മാഞ്ചസ്റ്റര്‍ ക്നാനായ പളളിയുടെ പെരുന്നാളിനോടനുബന്ധിച്ചുളള കൊടിയേറ്റ് നടത്തി
Monday, April 6, 2015 8:05 AM IST
മാഞ്ചസ്റര്‍: മേയ് രണ്ട്, മൂന്ന് തീയതികളില്‍ നടക്കുന്ന മാഞ്ചസ്റ്റര്‍ സെന്റ് ജോര്‍ജ് ക്നാനായ പളളിയുടെ പെരുന്നാളിനോടനുബന്ധിച്ചുളള കൊടിയേറ്റ് ഇടവക വികാരി ഫാ. സജി ഏബ്രഹാം കൊച്ചേത്ത് നിര്‍വഹിച്ചു.

സാല്‍ഫോര്‍ഡ് ലിറ്റില്‍ ഹാള്‍ട്ടണില്‍ പുതിയതായി വാങ്ങിയ ദേവാലയത്തിലാണ് ഈസ്റര്‍ കുര്‍ബാനയും തുടര്‍ന്ന് കൊടിയേറ്റും നടന്നത്.

യൂറോപ്പിലെ ക്നാനായക്കാരുടെ സ്വന്തം നാമത്തിലുളള ആദ്യ ദേവാലയം കൂടിയാവുകയാണിത്. മേയ് രണ്ടിനും മൂന്നിനും ഇടവക പെരുന്നാളും പുതിയ പളളിയുടെ കൂദാശയും ഒരുമിച്ചുനടത്തുന്നതിനുളള ഒരുക്കങ്ങള്‍ പൂര്‍ത്തിയായി വരുന്നു. ദേവാലയ കൂദാശയ്ക്കായി സമുദായ മെത്രാപ്പോലീത്താമാരും യൂറോപ്പിലുളള എല്ലാ ക്നാനായ വൈദികരും ചടങ്ങില്‍ സംബന്ധിക്കും. കൂടാതെ യുകെയിലെ മുഴുവന്‍ ക്നാനായ സമൂഹവും ചടങ്ങിനു സാക്ഷ്യം വഹിക്കും.

പുതിയ ദേവാലയത്തിന്റെ ബില്‍ഡിംഗ് ഫണ്ട് ധനശേഖരണാര്‍ഥം നടന്ന റാഫില്‍ ടിക്കറ്റിന്റെ നറുക്കെടുപ്പു നടന്നു. ഒന്നാം സമ്മാനം കൂപ്പണ്‍ നമ്പര്‍: 1069നും രണ്ടാം സമ്മാനം കൂപ്പണ്‍ നമ്പര്‍ : 1079 നും അര്‍ഹരായി. വിജയികള്‍ക്ക് കൂദാശയോടനുബന്ധിച്ച് മേയ് മൂന്നിനു നടന്ന പൊതുസമ്മേളനത്തില്‍ നല്‍കും. വിജയികള്‍ തങ്ങളുടെ കൂപ്പണുമായി ഭാരവാഹികളെ ബന്ധപ്പെടേണ്ടതാണെന്ന് ഇടവക നേതൃത്വം അറിയിച്ചു.

റിപ്പോര്‍ട്ട്: സാബു ചുണ്ടക്കാട്ടില്‍
Copyright @ 2022 , Rashtra Deepika Ltd.