കോട്ടയം: മികച്ച അധ്യാപകർക്കുള്ള ഈ വർഷത്തെ രാഷ്ട്രപതിയുടെ പുരസ്കാരത്തിന് കുവൈറ്റ് ഇന്ത്യൻ കമ്യൂണിറ്റി സ്കൂൾ പ്രിൻസിപ്പൽ ഡോ. വി. ബിനുമോൻ അർഹനായി. സിബിഎസ്ഇ സ്കൂൾ പ്രിൻസിപ്പൽ വിഭാഗത്തിലാണ് അദ്ദേഹത്തിന്‍റെ പുരസ്കാരനേട്ടം. ന്യൂഡൽഹിയിലെ വിജ്ഞാൻ ഭവനിൽ നടന്ന ചടങ്ങിൽ ഉപരാഷ്ട്രപതി വെങ്കയ്യ നായിഡുവിൽനിന്ന് അദ്ദേഹം പുരസ്കാരം ഏറ്റുവാങ്ങി.
പ്രൈമറി, സെക്കൻഡറി, സീനിയർ സെക്കൻഡറി, കേന്ദ്രീയ വിദ്യാലയ, നവോദയ വിദ്യാലയ, ഐസിറ്റി, സിബിഎസ്ഇ തുടങ്ങിയ വിഭാഗങ്ങളിൽ നിന്ന് ഏറ്റവും മികച്ച പ്രകടനം കാഴ്ചവച്ചവർക്കാണ് അധ്യാപക ദിനത്തോടനുബന്ധിച്ച് രാഷ്ട്രപതിയുടെ അവാർഡുകൾ നൽകുക. 24000ൽ ഏറെ സിബിഎസ്ഇ സ്കൂളുകളിൽനിന്നാണ് ഡോ. വി. ബിനുമോനെ പുരസ്കാരത്തിനു തെരഞ്ഞെടുത്തത്.
8000ൽ അധികം കുട്ടികൾ പഠിക്കുന്ന കുവൈറ്റ്, സാൽമിയയിലെ ഇന്ത്യൻ കമ്മ്യൂണിറ്റി സ്കൂൾ പ്രിൻസിപ്പലും സീനിയർ അഡ്മിനിസ്ട്രേറ്ററുമായ ഡോ. വി. ബിനുമോൻ കോട്ടയം സ്വദേശിയാണ്. സീമയാണ് ഡോ. വി. ബിനുമോന്റെ ഭാര്യ. ശ്രീലക്ഷ്മി, ശ്രീപ്രിയ എന്നിവർ മക്കളാണ്.
സിബിഎസ്ഇ കൗണ്‍സിലർ, സിബിഎസ്ഇ സ്കൂൾ അഫിലിയേഷൻ ഇൻസ്പെക്ഷൻ കമ്മറ്റി മെന്പർ, സ്കൂൾസ് അക്രഡിറ്റേഷൻ പ്രിൻസിപ്പൽ എക്സാമിനർ, സിബിഎസ്ഇ രജിസ്റ്റേർഡ് കൗണ്‍സിലർ, നാഷണൽ ഓപ്പണ്‍ സ്കൂൾ കോഓർഡിനേറ്റർ, പരീക്ഷാ സെൻട്രൽ സൂപ്രണ്ട്, ഐഎസ്ഒ ഓഡിറ്റർ തുടങ്ങിയ സ്ഥാനങ്ങളിൽ പ്രവർത്തിക്കുന്ന ഡോ. ബിനുമോൻ പേഴ്സണാലിറ്റി ട്രെയിനർ, ഹിപ്നോ തെറപ്പിസ്റ്റ് എന്നീ നിലകളിലും ശ്രദ്ധേയനാണ്.