ഡോറിസ് ബ്യൂറസ് ഓസ്ട്രിയൻ പ്രസിഡന്റ്
Friday, July 15, 2016 5:07 AM IST
വിയന്ന: കാലാവധി തീർന്നതിനെത്തുടർന്നു സ്‌ഥാനമൊഴിഞ്ഞ ഓസ്ട്രിയൻ പ്രസിഡന്റ് ഹൈൻസ് ഫിഷറിന്റെ പിൻഗാമിയായി പാർലമെന്റ് അധ്യക്ഷ ഡോറിസ് ബ്യൂറസ് കെയർ ടേക്കർ പ്രസിഡന്റ് ആയി സ്‌ഥാനമേറ്റു.

പ്രസിഡന്റിന്റെ കാര്യാലയത്തിൽ ഡോറിസിനൊപ്പം ഉപാധ്യക്ഷന്മാരായ കാൾ ഹൈൻസ് കോപ്ഫ് (ഡെമോക്രാറ്റിക് പാർട്ടി), നൊബേർട്ട് ഹോഫർ (ഫ്രീഡം പാർട്ടി) തുടങ്ങിയവർ ഭരണം നടത്തും.

പ്രസിഡന്റ് തെരഞ്ഞെടുപ്പിലെ ക്രമക്കേടുകൾ രാജ്യത്തെ പരമോന്നത കോടതിയിൽ ചോദ്യം ചെയ്തതിനെത്തുടർന്നാണു മേയിൽ നടന്ന രണ്ടാംഘട്ട തെരഞ്ഞെടുപ്പു ഭരണഘടനാ ബെഞ്ച് അസാധുവായി പ്രഖ്യാപിച്ചത്. ഇതിന്റെ അടിസ്‌ഥാനത്തിൽ പുതിയ തെരഞ്ഞെടുപ്പു തീയതി കണ്ടെത്താൻ ആഭ്യന്തര മന്ത്രാലയത്തോട് ആവശ്യപ്പെട്ടിരുന്നു.

ഓസ്ട്രിയയിലെ കരുത്തരായ 50 വനിതകളുടെ പട്ടികയിൽ ഒന്നാമതാണു ബ്യൂറസിന്റെ സ്‌ഥാനം. രണ്ട് അധ്യക്ഷ പദവികൾ ഒരുമിച്ചു വഹിക്കുന്ന ബ്യൂറസ് സോഷ്യലിസ്റ്റ് പാർട്ടിയിലെ മുതിർന്ന നേതാവുകൂടിയാണ് ഡോറിസ്.

നവംബറിൽ പുതിയ പ്രസിഡന്റ് അധികാരമേൽക്കുന്നതുവരെ മൂന്നംഗ പാർലമെന്ററി സമിതിയായിരിക്കും പ്രസിഡന്റിന്റെ ചുമതലകൾ കൈകാര്യം ചെയ്യുന്നത്. പാർലമെന്റിൽ നടന്ന പ്രൗഡഗംഭീരമായ ചടങ്ങിൽ ഹൈൻസ് ഫിഷർ പ്രസിഡന്റിന്റെ ഔദ്യോഗിക പദവിയിൽനിന്നു വിരമിച്ചു.

<ആ>റിപ്പോർട്ട്: ഷിജി ചീരംവേലിൽ
Copyright @ 2022 , Rashtra Deepika Ltd.