ഓസ്ട്രിയന്‍ പൌരന്മാര്‍ കോടീശ്വരന്മാര്‍
Wednesday, May 27, 2015 6:31 AM IST
വിയന്ന: ഓസ്ട്രിയയില്‍ ജനിക്കുന്ന ഓരോ വ്യക്തിയും അവന്റെ ജീവിതകാലത്ത് കോടീശ്വരന്‍മാരായി ജീവിക്കുന്നു. ഒരു ഓസ്ട്രിയന്‍ പൌരന്‍ തന്റെ ജീവിത കാലത്ത് സമ്പാദിക്കുന്നത് 1.069 മില്യന്‍ യൂറോയാണ്.

അലയന്‍സ് ഗ്രൂപ്പ് പ്രഫഷണലുകളുടെ ഇടയില്‍ നടത്തിയ സര്‍വേയിലാണ് പുതിയ വെളിപ്പെടുത്തലുകള്‍. എന്നാല്‍, 90 ശതമാനം ജോലിക്കാരും സംതൃപ്തരല്ല എന്നതാണു മറ്റൊരുകാര്യം 16 മുതല്‍ 65 വയസുവരെ പ്രായമുള്ളവരുടെ ഇടയിലാണു പഠനം നടത്തിയത്.

31 നും 40 നും ഇടയില്‍ പ്രായമുള്ള ഒരു വ്യക്തിക്കു ഒരു മാസം സുഖമായി ജീവിക്കുവാന്‍ 3,475 യൂറോ വേണം. എന്നാല്‍, 60നു മുകളില്‍ പ്രായമുള്ളവര്‍ക്ക് 2826 യൂറോ കൊണ്ട് ഒരു മാസം സുഖമായി കാര്യങ്ങള്‍ നടത്താം.

സര്‍വേയില്‍ പങ്കെടുത്ത 66 ശതമാനം പേരും അടുത്ത അഞ്ചു വര്‍ഷത്തേക്ക് ഇപ്പോള്‍ ഉള്ളതിനേക്കാള്‍ കൂടുതല്‍ പണം ലഭിക്കില്ലെന്നു വിശ്വസിക്കുന്നവരും 47 ശതമാനം ആള്‍ക്കാര്‍ തങ്ങളുടെ വരുമാനം തീരെക്കുറവാണെന്നു വിശ്വസിക്കുന്നവരുമാണ്. എന്നാല്‍, സര്‍വേയില്‍ പങ്കെടുത്ത നഴ്സുമാരില്‍ 77 ശതമാനവും ഡോക്ടര്‍മാരില്‍ 22 ശതമാനവും രാഷ്ട്രീയക്കാരില്‍ മൂന്നു ശതമാനം പേരും കൂടുതല്‍ ശമ്പളം വേണമെന്ന അഭിപ്രായക്കാരാണ്.

റിപ്പോര്‍ട്ട്: ഷിജി ചീരംവേലില്‍
Copyright @ 2022 , Rashtra Deepika Ltd.