യൂറോപ്യൻ യൂണിയൻ ഹെൽമുട്ട് കോളിനെ ജൂലൈ ഒന്നിന് അനുസ്മരിക്കും
Wednesday, June 21, 2017 6:42 AM IST
ബ്രസൽസ്: യൂറോപ്യൻ ഐക്യത്തിനായി നിലകൊള്ളുകയും യൂറോ പൊതു കറൻസിയുടെ സ്ഥാപനത്തിൽ മുഖ്യപങ്കു വഹിക്കുകയും ചെയ്ത മുൻ ജർമൻ ചാൻസലർ ഹെൽമുട്ട് കോളിനെ അനുസ്മരിക്കാൻ യൂറോപ്യൻ യൂണിയൻ വിപുലമായ പരിപാടി ആസൂത്രണം ചെയ്യുന്നു.

ജൂലൈ ഒന്ന് ശനിയാഴ്ച യൂറോപ്യൻ യൂണിയൻ പാർലമെന്‍റ് ആസ്ഥാനമായ സ്ട്രാസ്ബുർഗിലാണ് മെമ്മോറിയൽ സെറിമണി സംഘടിപ്പിയ്ക്കുന്നത്. ഇതു സംബന്ധിച്ച് ജർമൻ അധികൃതരുമായും കോളിന്‍റെ കുടുംബാംഗങ്ങളുമായും ചർച്ച നടത്തിവരുകയാണെന്ന് യൂറോപ്യൻ കമ്മിഷൻ മേധാവി ഴാങ് ക്ലോദ് ജങ്കർ.

ഴാങ് മോണറ്റ്, ഴാക്ക് ഡെലോഴ്സ് എന്നീ ഫ്രഞ്ചുകാരെ കൂടാതെ യൂറോപ്പിന്‍റെ ഓണററി പൗരത്വം നേടിയ ഏക വ്യക്തിയാണ് കോൾ. യൂറോപ്പിന്‍റെ അടിസ്ഥാനമുറപ്പിക്കുന്നതിൽ അദ്ദേഹം വഹിച്ച പങ്ക് നിർണായകമായിരുന്നു എന്ന് ജുങ്കർ അനുസ്മരണ സന്ദേശത്തിൽ പറഞ്ഞു. ലുഡ്വിഗ്സ്ഹാഫനിലെ സ്വഭവനത്തിൽ ജൂണ്‍ 16 നാണ് കോൾ അന്തരിച്ചത്. സംസ്കാരം പിന്നീട് സ്പയർ നഗരത്തിൽ നടക്കും.

റിപ്പോർട്ട്: ജോസ് കുന്പിളുവേലിൽ
Copyright @ 2022 , Rashtra Deepika Ltd.