ഇന്‍ലന്‍ഡ് എമ്പയര്‍ പിക്നിക് അവിസ്മരണീയം
Wednesday, July 22, 2015 4:49 AM IST
ലോസ്ആഞ്ചലസ്: സാന്‍ ബര്‍നാഡിനോ കൌണ്ടി മലയാളി സമൂഹത്തിന്റെ ആഭിമുഖ്യത്തില്‍ ജൂലൈ പതിനൊന്നിനു ശനിയാഴ്ച ഈസ്റ് ഹൈലാന്‍ഡ് റാഞ്ച് അസോസിയേഷന്‍ പാര്‍ക്കില്‍ നടന്ന പിക്നിക്ക് വന്‍ വിജയമായി.

സാന്‍ ബര്‍നാഡിനോയുടെ വിവിധ ഭാഗങ്ങളില്‍നിന്നായി വളരെയധികം പേര്‍ കുടുംബസമേതം പിക്നിക്കില്‍ പങ്കെടുത്തു. ഫാ. ബിജു മണ്ഡപം എസ്.വി.ഡി പ്രാര്‍ത്ഥനാശംസകളോടെ പിക്നിക്കിന്റെ ഉദ്ഘാടനം നിര്‍വഹിച്ചു. പിക്നിക്കിനു നേതൃത്വം നല്‍കിയത് മാത്യു കൊച്ചുപുരയ്ക്കല്‍, ബൈജു വിതയത്തില്‍, സജി കടപ്പാട്ടില്‍ എന്നിവരായിരുന്നു.

പിക്നിക്കിനോടനുബന്ധിച്ച് തടാകത്തില്‍ മീന്‍പിടുത്തം നടത്തിയതു പുതിയ അനുഭവമായിരുന്നു. വിവിധ കായിക മത്സരങ്ങളോടൊപ്പം വോളിബോള്‍, കബഡി മത്സരങ്ങളും ആവേശഭരിതമായിരുന്നു.

ബെന്നി മറ്റപ്പള്ളില്‍, അഖില്‍ പള്ളിപ്പുറത്ത് എന്നിവര്‍ വോളിബോള്‍ മത്സരം നിയന്ത്രിച്ചു. പുരുഷന്മാരുടെ കബഡി കളിയില്‍ ജോതിഷ് പൂതംപാറ, റിന്റോ കുര്യന്‍ എന്നിവരും വനിതകളുടെ കബഡികളിയില്‍ ലാലി മറ്റപ്പള്ളി, മേഴ്സി ജോയ് പൂതംപാറ എന്നിവരും നേതൃത്വം നല്‍കി.

പിക്നിക്കിന്റെ ആദ്യാവസാനംവരെ വിഭവമസൃദ്ധമായ ബാര്‍ബിക്യൂ, കുട്ടികള്‍ക്കുള്ള ഭക്ഷണം, സസ്യേതര വിഭവങ്ങള്‍ എന്നിവ തയാറാക്കിയതു ജോയി കുര്യന്‍, ബിനു ജോസഫ് എന്നിവരുടെ മേല്‍നോട്ടത്തിലായിരുന്നു. സജി പിറവം ദൃശ്യങ്ങള്‍ പകര്‍ത്തി. മാത്യു കൊച്ചുപുരയ്ക്കല്‍, ജോര്‍ജുകുട്ടി പുല്ലാപ്പള്ളില്‍ എന്നിവര്‍ അറിയിച്ചതാണിത്.

റിപ്പോര്‍ട്ട്: ജോയിച്ചന്‍ പുതുക്കുളം
Copyright @ 2022 , Rashtra Deepika Ltd.