പ്രകടനപത്രിക കല്ലില്‍ കൊത്തിവയ്ക്കാന്‍ മിലിബാന്‍ഡ്
Tuesday, May 5, 2015 8:29 AM IST
ലണ്ടന്‍: ലേബര്‍ പാര്‍ട്ടിയുടെ പ്രകടന പത്രിക എട്ടടി പൊക്കമുള്ള ശിലാഫലകത്തില്‍ കൊത്തിവയ്ക്കുമെന്ന് പാര്‍ട്ടി നേതാവ് എഡ് മിലിബാന്‍ഡ്. താന്‍ പ്രധാനമന്ത്രിയായശേഷം ഇത് ഡൌണിംഗ് സ്ട്രീറ്റ് പൂന്തോട്ടത്തില്‍ സ്ഥാപിക്കണമെന്നാണ് എഡ് മിലിബാന്‍ഡിന്റെ ആഗ്രഹം.

തന്റെയും പാര്‍ട്ടിയുടെയും വാഗ്ദാനങ്ങളെക്കുറിച്ച് തനിക്കു തന്നെ എല്ലാ ദിവസവും ഓര്‍ക്കാനാണ് ഇത്തരത്തില്‍ ഫലകം സ്ഥാപിക്കുന്നതെന്നാണ് മിലിബാന്‍ഡിന്റെ വിശദീകരണം. കണ്‍സര്‍വേറ്റീവ് പാര്‍ട്ടിയും ലിബറല്‍ ഡെമോക്രാറ്റിക് പാര്‍ട്ടിയും നടത്തിയ വാഗ്ദാന ലംഘനങ്ങളെ പരിഹസിക്കാന്‍ കൂടിയാണ് താനിങ്ങനെ ചെയ്യുന്നതെന്നും അദ്ദേഹം വ്യക്തമാക്കുന്നു.

അതേസമയം, തെരഞ്ഞെടുപ്പു അടുക്കുന്തോറും ലേബര്‍ പാര്‍ട്ടിക്ക് സാധ്യതകള്‍ കുറഞ്ഞുവരുന്നതായാണ് അഭിപ്രായ സര്‍വേകളില്‍ വ്യക്തമാകുന്നത്. ഉപാധികള്‍ക്കു വിധേയമായി ടോറികളുമായി സഖ്യം തുടരാമെന്ന് ലിബറല്‍ ഡെമോക്രാറ്റിക് പാര്‍ട്ടി നേതാവ് നിക്ക് ക്ളെഗ് പ്രസ്താവന ഇറക്കുക കൂടി ചെയ്തതോടെ മിലിബാന്‍ഡിനു സ്വന്തം പാര്‍ട്ടി ആസ്ഥാനത്തോ വീട്ടിലെ പൂന്തോട്ടത്തിലോ ഫലകം സ്ഥാപിച്ച് ആശ്വസിക്കാമെന്ന് ഭരണപക്ഷ നേതാക്കള്‍ തിരിച്ചടിക്കുന്നു.

റിപ്പോര്‍ട്ട്: ജോസ് കുമ്പിളുവേലില്‍
Copyright @ 2022 , Rashtra Deepika Ltd.