പ്രവാസി മലയാളി ഫെഡറേഷന്‍ ജനങ്ങളുടെ സംഘടന: ഡോ. ജോസ് കാനാട്ട്
Monday, March 2, 2015 8:17 AM IST
ന്യൂയോര്‍ക്ക്: പ്രവാസി മലയാളി ഫെഡറേഷന്‍ (പിഎംഎഫ്) ജനങ്ങളുടെ സംഘടനയാണെന്നും സംഘടനയില്‍ ജാതി-മത-രാഷ്ട്രീയ-വിഘടന വാദങ്ങള്‍ക്കു സ്ഥാനമില്ലെന്നും പ്രവാസി മലയാളി ഫെഡറേഷന്‍ ഗ്ളോബല്‍ ചെയര്‍മാന്‍ ഡോ. ജോസ് കാനാട്ട് പറഞ്ഞു.

മറ്റു മലയാളി സംഘടനകളില്‍നിന്നു വ്യത്യസ്തമായി പിഎംഎഫ് എല്ലാ തുറകളിലുമുള്ള പ്രവാസി മലയാളികളെയും ഒരു കുടക്കീഴില്‍ ചേര്‍ത്തുകൊണ്ട് നല്ല പ്രവര്‍ത്തനം കാഴ്ചവച്ചതിന്റെ തെളിവാണു വളരെ ചെറിയ കാലത്തിനുള്ളില്‍ സംഘടനയ്ക്ക് ലോക പ്രവാസി മലയാളികളുടെ മനംകവര്‍ന്നു വളര്‍ന്നുവരുവാന്‍ സാധിച്ചതെന്നും അദ്ദേഹം കൂട്ടിച്ചേര്‍ത്തു.

പ്രവാസി മലയാളി ഫെഡറേഷന്‍ ഇപ്പോള്‍ അമേരിക്കയില്‍ ശക്തമല്ലെങ്കിലും അധികം താമസിയാതെ മറ്റുള്ള എല്ലാ അമേരിക്കന്‍ മലയാളി സംഘടനകളെക്കാളും ശക്തിയാര്‍ജിച്ചു വരുമെന്നും അദ്ദേഹം പ്രത്യാശിച്ചു. പിഎംഎഫ് ഫോട്ടോകളിലും സ്റേജ് ഷോകളിലും മാത്രമല്ല പ്രവര്‍ത്തിക്കുന്നത്, ജനങ്ങളിലേക്ക് ഇറങ്ങിച്ചെന്ന് അവരുടെ ആവശ്യങ്ങളും ആവലാതികളും അറിഞ്ഞുള്ള പ്രവര്‍ത്തനമാണു സംഘടനയുടെ മുഖ്യലക്ഷ്യമെന്ന് അദ്ദേഹം കൂട്ടിച്ചേര്‍ത്തു.
Copyright @ 2022 , Rashtra Deepika Ltd.