ലണ്ടൻ: ഗ്രേറ്റ് ബ്രിട്ടൻ രൂപതയുടെ നേതൃത്വത്തിൽ സുവിശേഷവൽക്കരണ ലക്ഷ്യത്തോടെ യുകെയിൽ എട്ടു റീജണുകളിലായി ക്രമീകരിച്ചിരിക്കുന്ന അഭിഷേകാഗ്നി കണ്‍വൻഷനു സമാപനമായി ലണ്ടനിലെ അല്ലിൻസ് പാർക്കിൽ ഒരുക്കിയിരിക്കുന്ന ബൈബിൾ കണ്‍വെൻഷനിലേക്കു തിരുവചനങ്ങൾക്കു കാതോർക്കുവാൻ ഒഴുകിയെത്തുക ആയിരങ്ങൾ. വെസ്റ്റ്മിൻസ്റ്റർ, സൗത്താർക്ക്, ബ്രെൻഡ്വുഡ് തുടങ്ങിയ ചാപ്ലിൻസികളുടെ കീഴിലുള്ള 22 കുർബ്ബാന കേന്ദ്രങ്ങളിൽ നിന്നുമായി മുൻകൂട്ടി ബുക്ക് ചെയ്ത ഡബിൾ ഡക്കർ ബസുകൾ, കോച്ചുകൾ എന്നിവയിലായി വിശ്വാസി സമൂഹം തിരുവചന അഭിഷേകാഗ്നി കണ്‍വൻഷനിലേക്കു എത്തിച്ചേരും.
ജപമാല ഭക്തിയുടെ മാസത്തിൽ പരി. അമ്മയുടെ മാധ്യസ്ഥം വഴിയായി പരിശുദ്ധാല്മ ശുശ്രുഷകളുടെ അനുഗ്രഹീത കാർമ്മികൻ ഫാ.സേവ്യർ ഖാൻ വട്ടായിൽ യുകെയിൽ ഉടനീളം സുവിശേഷ വിരുന്നൊരുക്കുന്പോൾ അത് അത്ഭുത നവീകരണങ്ങളുടെയും, ദൈവ കൃപകളുടെയും അനുഗ്രഹങ്ങളായി മാറുവാൻ രൂപതയിലുടനീളം മദ്ധ്യസ്ഥ പ്രാർത്ഥനകളും, ഉപവാസങ്ങളുമായി വിശ്വാസി സമൂഹം ആല്മീയമായ ഉൗർജ്ജം പകർന്നുവരുന്നു.
അഭിഷേകാഗ്നി കണ്‍വൻഷനിൽ പങ്കു ചേർന്ന് ദൈവീക അനുഭവവും,സ്നേഹവും,വരദാനങ്ങളും പ്രാപിക്കുവാൻ ഫാ.ജോസ് അന്ത്യാംകുളം, ഫാ.സെബാസ്റ്റ്യൻ ചാമക്കാല, ഫാ.ഹാൻസ് പുതിയകുളങ്ങര, ഫാ.മാത്യു കാട്ടിയാങ്കൽ,ഫാ.സാജു പിണക്കാട്ട് എന്നിവർ ഏവരെയും സസ്നേഹം സ്വാഗതം ചെയ്യുന്നു.
ഒക്ടോബർ 29 നു ഞായറാഴ്ച രാവിലെ 9. 30 മുതൽ വൈകുന്നേരം 6 വരെ.
Allianz Park, Greenlands Lanes, Hendon, London NW4 1RL
റിപ്പോർട്ട്: അപ്പച്ചൻ കണ്ണൻചിറ