Home   | Editorial   | Latest News   | Local News   | Kerala   | National   | International   | Business   | Sports   | Obituary   | NRI News   | Movies   | Health
June 21, 2018
 
 
    
 
Print this page
 

നന്മ ചെയ്തിട്ടും തിന്മ സംഭവിക്കുമ്പോള്‍

നന്മ ചെയ്തിട്ടും തിന്മ മാത്രം ഫലം. തന്റെ കുടുംബക്കാരും ഗോത്രക്കാരുമൊക്കെ സത്യദൈവത്തെ ഉപേക്ഷിച്ചു വിഗ്രഹാരാധനയുടെ പുറകെ പോയപ്പോഴും തോബിത്ത് മാത്രം വിശ്വാസം വെടിഞ്ഞില്ല. എങ്കിലും തോബിത്ത് മറ്റ് ഇസ്രയേല്‍ക്കാരോടൊപ്പം ബി.സി. 721-ല്‍ നിനിവേയിലേക്ക് അടിമയായി കൊണ്ടുപോകപ്പെട്ടു.

നിനിവേയിലെത്തിയ തോബിത്തിന്റെ ഭാഗ്യം ആദ്യം അല്പം തെളിഞ്ഞു. അദ്ദേഹം രാജകൊട്ടാരത്തിലെ ഒരു പ്രധാന സേവകനായി മാറി. എന്നാല്‍, അദ്ദേഹം മരിച്ചവരെ സംസ്‌കരിക്കുന്ന പുണ്യപ്രവൃത്തി ചെയ്യുവാന്‍ തുടങ്ങിയപ്പോള്‍ ദുരന്തങ്ങള്‍ ഒന്നിനു പുറകെ ഒന്നായി അദ്ദേഹത്തെ വേട്ടയാടാന്‍ തുടങ്ങി.

അക്കാലത്തു നിനിവേയിലെ രാജാവായിരുന്ന സെന്നാക്കരിബ് അകാരണമായി പല യഹൂദരെയും വധിച്ചപ്പോള്‍ തോബിത്തായിരുന്നു അവരുടെ മൃതശരീരങ്ങള്‍ രഹസ്യമായി കൊണ്ടുപോയി സംസ്‌കരിച്ചിരുന്നത്. ഇക്കാര്യം അറിയാനിടയായ രാജാവ് തോബിത്തിനെ വധിക്കാന്‍ ഉത്തരവിട്ടു. രാജാവിന്റെ ഉത്തരവു കേട്ടറിഞ്ഞ തോബിത്ത് ജീവനുംകൊണ്ട് ഓടി രക്ഷപ്പെട്ടു.

അപ്പോള്‍ തോബിത്തിന്റെ വസ്തുവകകള്‍ കണ്ടുകെട്ടാന്‍ രാജവിധിയുണ്ടായി. തോബിത്തിന്റെ സകലസമ്പത്തും രാജകിങ്കരന്മാര്‍ കൊള്ളയടിച്ചു. ഈ സംഭവം നടന്ന് അധികം താമസിയാതെ സെന്നാക്കരിബ് രാജാവിനെ അദ്ദേഹത്തിന്റെ രണ്ടു പുത്രന്മാര്‍കൂടി കൊലപ്പെടുത്തി.

സെന്നാക്കരിബിന്റെ മരണശേഷം തോബിത്ത് ഒളിവില്‍നിന്നു വീട്ടില്‍ മടങ്ങിയെത്തി. വീണ്ടും കുറച്ചു കാലത്തേക്കു തോബിത്തിനു നല്ല കാലമായിരുന്നു. തോബിത്തിന്റെ ഒരു സഹോദരപുത്രന്‍ പുതിയ രാജാവിന്റെ ഒരു പ്രധാന സേവകനായിരുന്നു. അയാളുടെ സ്വാധീനംമൂലം തോബിത്തിനു പണ്ടു നഷ്ടപ്പെട്ട വസ്തുവകകള്‍ തിരികെക്കിട്ടി.

എന്നാല്‍, തോബിത്തിനു വീണ്ടും കഷ്ടകാലം വരാന്‍ ഏറെ താമസമുണ്ടായില്ല. ഒരുദിവസം വഴിയില്‍ കാണാനിടയായ ഒരു മൃതദേഹം എടുത്തുകൊണ്ടുപോയി സംസ്‌കരിച്ചശേഷം വീട്ടില്‍വന്ന് അന്തിയുറങ്ങുമ്പോള്‍ അദ്ദേഹത്തിന്റെ കാഴ്ച നഷ്ടപ്പെട്ടു. അദ്ദേഹം ഉറങ്ങുമ്പോള്‍ ഏതോ ഒരു പക്ഷിയുടെ കാഷ്ഠം വീണാണത്രേ കാഴ്ച നഷ്ടപ്പെട്ടത്.

തന്റെ കാഴ്ചശക്തി വീണ്ടുകിട്ടാന്‍വേണ്ടി തോബിത്ത് പല വൈദ്യന്മാരെയും സമീപിച്ചു. പക്ഷേ, അതുകൊണ്ട് ഒരു പ്രയോജനവുമുണ്ടായില്ല. കാഴ്ചശക്തി നഷ്ടപ്പെട്ട തോബിത്ത് വളരെ വിഷമിച്ചാണു പിന്നീട് തന്റെ ജീവിതം തള്ളിനീക്കിയത്. ഇതിനിടയില്‍ അദ്ദേഹത്തിന്റെ ഭാര്യ അന്നയാണ് ജോലിചെയ്തു കുടുംബം പുലര്‍ത്തിയത്.

ഒരു ദിവസം അന്നയുടെ ജോലിക്കു പ്രതിഫലമായി കിട്ടിയ ഒരു ആട്ടിന്‍കുഞ്ഞിനെച്ചൊല്ലി തോബിത്തും അന്നയും തമ്മില്‍ വലിയ വഴക്കുണ്ടായി. അന്ന ആ ആട്ടിന്‍കുഞ്ഞിനെ മോഷ്ടിച്ചതാണെന്നാണു തോബിത്ത് കരുതിയത്. തന്മൂലം, ആട്ടിന്‍കുഞ്ഞിനെ എത്രയുംവേഗം അതിന്റെ ഉടമസ്ഥനു തിരിച്ചേല്‍പ്പിക്കാന്‍ തോബിത്ത് അന്നയോട് ആവശ്യപ്പെട്ടു.

തോബിത്തിന്റെ ഉപദേശം കേട്ടപ്പോള്‍ അന്നയും വിട്ടുകൊടുത്തില്ല. ഭര്‍ത്താവിന്റെ പുണ്യപ്രവൃത്തികള്‍ക്കൊക്കെ എവിടെഫലം എന്ന് അവര്‍ പരിഹസിച്ചു.

ദുഃഖങ്ങള്‍ക്കു പിന്നാലെ ഭാര്യയുടെ പരിഹാസവുംകൂടിയായപ്പോള്‍ തോബിത്തിന്റെ മനസുമടുത്തു. ജീവിക്കാനുള്ള ആശപോലും അദ്ദേഹത്തിനു നഷ്ടപ്പെട്ടു. മുട്ടിന്മേല്‍നിന്നു കണ്ണുനീരോടുകൂടി അദ്ദേഹം ദൈവത്തോട് ഇപ്രകാരം പ്രാര്‍ഥിച്ചു:

'ദൈവമേ, അങ്ങു നീതിമാനാകുന്നു. അങ്ങയുടെ വഴികള്‍ കാരുണ്യവും സത്യവും നിറഞ്ഞതത്രേ... ദൈവമേ, എന്റെ ജീവന്‍ അങ്ങു തിരികെ എടുക്കേണമേ. ഞാന്‍ മണ്ണിനോടു മണ്ണായിച്ചേരട്ടെ. ഞാന്‍ ജീവിക്കുന്നതിലും നല്ലതു മരിക്കുന്നതാകുന്നു. ഞാന്‍ സഹിച്ചുമടുത്തു, ദൈവമേ.

നീതിമാനും സത്യനിഷ്ഠനുമായിരുന്നു തോബിത്ത്. ദൈവപ്രമാണങ്ങള്‍ പാലിക്കുന്നതില്‍ എന്നും ശ്രദ്ധാലുവുമായിരുന്നു അദ്ദേഹം. പുണ്യപ്രവൃത്തികള്‍ ചെയ്യുന്നതിലും അദ്ദേഹം ഒരിക്കലും പിന്നിലായിരുന്നില്ല. എങ്കിലും ദുഃഖങ്ങളും ദുരിതങ്ങളും നിറഞ്ഞതായിരുന്നു അദ്ദേഹത്തിന്റെ ജീവിതം.

തന്റെ ജീവനെ തിരികെ എടുക്കണേ എന്ന തോബിത്തിന്റെ പ്രാര്‍ഥന ദൈവം കേട്ടോ? ദൈവത്തിനു തോബിത്തിനെക്കുറിച്ചു വേറെ പ്ലാനുണ്ടായിരുന്നു. അവിടുന്നു തോബിത്തിന് കാഴ്ച തിരികെ നല്‍കി. അതുപോലെ, ഒരു മാലാഖയെ അയച്ച് ദൈവം തോബിത്തിന്റെ ജീവിതം വീണ്ടും സന്തോഷപൂര്‍ണമാക്കി മാറ്റുവാന്‍ സഹായിച്ചു.

ജീവിതത്തില്‍ ദുഃഖദുരിതങ്ങള്‍ ഒന്നിനുപുറകെ ഒന്നായി കടന്നുവരുമ്പോള്‍ തോബിത്തിനെപ്പോലെ 'ദൈവമേ, എന്റെ ജീവനെ തിരികെ എടുക്കേണമേ എന്നു നാമും പ്രാര്‍ഥിച്ചുപോയെന്നിരിക്കും. എന്നാല്‍, അങ്ങനെ പ്രാര്‍ഥിക്കുവാനിടയായാല്‍പ്പോലും ദൈവത്തിലുള്ള നമ്മുടെ ശരണവും വിശ്വാസവും ഒരിക്കലും കൈവെടിയരുത്. നമ്മുടെ ദുഃഖങ്ങള്‍ക്കിടയിലും ദൈവമേ, അവിടുത്തെ തിരുവിഷ്ടം നിറവേറട്ടെ എന്ന് ആത്മാര്‍ഥമായി പറയുവാന്‍ ശ്രദ്ധിക്കണം.

ദൈവത്തിന്റെ തിരുവിഷ്ടം നമ്മുടെ നന്മതന്നെ ആയിരിക്കും എന്നതില്‍ ഒരിക്കലും സംശയം വേണ്ട. നാം നന്മ ചെയ്യുമ്പോഴും തിന്മയാണു നമുക്കു സംഭവിക്കുന്നതെങ്കില്‍ നിരാശപ്പെടേണ്ട. ദൈവത്തിന്റെ പരിപാലനയില്‍ എല്ലാം നമ്മുടെ നന്മയ്ക്കായിത്തീര്‍ന്നുകൊള്ളും എന്ന വിശ്വാസത്തോടെ നാം ധൈര്യപൂര്‍വം മുന്നോട്ടുപോയാല്‍ മതി. തീര്‍ച്ചയായും ദൈവം നമ്മുടെ രക്ഷയ്ക്ക് ഓടിയെത്തിക്കൊള്ളും.

ബൈബിളില്‍ നാം വായിക്കുന്ന തോബിത്തിന്റെ കഥ വെറും ഒരാളുടെ കഥയല്ല. ആ കഥ ഒരു പരിധിവരെ നമ്മുടെയും കഥയാണ്. നമ്മുടെ ദുഃഖങ്ങളുടെയും ആ ദുഃഖങ്ങളില്‍ നമ്മെ സഹായിക്കുവാന്‍ ഓടിയെത്തുന്ന ദൈവത്തിന്റെയും കഥ.

ദൈവത്തില്‍ വിശ്വാസമര്‍പ്പിക്കുന്നവനെ ദൈവം ഒരിക്കലും കൈവെടിയുകയില്ല. നാം നന്മ ചെയ്തിട്ടും തിന്മയാണു നമുക്കു സംഭവിക്കുന്നതെങ്കില്‍ അതു ദൈവത്തിന്റെ തിരുവിഷ്ടമായി കണ്ടുകൊണ്ട് ധൈര്യപൂര്‍വം നമുക്കു മുന്നോട്ടു പോകാം. അപ്പോള്‍ തീര്‍ച്ചയായും അവിടുന്നു തന്റെ പരിപാലനയില്‍ നമ്മെ വഴിനടത്തിക്കൊള്ളും. അങ്ങനെ ദൈവം കാണിച്ചുതരുന്ന വഴിയിലൂടെയാണു നാം നടക്കുന്നതെങ്കില്‍ നമ്മുടെ ജീവിതം വിജയമണിയുമെന്നതില്‍ സംശയം വേണ്ട. ഹ

 


 
    
 
To send your comments, please click here
 
 
Rashtra Deepika LTD
Copyright @ 2018 , Rashtra Deepika Ltd.