എൻ.ആർ മൊഹല്ല മൗണ്ട് കാർമൽ ദേവാലയത്തിൽ
മൈസൂരു: എൻ.ആർ മൊഹല്ല മൗണ്ട് കാർമൽ ദേവാലയത്തിൽ കർമലമാതാവിന്റെയും വിശുദ്ധ ചാവറയച്ചന്റെയും തിരുനാളിന് തുടക്കമായി. ജനുവരി 26ന് വൈകുന്നേരം 5.30ന് വികാരി ഫാ. ജോമി മേക്കുന്നേൽ കൊടിയേറ്റ് നിർവഹിച്ചു. തുടർന്ന് നടന്ന ദിവ്യബലിക്കും നൊവേനയ്ക്കും ഫാ. സിബി മാലോല മുഖ്യകാർമികത്വം വഹിച്ചു.
ഇടവകദിനമായ ഇന്നലെ വൈകുന്നേരം 4.30ന് ആഘോഷമായ സമൂഹബലിക്ക് മൈസൂരു രൂപതാ മുൻ ബിഷപ്പ് മാർ ഡോ. തോമസ് ആന്റണി വാഴപ്പള്ളി മുഖ്യകാർമികത്വം വഹിച്ചു. ഫാ. ജോ,ഫ് ഇടക്കേരി, ഫാ. ജോർജ് കളമ്പുകാട്ട്, ഫാ. ജോൺസൺ ആറ്റുചാലിൽ എന്നിവർ സഹകാർമികരായിരുന്നു. തുടർന്ന് പൊതുസമ്മേളനവും കലാപരിപാടികളും നടന്നും. പ്രധാന തിരുനാൾ ദിവസമായ ഇന്ന് രാവിലെ എട്ടിന് ദിവ്യബലി. വൈകുന്നേരം അഞ്ചിന് ആഘോഷമായ തിരുനാൾ ദിവ്യബലിക്ക് ഫാ. മാർട്ടിൻ കണ്ടംപറമ്പിൽ മുഖ്യകാർമികനാകും. സിഎംഐ മൈസൂരു പ്രൊവിൻഷ്യൽ ഫാ. വർഗീസ് കേളാംപറമ്പിൽ, വികാർ പ്രൊവിൻഷ്യൽ ഫാ. തോമസ് കണ്ടത്തിൽ എന്നിവർ സഹകാർമികരാകും. ഫാ. ബിജു പള്ളുരാത്തിൽ വചനസന്ദേശം നല്കും. തുടർന്ന് പ്രദക്ഷിണം നടക്കും. തിരുനാളിനോടനുബന്ധിച്ച് ശനി, ഞായർ ദിവസങ്ങളിൽ വൈകുന്നേരം നാലു മുതൽ കിരീടസമർപ്പണത്തിന് പ്രത്യേക സൗകര്യമുണ്ടായിരിക്കുമെന്ന് പോൾ ആന്റണി, എം.കെ. ജോണി എന്നിവർ അറിയിച്ചു.
ധർമാരാം ഫൊറോന ദേവാലയത്തിൽ
ബംഗളൂരു: ധർമാരാം സെന്റ് തോമസ് ഫൊറോനാ ദേവാലയത്തിൽ ഇടവക മധ്യസ്ഥനായ മാർ തോമാശ്ലീഹായുടെയും വിശുദ്ധ സെബസ്ത്യാനോസിന്റെയും തിരുനാൾ ഫെബ്രുവരി രണ്ടു മുതൽ 11 വരെ ആഘോഷിക്കും. രണ്ടിന് വൈകുന്നേരം 5.30ന് തിരുനാളിന് തുടക്കംകുറിച്ച് ഇടവക വികാരി ഫാ.സിറിയക് മഠത്തിൽ സിഎംഐ കൊടിയേറ്റും. തുടർന്ന് ആഘോഷമായ ദിവ്യബലി, സന്ദേശം, നൊവേന, നേർച്ചവിതരണം എന്നിവ ഉണ്ടായിരിക്കും. അന്നേദിവസം ഇടവകയിൽ മരണമടഞ്ഞവരുടെ ഓർമദിനമായും ആചരിക്കും.
തുടർന്ന് വരുന്ന തിരുനാൾ ദിവസങ്ങളിൽ ഫെബ്രുവരി 10 വരെ വൈകുന്നേരം അഞ്ചിന് ജപമാലയും തുടർന്ന് ആഘോഷമായ ദിവ്യബലിയും, നൊവേനയും നടക്കും. ഫാ. മാത്യു കളരിക്കൽ സിഎംഐ, ഫാ.ജോർജ് എടയാടിയിൽ സിഎംഐ, ഫാ. മരിയദാസ് ഒഐസി, ഫാ.ജോർജ് മൈലാടൂർ, ഫാ. വിജു പൈനാടത്ത് സിഎംഐ, ഫാ. സെബാസ്റ്റ്യൻ മഞ്ഞളി സിഎംഐ, ഫാ. മനോജ് അമ്പലത്തിങ്കൽ, റവ.ഡോ. മാത്യു കോയിക്കര സിഎംഐ, ഫാ. ജോബി മാത്യു സിഎസ്ടി എന്നിവർ നൊവേന ദിവസങ്ങളിൽ ആഘോഷമായ ദിവ്യബലിക്ക് മുഖ്യകാർമികത്വം വഹിക്കും.ഫെബ്രുവരി പത്തിന് രാവിലെ 6.10ന് ദിവ്യബലി. തുടർന്ന് വിവിധ വാർഡുകളിലേക്കുള്ള അമ്പ് എഴുന്നെള്ളിപ്പ് നടക്കും. വൈകുന്നേരം അഞ്ചിന് ദിവ്യബലിക്കുശേഷം ഇടവകയുടെ വൃദ്ധസദനമായ കൃപാലയയിൽനിന്ന് ഇടവക ദേവാലയത്തിലേക്ക് ആഘോഷമായ പ്രദക്ഷിണം നടക്കും.
പ്രധാന തിരുനാൾ ദിവസമായ ഫെബ്രുവരി 11ന് രാവിലെ ഒമ്പതിന് ആഘോഷമായ തിരുനാൾ ദിവ്യബലിക്ക് ഫാ. കുര്യൻ പുത്തൻപുര മുഖ്യകാർമികത്വം വഹിക്കും. ഫാ. ഷിനു ഉതുപ്പാൻ തിരുനാൾ സന്ദേശം നൽകും. തുടർന്ന് ആഘോഷമായ തിരുനാൾ പ്രദക്ഷിണത്തിനു ശേഷം പാരിഷ് ഹാളിൽ ഇടവകാംഗങ്ങൾ ഒരുക്കുന്ന വിവിധ കലാപരിപാടികളും അരങ്ങേറും. തിരുനാളിനോടനുബന്ധിച്ച് കേരളഭക്ഷണങ്ങളുടെ സ്റ്റാളുകളും ഉണ്ടായിരിക്കുന്നതാണ്. വൈകുന്നേരം 5.30ന് പാരിഷ് ഹാളിൽ നടക്കുന്ന പൊതുസമ്മേളനത്തിൽ ഫാ. ഡേവിസ് ചിറമേൽ മുഖ്യാതിഥിയായിരിക്കും. ധർമാരാം റെക്ടർ റവ. ഡോ. ജോർജ് എടയാടിയിൽ സിഎംഐ, ആഭ്യന്തരമന്ത്രി രാമലിംഗറെഡ്ഡി, ബിബിഎംപി കോർപറേറ്റർ ജി. മഞ്ജുനാഥ് എന്നിവരും പങ്കെടുക്കും. ആറിന് ഇടവകാംഗങ്ങൾ ഒരുക്കുന്ന മ്യൂസിക് ആൻഡ് ഡാൻസ് പരിപാടിയും തുടർന്ന് ലഘുസാമൂഹ്യനാടകവും അരങ്ങേറുമെന്ന് വികാരി ഫാ. സിറിയക് മഠത്തിൽ സിഎംഐ അറിയിച്ചു.
ഹൊങ്ങസാന്ദ്ര ഫൊറോനാ ദേവാലയത്തിൽ
ബംഗളൂരു: ഹൊങ്ങസാന്ദ്ര തിരുക്കുടുംബ ഫൊറോനാ ദേവാലയത്തിൽ ഇടവക മധ്യസ്ഥരായ തിരുക്കുടുംബത്തിന്റെയും വിശുദ്ധ സെബസ്ത്യാനോസിന്റെയും തിരുനാളിനു തുടക്കമായി. ജനുവരി 26ന് വികാരി റവ.ഡോ. മാത്യു കോയിക്കര സിഎംഐ തിരുനാളിന് കൊടിയേറ്റി. ഇന്നലെ നടന്ന ദിവ്യബലിയിൽ നവവൈദികരായ ഫാ.ജോജി പെരുമ്പള്ളിക്കുന്നേൽ, ഫാ.ജോമോൻ വാഴപ്പിള്ളി എന്നിവർ മുഖ്യകാർമികത്വം വഹിച്ചു. മൂന്നാം തിരുനാൾദിവസമായ ഇന്ന് ഇരിങ്ങാലക്കുട രൂപതാധ്യക്ഷൻ മാർ പോളി കണ്ണൂക്കാടൻ ഇടവകയിലെ നാൽപതോളം കുട്ടികൾക്ക് പ്രഥമദിവ്യകാരുണ്യവും സ്ഥൈര്യലേപനവും നൽകും.
തുടർന്നുള്ള ദിവസങ്ങളിൽ ഫാ. ചെറിയാൻ തുണ്ടുപറമ്പിൽ, ഫാ. സിറിയക് മഠത്തിൽ സിഎംഐ, ഫാ. ജോമോൻ ആനംതുരത്തി, ഫാ. റോയി വട്ടക്കുന്നേൽ, ഫാ. മാത്യു പനയ്ക്കകുഴിയിൽ, മോൺ. ജോർജ് ആലുക്ക, ഫാ. കുര്യൻ പുത്തൻപുരക്കൽ, ഫാ. ബൈജു പൂവത്തുംമൂട്ടിൽ എന്നിവരുടെ മുഖ്യകാർമികത്വത്തിൽ ദിവ്യബലി ഉണ്ടായിരിക്കുന്നതാണ്.
പ്രധാന തിരുനാൾ ദിവസമായ ഫെബ്രുവരി നാലിന് രാവിലെ 9.30ന് ആഘോഷമായ തിരുനാൾ ദിവ്യബലിക്ക് തൊടുപുഴ നാദോപാസന ഡയറക്ടർ ഫാ. കുര്യൻ പുത്തൻപുരയ്ക്കൽ സിഎംഐ മുഖ്യകാർമികത്വം വഹിക്കും. ഫാ. ബൈജു പൂവത്തുംമൂട്ടിൽ വിസി സന്ദേശം നല്കും. 11.30ന് പ്രദക്ഷണവും സമാപനാശീർവാദവും നടക്കും. ഉച്ചയ്ക്ക് 1.30ന് വാർഡ് അടിസ്ഥാനത്തിൽ കലാവിരുന്ന് അരങ്ങേറും. വൈകുന്നേരം അഞ്ചിനു നടക്കുന്ന പൊതുസമ്മേളനത്തിൽ റവ. ഡോ. വർഗീസ് കോളുതറ, ബൊമ്മനഹള്ളി എംഎൽഎ സതീഷ് റെഡ്ഡി, കോർപറേറ്റർ ഭാരതി രാമചന്ദ്ര എന്നിവർ പങ്കെടുക്കും. തുടർന്ന് ഇടവകാംഗങ്ങളുടെ കലാവിരുന്ന്, സാമൂഹ്യനാടകം.
ടി. ദാസറഹള്ളി ദേവാലയത്തിൽ
ബംഗളൂരു: ടി. ദാസറഹള്ളി സെന്റ് ജോസഫ് ആൻഡ് ക്ലാരറ്റ് ദേവാലയത്തിൽ വിശുദ്ധ സെബസ്ത്യാനോസ് സഹദായുടെ തിരുനാൾ ഫെബ്രുവരി രണ്ട്, മൂന്ന്, നാല് തീയതികളിൽ ആചരിക്കും. രണ്ടിന് വൈകുന്നേരം 5.30ന് വികാരി ഫാ. തോമസ് താനിയാനിക്കൽ തിരുനാളിനു കൊടിയേറ്റും. തുടർന്ന് ലദീഞ്ഞ്, ആഘോഷമായ ദിവ്യബലി എന്നിവയ്ക്ക് നാഗസാന്ദ്ര സെന്റ് പോൾസ് സെമിനാരി സുപ്പീരിയർ ഫാ. സെബാസ്റ്റ്യൻ അമ്പാട്ടുകുഴിയിൽ മുഖ്യകാർമികത്വം വഹിക്കും. വികാരി ഫാ. തോമസ് താനിയാനിക്കൽ സഹകാർമികനായിരിക്കും. ഫെബ്രുവരി മൂന്നിന് വൈകുന്നേരം ആറിന് ലദീഞ്ഞ്, ദിവ്യബലി എന്നിവയ്ക്ക് നാഗസാന്ദ്ര ഷേൺസ്റ്റാട്ട് സെമിനാരി സുപ്പീരിയർ ഫാ. ജോയ് പുതുശേരി നേതൃത്വം നൽകും. ഫാ. തോമസ് താനിയാനിക്കൽ സഹകാർമികനായിരിക്കും. തുടർന്നു വീടുകളിലേക്ക് അമ്പ് എഴുന്നെള്ളിപ്പ്. പ്രധാന തിരുനാൾ ദിവസമായ നാലിന് രാവിലെ ഏഴിന് ദിവ്യബലി. തുടർന്ന് ഭവനങ്ങളിലേക്ക് അമ്പെടുക്കൽ. ഉച്ചകഴിഞ്ഞ് മൂന്നിന് ദേവാലയത്തിലേക്ക് അമ്പെടുക്കൽ. വൈകുന്നേരം നാലിന് ആഘോഷമായ തിരുനാൾ ദിവ്യബലിക്ക് ഫാ. മനോജ് കണ്ടത്തിൻകര സിഎംഎഫ് മുഖ്യകാർമികത്വം വഹിക്കും. ബസവനഗർ കഗദാസപുര സെന്റ് മേരീസ് ഇടവക വികാരി ഫാ. ഡേവിസ് പാണാടൻ സിഎംഐ സന്ദേശം നല്കും. വൈകുന്നേരം 6.30ന് ആഘോഷമായ പ്രദക്ഷിണം, ലദീഞ്ഞ്, ആശീർവാദം എന്നിവയ്ക്ക് ഫാ. ലിൻഡോ പുല്ലാട്ട് സിഎംഎഫ് കാർമികനാകും. രാത്രി 8.30ന് ബാൻഡ് മേളം, ശിങ്കാരി മേളം എന്നിവയും നടക്കുമെന്ന് വികാരി ഫാ.തോമസ് താനിയാനിക്കൽ, തിരുനാൾ കമ്മിറ്റി ചെയർമാൻ ജോമോൻ, ട്രസ്റ്റിമാരായ ജോഷി മാത്യു, വർഗീസ് എം. ജോസഫ്, സി.ബി. വിജയ് എന്നിവർ അറിയിച്ചു.
കർമലാരാം ദേവാലയത്തിൽ
ബംഗളൂരു: കർമലാരാം മൗണ്ട് കാർമൽ ദേവാലയത്തിൽ തിരുനാൾ ആഘോഷിച്ചു. പ്രധാന തിരുനാൾ ദിവസമായിരുന്ന ഇന്നലെ വൈകുന്നേരം നാലിന് വികാരി ഫാ. ജേക്കബ് വടക്കേലിന്റെ നേതൃത്വത്തിൽ മാണ്ഡ്യ രൂപതാധ്യക്ഷൻ മാർ ആന്റണി കരിയിലിന് സ്വീകരണം നല്കി. തുടർന്ന് മാർ ആന്റണി കരിയിലിന്റെ മുഖ്യകാർമികത്വത്തിൽ ആഘോഷമായ തിരുനാൾ ദിവ്യബലിയും നൊവേനയും നടന്നു. തുടർന്ന് തിരുസ്വരൂപങ്ങൾ വഹിച്ച് കർമലാരാം തിയോളജി കോളജ് ചാപ്പലിലേക്കും ലദീഞ്ഞിനു ശേഷം തിരിച്ചും പ്രദക്ഷിണം നടന്നു. ബാൻഡ് മേളം, ശിങ്കാരിമേളം എന്നിവയ്ക്കു ശേഷം ഐഡിയ സ്റ്റാർ സിംഗർ ഫെയിംജോബി ജോൺ നയിച്ച സൂപ്പർ മെഗാഷോയും അരങ്ങേറി. ഇന്ന് തിരുനാൾ ദിവ്യബലികളും അമ്പെഴുന്നള്ളിപ്പും മതബോധനകേന്ദ്രം, മാതൃവേദിഎന്നിവയുടെ സംയുക്ത കലാവിരുന്ന്.
ജാലഹള്ളി ദേവാലയത്തിൽ
ബംഗളൂരു: ജാലഹള്ളി സെന്റ് തോമസ് ദേവാലയത്തിൽ തിരുനാളിനു തുടക്കമായി. ഫാ. തോമസ് മണമേൽ സിഎംഎഫ് കൊടിയേറ്റ് കർമം നിർവഹിച്ചു. പ്രധാന തിരുനാൾ ദിവസമായ ഇന്ന് വൈകുന്നേരം 3.45ന് ആഘോഷമായ ദിവ്യബലിക്ക് നവവൈദികനായ ഫാ. മാർട്ടിൻ ഉള്ളോപ്പിള്ളിൽ സിഎംഎഫ് മുഖ്യകാർമികത്വം വഹിക്കും. തുടർന്ന് ആഘോഷമായ പ്രദക്ഷിണവും ചെണ്ടമേളവും നടക്കും.
കസവനഹള്ളി ദേവാലയത്തിൽ
ബംഗളൂരു: കസവനഹള്ളി സെന്റ് നോർബർട്ട് ദേവാലയത്തിൽ ഇടവകമധ്യസ്ഥനായ വിശുദ്ധ നോർബർട്ടിന്റെയും വിശുദ്ധ സെബസ്ത്യാനോസിന്റെയും തിരുനാളിനു തുടക്കമായി. വികാരി ഫാ. സുബാഷ് ചള്ളംകാട്ടിൽ കൊടിയേറ്റ് നിർവഹിച്ചു. പ്രധാന തിരുനാൾ ദിവസമായ ഇന്ന് വൈകുന്നേരം അഞ്ചിന് ആഘോഷമായ തിരുനാൾ ദിവ്യബലിയും തുടർന്ന് ഭക്തിസാന്ദ്രമായ പ്രദക്ഷിണവും നടക്കുമെന്ന് വികാരി ഫാ. സുബാഷ് ചള്ളംകാട്ടിൽ അറിയിച്ചു.