കണ്ണൂർ സർവകലാശാല വിദൂരവിദ്യാഭ്യാസ വിഭാഗത്തിൽ രജിസ്റ്റർ ചെയ്തിട്ടുള്ള മാനന്തവാടി ഗവ. കോളജ് പരീക്ഷാകേന്ദ്രമായി തെരഞ്ഞെടുത്ത മൂന്നാംവർഷ ബിരുദ, രണ്ടാംവർഷ അഫ്സലുൽ ഉലമ പ്രിലിമിനറി വിദ്യാർഥികളുടെ സ്വയം പഠനസഹായികൾ വിതരണം ചെയ്യും. 24ന് രാവിലെ 10.30 മുതൽ 2.30 വരെ മാനന്തവാടി മേരിമാതാ ആർട്സ് ആൻഡ് സയൻസ് കോളജിൽ വച്ചാണ് വിതരണം ചെയ്യുക. വിദ്യാർഥികൾ സർവകലാശാല നൽകിയ തിരിച്ചറിയൽ രേഖ, ഫീസ് അടച്ച രസീത് എന്നിവ ഹാജരാക്കണം.
ഓപ്പൺ ഡിഫൻസ്
ഇക്കണോമിക്സിൽ ഗവേഷണം നടത്തുന്ന പി.നാരായണൻ, മൈക്രോബയോളജിയിൽ ഗവേഷണം നടത്തുന്ന സുബി മാത്യു എന്നിവർ പിഎച്ച്ഡി ബിരുദത്തിനായി സമർപ്പിച്ച പ്രബന്ധത്തിന്മേലുള്ള തുറന്ന സംവാദം 25ന് രാവിലെ 11.30നും ഡിസംബർ രണ്ടിന് രാവിലെ 11നും വീഡിയോ കോൺഫറൻസിലൂടെ നടത്തും.
മാർക്ക് ലിസ്റ്റ്, പ്രൊവിഷണൽ സർട്ടിഫിക്കറ്റ് വിതരണം
വിദൂരവിദ്യാഭ്യാസ വിഭാഗം ഒന്നും രണ്ടും വർഷ ബിരുദാനന്തര ബിരുദ റഗുലർ/സപ്ലിമെന്ററി/ഇംപ്രൂവ്മെന്റ് ജൂൺ 2019 പരീക്ഷകളുടെ മാർക്ക് ലിസ്റ്റും 2017ൽ പ്രവേശനം നേടി കോഴ്സ് വിജയിച്ച വിദ്യാർഥികളുടെ പ്രൊവിഷണൽ സർട്ടിഫിക്കറ്റുകളും 23ന് രാവിലെ 10.30 മുതൽ മൂന്നു വരെ താവക്കര കാമ്പസിൽ വിതരണം ചെയ്യും. 2014ൽ പ്രവേശനം നേടിയ വിദ്യാർഥികളുടെ മാർക്ക് ലിസ്റ്റ് പിന്നീട് വിതരണം ചെയ്യും. ഹാൾടിക്കറ്റ്, സർവകലാശാല നൽകുന്ന തിരിച്ചറിയൽ രേഖ എന്നിവ ഹാജരാക്കുകയും കോവിഡ് മാനദണ്ഡം പാലിക്കുകയും വേണം.