ബംഗളൂരു: മാണ്ഡ്യ രൂപത മതബോധന കേന്ദ്രത്തിന്‍റെ ആഭിമുഖ്യത്തിൽ ഹൊങ്ങസാന്ദ്ര ഹോളിഫാമിലി ഇടവകയിൽ നടത്തിയ ബൈബിൾ കലോത്സവത്തിൽ 360 പോയിന്റ് നേടി ബാബുസാപാളയ സെന്‍റ് ജോസഫ് ഇടവക പി.ടി. തോമസ് പുല്ലുകാലായിൽ മെമ്മോറിയിൽ ട്രോഫി കരസ്ഥമാക്കി ജേതാക്കളായി. രണ്ടാം സ്ഥാനം 318 പോയിന്റ് വീതം നേടിയ ധർമാരാം സെന്‍റ് തോമസ് ഫൊറോനയും ഹൊങ്ങസാന്ദ്ര ഹോളി ഫാമിലി ഫൊറോനയും പങ്കിട്ടു.
251 പോയിന്റ് നേടിയ കസവനഹള്ളി സെന്‍റ് നോർബർട്ട് ഇടവകയാണ് മൂന്നാം സ്ഥാനം കരസ്ഥമാക്കിയത്.
എൽപി വിഭാഗത്തിൽ ഏറ്റവും കൂടുതൽ പോയിന്റ് നേടിയ ബാബുസാപാളയ സെന്‍റ് ജോസഫ് ഇടവകയിലെ മീര മറിയം മാത്യുവും യുപി വിഭാഗത്തിൽ ബാബുസാപാളയ സെന്‍റ് ജോസഫ് ഇടവകയിലെ ആഞ്ജലീനാ ജോസഫും ഹൈസ്കൂൾ വിഭാഗത്തിൽ ഉദയനഗർ സെന്‍റ് ജൂഡ് ഇടവകയിലെ നവ്യ ഷാജുവും എച്ച്എസ്എസ് വിഭാഗത്തിൽ ബാബുസാപാളയ സെന്‍റ് ജോസഫ് ഇടവകയിലെ സോണൽ സാബുവും 'ബിബ്ലിയാ സ്റ്റാർ 2017'ന് അർഹരായി.
വിവിധ വിഭാഗങ്ങളിലും കൂടുതൽ പോയിന്റ് നേടിയ ഇടവകകളെ ട്രോഫി നൽകി ആദരിച്ചു. ഒന്നാം വിഭാഗത്തിൽ ബാബുസപാളയ സെന്‍റ് ജോസഫ് ഇടവക, രണ്ടാം വിഭാഗത്തിൽ കസവനഹള്ളി സെന്‍റ് നോർബർട്ട് ഇടവക, മൂന്നാം വിഭാഗത്തിൽ കഗദാസപുര സെന്‍റ് മേരീസ് ഇടവക, നാലാം വിഭാഗത്തിൽ ആനെപാളയ സെന്‍റ് സെബാസ്റ്റ്യൻസ് ഫൊറോന ഇടവക, അഞ്ചാം വിഭാഗത്തിൽ ഡബിൾ റോഡ് സെന്‍റ് അൽഫോണ്സാ ഇടവക എന്നിവർ ടോപ്പേഴ്സ് ട്രോഫിക്ക് അർഹരായി.
ഹൊങ്ങസാന്ദ്ര ഹോളിഫാമിലി ഫൊറോന ദേവാലയത്തിൽ നടന്ന കലോത്സവ സമ്മേളനം രൂപത വികാരി ജനറാൾ റവ.ഡോ. മാത്യു കോയിക്കര സിഎംഐ ഉദ്ഘാടനം ചെയ്തു. ചടങ്ങിൽ മതബോധന കമ്മീഷൻ സെക്രട്ടറി ഫാ. സിറിയക് മഠത്തിൽ സിഎംഐ, ജനറൽ കണ്‍വീനർ ഫാ. സെബാസ്റ്റ്യൻ മഞ്ഞളി സിഎംഐ, രൂപത മതബോധന കമ്മീഷൻ അംഗങ്ങളും പങ്കെടുത്തു.
രൂപതയിലെ 32 ഇടവകയിൽനിന്നുള്ള 1,500ൽപ്പരം മതബോധന വിദ്യാർഥികൾ മൂന്നു ദിവസങ്ങളായി നടന്ന ബൈബിൾ കലോത്സവത്തിൽ പങ്കെടുത്തു. ഒമ്പതു വേദികളിലായി നടന്ന മത്സരങ്ങളിൽ 150ഓളം പേർ വിധികർത്താക്കളായി.
കലോത്സവ സമാപന സമ്മേളനത്തിൽ ബംഗളൂരു യാക്കോബായ സിറിയൻ മെത്രാപ്പോലീത്ത പത്രോസ് മോർ ഒസ്താത്തിയോസ് മുഖ്യാതിഥിയായിരുന്നു. രൂപത വികാരി ജനറാൾ റവ.ഡോ. മാത്യു കോയിക്കര സിഎംഐ അധ്യക്ഷത വഹിച്ചു. രൂപത ചാൻസലർ ഫാ. ജോമോൻ കോലഞ്ചേരി, കമ്മീഷൻ സെക്രട്ടറി ഫാ. സിറിയക് മഠത്തിൽ സിഎംഐ, ജനറൽ കണ്‍വീനർ ഫാ. സെബാസ്റ്റ്യൻ മഞ്ഞളി സിഎംഐ, കമ്മീഷൻ അംഗങ്ങളായ ഫാ. ജോർജ് മൈലാഡൂർ, സിസ്റ്റർ സോളി മരിയ, മാത്യു മാളിയേക്കൽ, ജോസ് വേങ്ങത്തടം, ജയ്സണ്‍ തടത്തിൽ, രൂപത പാസ്റ്ററൽ കൗണ്‍സിൽ ജനറൽ സെക്രട്ടറി മാത്യു മാമ്പ്ര, മുഖ്യ കൈക്കാരൻ ജോഷി ജോസ് എന്നിവർ പ്രസംഗിച്ചു. ബൈബിൾ കലോത്സവ വിജയികൾക്കുള്ള സമ്മാനങ്ങളും ട്രോഫികളും പത്രോസ് മോർ ഒസ്താത്തിയോസ് വിതരണംചെയ്തു.