താങ്ക്സ് ഗിവിംഗ് ആഘോഷിക്കാൻ കവർന്നത് 1800 ഗ്യാലൻ വോഡ്ക
Friday, November 24, 2017 12:05 PM IST
ലോസ്ആഞ്ചലസ്: താങ്ക്സ് ഗിവിംഗ് ആഘോഷം പൊടിപൊടിക്കാൻ കവർന്നത് 1800 ഗ്യാലൻ വോഡ്ക. ലോസ് ആഞ്ചലസ് ഡൗണ്‍ ടൗണിലെ ഡിസ്റ്റലറിയിൽ നവംബർ 22ന് രാത്രിയാണ് സംഭവം. മോഷ്ടാക്കൾക്കായി പോലീസ് അന്വേഷണം ഉൗർജിതമാക്കി.

ഫോഗഷോട്ട്സ് തകർത്ത് ഡിസ്റ്റലറിയുടെ അകത്തു പ്രവേശിച്ച മോഷ്ടാക്കൾ 280,000 ഡോളർ വിലവരുന്ന 9,000 ബോട്ടിലുകളാണ് കടത്തികൊണ്ടു പോയത്. മൂന്നാഴ്ച മുന്പു മൂന്നു പേർ ഫാക്ടറിയിലേക്ക് റൂഫിനു മുകളിലൂടെ കടക്കുവാൻ ശ്രമിച്ചതിന്‍റെ വീഡിയോ കണ്ടിരുന്നുവെങ്കിലും ആ സമയത്തു മോഷണം നടന്നിരുന്നില്ലെന്നും ഉടമ പറഞ്ഞു.

അതേസമയം പ്രായപൂർത്തിയാകാത്തവർക്ക് മോഷ്ടിച്ച വോഡ്ക നൽകുമോ എന്ന ഭയമാണ് ഉടമക്കുള്ളത്. ഇത്രയും മദ്യം കടകളിൽ കൊണ്ടു പോയി വിൽക്കുവാൻ മോഷ്ടാക്കൾക്ക് കഴിയുകയില്ലെന്നും ഉടമ പറഞ്ഞു. ബാർ കോഡ് ഉള്ളതിനാൽ സംസ്ഥാന അതിർത്തി വിട്ടു മറ്റു സ്ഥലങ്ങളിൽ കൊണ്ടുപോകുക എന്നതും അസാധ്യമാണ്.

താങ്ക്സ് ഗിവിംഗ് ഡേയിൽ സമീപ പ്രദേശത്ത് വില്പന നടത്തുക എന്നതായിരിക്കും കവർച്ചക്കാരുടെ ലക്ഷ്യമെന്ന് കരുതുന്നു. സംഭവത്തെക്കുറിച്ച് വിവരം ലഭിക്കുന്നവർ ലോസ് ആഞ്ചലസ് പോലീസ് ഡിപ്പാർട്ട്മെന്‍റിനെ അറിയിക്കണമെന്ന് അഭ്യർഥിച്ചിട്ടുണ്ട്.

റിപ്പോർട്ട്: പി.പി. ചെറിയാൻ
Copyright @ 2022 , Rashtra Deepika Ltd.