ടോറി നേതൃത്വത്തിലേക്കുള്ള തെരഞ്ഞെടുപ്പ്: തെരേസ മുന്നിൽ, ഫോക്സ് പുറത്ത്
Thursday, July 7, 2016 8:23 AM IST
ലണ്ടൻ: ബ്രിട്ടീഷ് പ്രധാനമന്ത്രി ഡേവിഡ് കാമറോൺ രാജി പ്രഖ്യാപിച്ചിരിക്കുന്ന സാഹചര്യത്തിൽ ടോറി പാർട്ടിയുടെ പുതിയ നേതാവിനെ കണ്ടെത്താനുള്ള തെരഞ്ഞെടുപ്പിന്റെ ആദ്യ ഘട്ടം പിന്നിട്ടു.

ഫസ്റ്റ് വോട്ടിൽ ഹോം സെക്രട്ടറി തെരേസ മേയ്ക്ക് വ്യക്‌തമായ ലീഡ്. അതേസമയം, മുൻ വിദേശകാര്യ സെക്രട്ടറി ലിയാം ഫോക്സ് ആദ്യ ഘട്ടത്തിൽ തന്നെ മത്സരരംഗത്തുനിന്നു പുറത്താകുകയും ചെയ്തു.

329 എംപിമാർ വോട്ടു ചെയ്തതിൽ 165 വോട്ടും കിട്ടിയത് തെരേസയ്ക്കാണ്. രണ്ടാം സ്‌ഥാനത്തെത്തിയത് മറ്റൊരു വനിത, ആൻഡ്രിയ ലീഡ്സം. എന്നാൽ, അവർക്ക് 66 വോട്ടു മാത്രമാണ് ലഭിച്ചത്. ബോറിസ് ജോൺസനെ കാലുവാരി നേരിട്ടു മത്സരിക്കാനിറങ്ങിയ നിയമകാര്യ സെക്രട്ടറി മൈക്കൽ ഗവ് 48 വോട്ടുമായി മൂന്നാം സ്‌ഥാനത്താണ്.

ഇനി മത്സരംഗത്ത് ശേഷിക്കുന്നത് ഈ മൂന്നു പേർ മാത്രമാണ്. ലിയാം ഫോക്സ് 16 വോട്ടു മാത്രം നേടി പുറത്തായപ്പോൾ, 34 വോട്ടുമായി നാലാമനായ സ്റ്റീഫൻ ക്രാബ് മത്സരരംഗത്തുനിന്നു പിൻമാറുകയും ചെയ്തു. അടുത്ത ഘട്ടം വോട്ടെടുപ്പോടെ മത്സരാർഥികൾ രണ്ടായി ചുരുങ്ങും. സെപ്റ്റംബർ ഒൻപതിനേ അന്തിമ ഫലം വരൂ.

<ആ>റിപ്പോർട്ട്: ജോസ് കുമ്പിളുവേലിൽ
Copyright @ 2022 , Rashtra Deepika Ltd.