പ്രസ്റനില്‍ ദുക്റാന തിരുനാള്‍ ആഘോഷിച്ചു
Thursday, July 3, 2014 9:39 AM IST
പ്രസ്റന്‍: ലങ്കാസ്റര്‍ രൂപതയിലെ പ്രസ്റന്‍ സീറോ മലബാര്‍ വിശ്വാസി കൂട്ടായ്മ ദുക്റാന തിരുനാള്‍ ആഘോഷിച്ചു. തിരുനാളില്‍ പങ്കു ചേരുവാന്‍ എത്തിയ ലങ്കാസ്റര്‍ രൂപതാധ്യക്ഷന്‍ മൈക്കില്‍ കാംപ് ബെല്‍ പിതാവിനെ പാരീഷ് കമ്മിറ്റി അംഗങ്ങള്‍ ചേര്‍ന്ന് സ്വീകരിച്ചാനയിച്ചു. ആഘോഷപൂര്‍വമായ തിരുനാള്‍ കുര്‍ബാനക്ക് സീറോ മലബാര്‍ സഭാ ചാപ്ളെയിന്‍ റവ. ഫാ. മാത്യു ചൂരപൊയ്കയില്‍ കാര്‍മികത്വം വഹിച്ചു.

ബിഷപ് മൈക്കില്‍ കാംപ്ബെല്‍ തിരുനാള്‍ സന്ദേശം നല്‍കി. സഭാ പിതാവായ മാര്‍ത്തോമ ശ്ളീഹായില്‍ നിന്നും ആര്‍ജിച്ച വിശ്വാസവും പാരമ്പര്യവും ആചാരവും പൈതൃകവും കാത്തു സൂക്ഷിക്കുന്ന വിശ്വാസി സമൂഹത്തെ ബിഷപ് പ്രത്യേകം അഭിനന്ദിച്ചു.

ലദീഞ്ഞും വാഴ്വിനും ശേഷം വിശുദ്ധ കുര്‍ബാനയുടെ ആശീര്‍വാദത്തോടെ തിരുക്കര്‍മ്മങ്ങള്‍ സമാപിച്ചു. നേര്‍ച്ച വിതരണത്തിനുശേഷം പാരീഷ് ഹാളില്‍ പ്രസ്റണ്‍ പാരീഷ് കുടുംബാംഗങ്ങള്‍ ബിഷപ്പും ഒത്ത് തിരുനാള്‍ സൌഹൃദം പങ്കിട്ടു. തുടര്‍ന്ന് ചായ സത്കാരവും നടത്തി.

ഈയിടെ പ്രസ്റനില്‍ നിര്യാതനായ പാരീഷ് മെംബര്‍ ജോണ്‍സണ്‍ ജോസഫിനോടുള്ള ആദര സൂചകമായി ലളിതമായ രീതിയിലാണ് തിരുനാള്‍ ആഘോഷിച്ചത്.

റിപ്പോര്‍ട്ട്: അപ്പച്ചന്‍ കണ്ണഞ്ചിറ
Copyright @ 2022 , Rashtra Deepika Ltd.