ഇറ്റലിയുടെ വാനമ്പാടി കന്യാസ്ത്രീയുടെ അരങ്ങേറ്റ ആല്‍ബത്തില്‍ മഡോണയുടെ ഗാനം
Wednesday, October 22, 2014 7:37 AM IST
റോം: വോയിസ് ഇറ്റലിയില്‍ ജേതാവായ കന്യാസ്ത്രീ ക്രിസ്റ്റീന സ്കൂച്ചിയയുടെ അരങ്ങേറ്റ ആല്‍ബത്തിന്റെ കവര്‍ പുറത്തിറക്കി. മഡോണയുടെ, ലൈക്ക് എ വിര്‍ജിന്‍ എന്ന പ്രശസ്തമായ പാട്ട് ഇതില്‍ ഉള്‍പ്പെടുത്തിയിരിക്കുന്നു. കന്യാസ്ത്രീകള്‍ തെരഞ്ഞെടുക്കാനിടയില്ലാത്ത പാട്ടാണിതെങ്കിലും, മഡോണയുടേതില്‍നിന്ന് തികച്ചും വ്യത്യസ്ത ആലാപനശൈലിയാണ് ക്രിസ്റീന ഇതില്‍ സ്വീകരിച്ചിരിക്കുന്നത്. 1984ല്‍ മഡോണ ഹിറ്റാക്കിയ പാട്ടാണ് ലൈക്ക് എ വിര്‍ജിന്‍.

മഡോണ ഈ ഗാനചിത്രീകരണത്തിനു തെരഞ്ഞെടുത്ത വെനീസ് തന്നെയാണ് ക്രിസ്റ്റീനയും തെരഞ്ഞെടുത്തിരിക്കുന്നത്. എന്നാല്‍, വിവാഹവേഷത്തിലുള്ള മഡോണയെ സിംഹ വേഷത്തിലുള്ള പുരുഷന്‍ പിന്തുടരുന്ന പോപ് ഗാനത്തിനു പകരം, സഭാവസ്ത്രത്തിലുള്ള ക്രിസ്റീന ഭക്തിഗാനം പാടുന്ന സീനാണ് ചിത്രീകരിച്ചിരിക്കുന്നത്

ഒരു വിവാദവും സൃഷ്ടിക്കാനല്ല ഈ പാട്ട് തെരഞ്ഞെടുത്തിരിക്കുന്നതെന്ന് സിസ്റര്‍ ക്രിസ്റീന. ആളുകളെ നവീകരിക്കാനും ഭൂതകാലത്തില്‍നിന്ന് വീണ്ടെടുക്കാനുമുള്ള സ്നേഹത്തിന്റെ കഴിവിനെക്കുറിച്ചാണ് പാട്ടില്‍ വിശദീകരിക്കുന്നത് എന്നു താന്‍ വ്യാഖ്യാനിക്കുന്നു എന്നും അവര്‍ പറയുന്നു.

നവംബര്‍ പതിനൊന്നിന് റിലീസ് ചെയ്യുന്ന ആല്‍ബത്തിലെ ഒരു ട്രാക്ക് മാത്രമായിരിക്കും ഈ ഗാനം. മറ്റ് ഒമ്പത് പ്രശസ്തമായ പോപ് ഗാനങ്ങള്‍ കൂടി ഇതില്‍ ഉള്‍പ്പെടും.

റിപ്പോര്‍ട്ട്: ജോസ് കുമ്പിളുവേലില്‍
Copyright @ 2022 , Rashtra Deepika Ltd.