സൂറിച്ച്: കഴിഞ്ഞ വർഷങ്ങളിൽ തികച്ചും വ്യത്യസ്ഥങ്ങളായ കലാസന്ധ്യകളൊരുക്കുന്ന ഭാരതീയ കലാലയം ഈ വർഷവും പുതുമയുമായി ജനുവരി ആറിന് പുതുവർഷ വിരുന്നൊരുക്കുന്നു.
സ്വിറ്റ്സർലൻഡിൽ ഭാരതീയ കലകളെ പരിപോഷിപ്പിക്കുന്നതിനായി 18 വർഷം മുൻപ് ഒരു കൂട്ടം കലാകാരന്മാർ പടുത്തുയർത്തിയ പ്രസ്ഥാനമാണ് ഭാരതീയ കലാലയം. സംഗീതം, നൃത്തം, ചിത്രകല തുടങ്ങി കലകളിൽ സ്വിറ്റ്സർലൻഡിൽ മത്സരങ്ങൾ സംഘടിപ്പിച്ച ഭാരതീയ കലാലയം, ഇളംതലമുറയുടെ സർഗവാസനകൾ പുഷ്ടിപ്പെടുത്തുന്നതിൽ പ്രധാന പങ്കുവഹിച്ചു വരുന്നു.
സ്വിസിന്റെ കലാ സാംസ്കാരിക രംഗത്ത് നക്ഷത്രത്തിളക്കത്തോടെ ശോഭിക്കുന്ന ഭാരതീയ കലാലയത്തിന്റെ പതിനെട്ടാമത് കലാ മഹോത്സവം, സൂറിച്ചിലെ ഉൗസ്റ്റർ പട്ടണത്തിൽ ജനുവരി 6ന് രാവിലെ ഒൻപതിനു കൊടിയേറും. മത്സരങ്ങൾ ഓണ്ലൈനിലൂടെ രജിസ്റ്റർ ചെയ്യാം. കലാമത്സരങ്ങൾക്കു ശേഷം, വൈകിട്ട് നടക്കുന്ന പൊതുസമ്മേളത്തിൽ മുഖ്യ അതിഥിയായി പങ്കെടുക്കുന്ന ഇന്ത്യൻ അംബാസിഡർ സിബി ജോർജ് സമ്മേളനം ഉദ്ഘാടനം ചെയ്യും.
പൊതു സമ്മേളനാന്തരം അരങ്ങേറുന്ന കലാ വിരുന്നിൽ മായാജാല മാന്ത്രികൻ ഗോപി മുതുകാടിന്റെ ജാലവിദ്യ, ശാസ്ത്രം, യുക്തി, വിനോദം തുടങ്ങിയ സമ്മിശ്ര ഭാവങ്ങൾ സംയോജിപ്പിച്ച മോട്ടിവേഷൻ ക്ലാസും, നിഴലാട്ടത്തിന്റെ ആചാര്യൻ പ്രഹ്ളാത് ആചാര്യയുടെം നിഴലാട്ടവും കോർത്തിണക്കി അവതരിപ്പിക്കുന്ന പ്രകടനം കാഴ്ചയുടെ പുതിയ തലങ്ങളിലൂടെ സദസ്യരെ അന്പരപ്പിക്കുമെന്നും, സ്വിസിലെ കലാപ്രതിഭകൾ അണിയിച്ചൊരുക്കുന്ന നൂതന കലാപരിപാടികളും, ഗാനമേളയും, ഉത്സവത്തിനു കൂടുതൽ മിഴിവേകുമെന്നും, കൂടുതൽ വിവരങ്ങൾക്കും, ഓണ്ലൈൻ രജിസ്ട്രേഷനും,www.bharatheeyakalalayam.org എന്ന വെബ്സൈറ്റ് സന്ദർശിക്കാനും സംഘാടകർ അറിയിച്ചു.
റിപ്പോർട്ട്: ജേക്കബ് മാളിയേക്കൽ