ബംഗളൂരു: സംസ്ഥാനത്തെ എസ്എസ്എൽസി പരീക്ഷ മാർച്ച് 23 മുതൽ ഏപ്രിൽ ആറു വരെ നടക്കും. രാവിലെ 9.30 മുതൽ ഉച്ചയ്ക്ക് 12.30 വരെയും ഉച്ചകഴിഞ്ഞ് രണ്ടു മുതൽ വൈകുന്നേരം 5.15 വരെയുമാണ് പരീക്ഷകൾ നടക്കുന്നത്. മാർച്ച് 31, ഏപ്രിൽ ഒന്ന് തീയതികളിൽ അവധിയായതിനാൽ പരീക്ഷയുണ്ടാവില്ല. ജൂണിയർ ടെക്നിക്കൽ സ്കൂൾ വിദ്യാർഥികൾക്കുള്ള പ്രാക്ടിക്കലും വൈവയും ഏപ്രിൽ ഏഴിന് നടക്കും. പരീക്ഷയുടെ പുതുക്കിയ സമയക്രമം കർണാടക സെക്കൻഡറി എഡ്യുക്കേഷൻ എക്സാമിനേഷൻ ബോർഡ് പ്രസിദ്ധീകരിച്ചിട്ടുണ്ട്.ബോർഡിന്‍റെ kseeb.kar.nic.in എന്ന ഔദ്യോഗിക വെബ്സൈറ്റിലും സമയക്രമം അറിയാൻ സാധിക്കും.
മാർച്ച് 23ന് ഫ‍സ്റ്റ് ലാംഗ്വേജ് (കന്നഡ, തെലുങ്ക്, ഹിന്ദി, മറാത്തി, തമിഴ്, ഉറുദു, ഇംഗ്ലീഷ്, സംസ്കൃതം), 26ന് ഗണിതശാസ്ത്രം, 28ന് സെക്കൻഡ് ലാംഗ്വേജ് (ഇംഗ്ലീഷ്, കന്നഡ), ഏപ്രിൽ രണ്ടിന് ശാസ്ത്രം, നാലിന് തേർഡ് ലാംഗ്വേജ് (ഹിന്ദി, കന്നഡ, ഇംഗ്ലീഷ്, അറബിക്, ഉറുദു, സംസ്കൃതം, കൊങ്കണി, തുളു), ആറിന് സാമൂഹ്യശാസ്ത്രം എന്നിങ്ങനെയാണ് പരീക്ഷ നടക്കുന്നത്.
കഴിഞ്ഞ വർഷം മാർച്ച് 30നാണ് എസ്എസ്എൽസി പരീക്ഷ ആരംഭിച്ചത്. മേയിൽ ഫലം പ്രസിദ്ധീകരിക്കുകയും ചെയ്തു. ഇത്തവണ നിയമസഭാ തെരഞ്ഞെടുപ്പ് നടക്കാനിരിക്കുന്ന സാഹചര്യത്തിൽ പരീക്ഷ നേരത്തെയാക്കുകയായിരുന്നു. ഇത്തവണ വിദ്യാർഥികൾക്ക് ചോദ്യപേപ്പർ വായിക്കുന്നതിനായി 15 മിനിറ്റ് അധികമായി നല്കുമെന്ന് റിപ്പോർട്ടുകളുണ്ട്. കാഴ്ചന്യൂനതയുള്ള വിദ്യാർഥികൾക്ക് ഓരോ വിഷയത്തിനും ഒരുമണിക്കൂർ അധികമായി അനുവദിക്കും.
രണ്ടാംവർഷ പിയു പരീക്ഷ മാർച്ച് ഒന്നിന്
ബംഗളൂരു: രണ്ടാംവർഷ പിയു പരീക്ഷ മാർച്ച് ഒന്നു മുതൽ 17 വരെ നടക്കും. പരീക്ഷയുടെ അന്തിമ സമയക്രമം പ്രസിദ്ധീകരിച്ചിട്ടുണ്ട്. രാവിലെ 10.15 മുതൽ ഉച്ചയ്ക്ക് 1.30 വരെയാണ് പരീക്ഷ. നിയമസഭാ തെരഞ്ഞെടുപ്പ് നടക്കുന്ന സാഹചര്യത്തിലാണ് പിയു പരീക്ഷയും നേരത്തെയാക്കിയത്. വിശദവിവരങ്ങൾ പിയു ഔദ്യോഗിക വെബ്സൈറ്റായ pue. kar.nic.inൽ ലഭ്യമാണ്.