ഭീകരഭീഷണി: ബ്രൌണ്‍ഷ്വൈഗില്‍ കാര്‍ണിവല്‍ പരേഡ് ഉപേക്ഷിച്ചു
Monday, February 16, 2015 10:12 AM IST
ബ്രൌണ്‍ഷ്വൈഗ്: വടക്കന്‍ ജര്‍മനിയിലെ ബ്രൌണ്‍ഷ്വൈഗില്‍ ഭീകരാക്രമണ ഭീഷണിയെത്തുടര്‍ന്ന് കാര്‍ണിവല്‍ പരേഡ് ഉപേക്ഷിച്ചു. എല്ലാ വര്‍ഷവും നടത്താറുള്ള പരേഡ് ഇക്കുറി തുടങ്ങുന്നതിനു 90 മിനിറ്റ് മുമ്പാണ് ഉപേക്ഷിക്കാനുള്ള നിര്‍ദേശം വന്നത്.

ഫെബ്രുവരി 15 ന് ഞായറാഴ്ചയാണ് പരേഡ് നടക്കേണ്ടിയിരുന്നത്. ഇസ്ലാമിസ്റ് ഭീകരരുടെ ആക്രമണമുണ്ടാകുമെന്ന് സ്റേറ്റ് ഇന്റലിജന്‍സിന് വ്യക്തമായ സൂചന ലഭിച്ചതിനെത്തുടര്‍ന്നാണ് പരേഡ് ഉപേക്ഷിക്കാനുള്ള തീരുമാനം കൈക്കൊണ്ടത്. പരേഡില്‍ പങ്കെടുക്കാന്‍ തയാറെടുക്കുന്നവര്‍ വീട്ടില്‍ നിന്നു പുറത്തിറങ്ങേണ്ടെന്നാണ് പോലീസ് നല്‍കിയ നിര്‍ദേശം.

പരേഡില്‍ പങ്കെടുക്കാനുള്ള വേഷങ്ങള്‍ ധരിച്ച പലരും റെയില്‍വേ സ്റേഷനില്‍ എത്തിച്ചേര്‍ന്നിരുന്നു. അവര്‍ നിരാശരായിരിക്കുമെന്നറിയാമെങ്കിലും റിസ്ക് എടുക്കാന്‍ പറ്റിയ സാഹചര്യമല്ലെന്ന് പോലീസ് ഉദ്യോഗസ്ഥര്‍.

ഏകദേശം 2.5 ലക്ഷം പേരാണ് പ്രതിവര്‍ഷം ബ്രൌണ്‍ഷ്വൈഗ് കാര്‍ണിവല്‍ കാണാനെത്താറുള്ളത്. ആറു കിലോമീറ്റര്‍ നീളുന്ന പ്രച്ഛന്നവേഷ പരേഡില്‍ നാലായിരം പേര്‍ വരെ പങ്കെടുക്കുന്നതാണ് പതിവ്.

എന്നാല്‍ കൊളോണ്‍, മൈന്‍സ്, ബോണ്‍, ഡ്യൂസല്‍ഡോര്‍ഫ് എന്നീ നഗരങ്ങളില്‍ തിങ്കളാഴ്ച ആഘോഷങ്ങള്‍ പരമ്പരാഗതമായി പൊടിപൂരമായി നടന്നു.

റിപ്പോര്‍ട്ട്: ജോസ് കുമ്പിളുവേലില്‍
Copyright @ 2022 , Rashtra Deepika Ltd.