ഹൂസ്റ്റണ്‍: ഹൃസ്വ സന്ദർശനാർത്ഥം അമേരിക്കയിൽ എത്തിച്ചേർന്ന പത്തനംതിട്ട ജില്ലാ പഞ്ചായത്ത് വൈസ് പ്രസിഡന്‍റും കോണ്ഗ്രീസ് നേതാവുമായ ജോർജ് മാമ്മൻ കൊണ്ടൂരിനു പത്തനംതിട്ട ജില്ലാ അസോസിയേഷന്റെ ആഭിമുഖ്യത്തിൽ ഉജ്വല സ്വീകരണം നൽകി. ജൂലൈ 8നു ഞായറാഴ്ച വൈകുന്നേരം 4.30നു സ്റ്റാഫോർഡിലുള്ള സൗത്ത് ഇന്ത്യൻ ചേംബർ ഓഫ് കോമേഴ്സ് ഹാളിൽ വച്ചായിരുന്നു സ്വീകരണ സമ്മേളനം. പ്രസിഡന്‍റ് ശശിധരൻ നായർ അധ്യക്ഷത വഹിച്ചു. തുടർന്ന് ഷാൾ അണിയിച്ചു കൊണ്ടൂരിനെ അദ്ദേഹം സ്വീകരിച്ചു. ജനറൽ സെക്രട്ടറി ജെയിംസ് കൂടൽ സ്വാഗതം ആശംസിച്ചു.
പത്തനംതിട്ട ജില്ലയിലെ ജനങ്ങളുടെ അടിസ്ഥാന ആവശ്യങ്ങൾ നിറവേറ്റുന്നതിനും ജില്ലയുടെ വികസനത്തിന് ജില്ലാ പഞ്ചായത്തും കൊണ്ടൂരും ചെയ്യുന്ന കാര്യങ്ങൾ സവിസ്തരം അദ്ദേഹം വ്യക്തമാക്കി. ജില്ലയിലെ വിദ്യാഭാസ സ്ഥാപനങ്ങൾ, റോഡുകൾ, ജലസേചന പദ്ധതികൾ, ആശുപത്രികൾ, പ്രകൃതിക്ഷോഭത്തോടനുബന്ധിച്ചുള്ള ദുരിതാശ്വാസ പ്രവർത്തനങ്ങൾ തുടങ്ങിയവയെപ്പറ്റി പങ്കെടുത്തവർ ചോദ്യങ്ങളായി ശ്രദ്ധയിൽ പെടുത്തിയപ്പോൾ നാളിതു വരെ പ്രഖ്യാപിക്കപ്പെട്ട പദ്ധതികളും ജില്ലാ പഞ്ചായത്തിന്‍റെ പരിഗണനയിൽ ഇരിക്കുന്ന പദ്ധതികളും മറ്റു വികസന പരിപാടികളെപറ്റിയും വിശദമായി കൊണ്ടൂർ മറുപടി നൽകി.
നിരവധി ട്രേഡ് യൂണിയനുകൾക്കു നേതൃത്വം നൽകുന്നതോടൊപ്പം കേരള സംസ്ഥാന കോ ഓപ്പറേറ്റീവ് ഹൗസിംഗ് ഫെഡറേഷൻ വൈസ് ചെയർമാനായും പ്രവർത്തിക്കുന്ന കൊണ്ടൂർ പത്തനംതിട്ട ജില്ലാ പഞ്ചായത്തിന്‍റെ വൈസ് പ്രസിഡന്‍റ് പദവിയോടൊപ്പം സാന്പത്തിക കാര്യസമിതിയുടെ ചെയർമാനായും പ്രവർത്തിക്കുന്നു. സംസ്ഥാന സർക്കാരിന്‍റെ 2017ലെ ഏറ്റവും മികച്ച ജില്ലാ പഞ്ചായത്തിനുള്ള അവാർഡും 25 ലക്ഷം രൂപ സമ്മാനവും പത്തനംതിട്ട ജില്ലാ പഞ്ചായത്തിനു കരസ്ഥമാക്കുവാൻ കൊണ്ടൂർ വഹിച്ച പങ്ക് പ്രശംസനീയമാണ്.
ജില്ലാ അസോസിയേഷൻ സെക്രട്ടറി ജീമോൻ റാന്നി, സ്ഥാപക നേതാക്കളായ ജോർജ് എം ഫിലിപ്പ്, ബ്ലസൻ ഹൂസ്റ്റണ്‍, സക്കറിയ കോശി, ഐ.എൻ.ഓ.സി പെൻസിൽവാനിയ ചാപ്റ്റർ സെക്രട്ടറി സന്തോഷ് എബ്രഹാം, എസ്.കെ.ചെറിയാൻ, സജി ഇലഞ്ഞിക്കൽ, മാമ്മൻ ജോർജ്, റോയ് തീയാടിക്കൽ, ജെ.ഡബ്ലിയു. വർഗീസ്, റോയ് വെട്ടുകുഴി, ഡാനിയേൽ ചാക്കോ, ജോർജ് കൊച്ചുമ്മൻ ജോമോൻ ഇടയാടി, തോമസ് ഒലിയാംകുന്നേൽ തുടങ്ങിയവർ ചർച്ചകളിൽ സജീവമായി പങ്കെടുത്തു.
റിപ്പോർട്ട്: ജീമോൻ റാന്നി