ഡോക്ടര്‍ക്ക് ഇംഗ്ളീഷ് വശമില്ലാതിരുന്നതുമൂലം രോഗിയുടെ കാല്‍ നഷ്ടമായി
Wednesday, July 15, 2015 6:30 AM IST
വിയന്ന: ഡോക്ടര്‍ക്ക് ഇംഗ്ളീഷ് വശമില്ലാതിരുന്നതുമൂലം രോഗിയുടെ കാല്‍ നഷ്ടമായി. നിധര്‍ ഓസ്ട്രിയയിലാണു കേസിനാസ്പദമായ സംഭവം നടന്നത്. ഓസ്ട്രിയ കാണാനെത്തിയ ആഫ്രിക്കക്കാരനായ യുവാവ് വലിയ മതിലിനു മുകളില്‍ നിന്നും ചാടിയപ്പോള്‍ കാലിനു ഗുരുതരമായി പരിക്കേല്‍ക്കുകയും ഉടനെ ആശുപത്രിയിലെത്തിച്ച 16 കാരനായ യുവാവിനോട് ഡോക്ടര്‍, കാലില്‍ ഗുരുതരമായ പരിക്കേറ്റിട്ടുണ്ട് ഉടന്‍ ഓപ്പറേഷന്‍ നടത്തണം. അല്ലെങ്കില്‍ കാല്‍ മുറിച്ചുമാറ്റേണ്ടി വരും എന്നു പറഞ്ഞു. ഇംഗ്ളീഷ് മാത്രം അറിയാമായിരുന്ന യുവാവിനു ഡോക്ടര്‍ ജര്‍മന്‍ ഭാഷയില്‍ പറഞ്ഞപ്പോള്‍ മനസിലായത് കാല്‍ മുറിച്ചുമാറ്റാതെ മറ്റു വഴിയൊന്നുമില്ല എന്നാണ്. ഭയന്ന യുവാവ് തന്റെ കാല്‍ മുറിക്കാന്‍ സമ്മതമല്ല എന്നു വ്യക്തമാക്കി. എന്നാല്‍, ദിവസങ്ങള്‍ കഴിഞ്ഞ് ഇംഗ്ളീഷ് അറിയാവുന്ന ഒരു നഴ്സ് വന്നപ്പോഴാണു രോഗിക്കു കാര്യങ്ങള്‍ മനസിലായത്.

പക്ഷേ, അപ്പോള്‍ കാര്യങ്ങള്‍ കൈവിട്ടു പോയിരുന്നു. ഇതിനിടയില്‍ ഒരാഴ്ചക്കാലം കാലിലെ ഒടിവുമൂലം രക്തയോട്ടം നിലച്ചതിനാല്‍ കാല്‍മുട്ടിനു താഴെ മുറിച്ചുമാറ്റേണ്ടി വന്നു. യുവാവിനു നഷ്ടപരിഹാരമായി 36,000 യൂറോ നല്‍കണമെന്നാണ് അദ്ദേഹത്തിന്റെ അഭിഭാഷകന്‍ കോടതിയില്‍ ആവശ്യപ്പെട്ടിരിക്കുന്നത്.

റിപ്പോര്‍ട്ട്: ഷിജി ചീരംവേലില്‍
Copyright @ 2022 , Rashtra Deepika Ltd.