ്കെടുക്കാൻ എത്തുന്നവർക്കു രണ്ടാം ക്ലാസ് ട്രെയിൻ ടിക്കറ്റും നൽകും. കൂടാതെ താമസ സൗകര്യവും ലഭിക്കും.
തെരഞ്ഞെടുക്കപ്പെടുന്നവർക്കു പ്രതിമാസം 8000 രൂപ സ്കോളർഷിപ്പ് ലഭിക്കും. അപേക്ഷാഫോമും പ്രോസ്പെക്ടസും വെബ്സൈറ്റിൽ നിന്നു ഡൗണ്ലോഡ് ചെയ്യാം. ഫെബ്രുവരി 28നകം അപേക്ഷിക്കണം. വിലാസം: അക്കാഡമിക് സെക്‌ഷൻ, നാഷണൽ സ്കൂൾ ഓഫ് ഡ്രാമ, ബഹവൽപൂർ ഹൗസ്, ഭഗവാൻദാസ് റോഡ്, ന്യൂഡൽഹി 110001.