വരവേല്‍ക്കാം, ബര്‍ലിനാലെ എത്തി
Friday, February 6, 2015 10:18 AM IST
ബര്‍ലിന്‍: അറുപത്തഞ്ചാം ബര്‍ലിന്‍ ഫിലിം ഫെസ്റിവലിന് വ്യാഴാഴ്ച രാത്രി തുടക്കം കുറിച്ചു. നോബഡി വാണ്‍ട്സ് ദ നൈറ്റ് എന്ന പീരിയഡ് ഡ്രാമ ആയിരുന്നു ഉദ്ഘാടന ചിത്രം. ഇരുപതാം നൂറ്റാണ്ടിന്റെ തുടക്കം പശ്ചാത്തലമാക്കുന്ന ചിത്രം സംവിധാനം ചെയ്തതു സ്പാനിഷ് ഡയറക്ടര്‍ ഇസബേല്‍ കോയിക്സെറ്റ്. ഓസ്കര്‍ ജേതാവ് ജൂലിയറ്റ് ബിനോഷെ മുഖ്യ കഥാപാത്രത്തെ അവതരിപ്പിക്കുന്നു.

ഇക്കുറി ബര്‍ലിന്‍ മേളയില്‍ പ്രദര്‍ശിപ്പിക്കുന്ന നിരവധി സ്ത്രീകേന്ദ്രീകൃത സിനിമകളില്‍ ആദ്യത്തേതായിരുന്നു ഉദ്ഘാടന ചിത്രം. ഉത്തര ധ്രുവത്തിലേക്കു നിരവധി യാത്രകള്‍ സംഘടിപ്പിച്ച സാഹസിക സഞ്ചാരി റോബര്‍ട്ട് പിയറിയുടെ ഭാര്യ ജോസഫൈന്‍ പിയറിയുടെ ജീവിത കഥയാണു നോബഡി വാണ്‍ട്സ് ദ നൈറ്റ് എന്ന സിനിമയില്‍ പ്രതിപാദിക്കുന്നത്.

ഓസ്കര്‍ നാമനിര്‍ദേശം ലഭിച്ചിട്ടുള്ള ജപ്പാന്‍കാരി റിങ്കോ കികൂച്ചി ചിത്രത്തില്‍ മറ്റൊരു സുപ്രധാന സ്ത്രീ കഥാപാത്രത്തെ അവതരിപ്പിക്കുന്നു. ബര്‍ലിനാലെയിലെ ഗോള്‍ഡന്‍ ബെയര്‍ പുരസ്കാരത്തിനായി മത്സരിക്കുന്ന 19 ചിത്രങ്ങളിലൊന്നാണിത്.

റിപ്പോര്‍ട്ട്: ജോസ് കുമ്പിളുവേലില്‍
Copyright @ 2022 , Rashtra Deepika Ltd.