ന്യൂഡൽഹി: ആഭ്യന്തര വാഹനവിപണയിൽ യാത്രാവാഹനങ്ങളുടെ വില്പനയിൽ 14.29 ശതമാനം വർധന. 2016 നവംബറിൽ 2,40,983 വാഹനങ്ങൾ വിറ്റ സ്ഥാനത്ത് പോയ മാസം 2,75,417 വാഹനങ്ങൾ നിരത്തിലിറങ്ങി. വാഹനനിർമാതാക്കളുടെ സംഘടനയായ സൊസൈറ്റി ഓഫ് ഇന്ത്യൻ ഓട്ടോമാബൈൽ മാനുഫാക്ചറേഴ്സ് (സിയാം) ഇന്നലെ പുറത്തുവിട്ട റിപ്പോർട്ടിലാണ് വില്പന ഉയർന്നതായി രേഖപ്പെടുത്തിയിരിക്കുന്നത്.
ആഭ്യന്തര കാർ വില്പന 4.49 ശതമാനം ഉയർന്ന് 1,81,395 ആയി. തലേ വർഷം 1,73,607 എണ്ണമായിരുന്നു. ഏപ്രിൽ-നവംബർ കാലഘട്ടത്തിൽ യാത്രാ, കൊമേഴ്സൽ, മുച്ചക്ര, ഇരുചക്ര വിഭാഗങ്ങളിലായി ആകെ 1,94,86,412 വാഹനങ്ങൾ നിർമിച്ചു. തലേ വർഷം ഇത് 1,78,18,193 ആയിരുന്നു. വളർച്ച 9.36 ശതമാനം.
യാത്രാവാഹനങ്ങളിൽ കാറുകൾ, യൂട്ടിലിറ്റി വെഹിക്കിൾ, വാൻ വിഭാഗങ്ങളിലെ വില്പന യഥാക്രമം 4.69 ശതമാനം, 19.95 ശതമാനം, 4.69 ശതമാനം ഉയർന്നു.
അതേസമയം, കൊമേഴ്സൽ വാഹനങ്ങളുടെ ആകെ വില്പന 10.60 ശതമാനം ഏപ്രിൽ-നവംബർ കാലയളിൽ ഉയർന്നു. മീഡിയം ആൻഡ് ഹെവി വിഭാഗത്തിൽ 1.19 ശതമാനവും ലൈറ്റ് കൊമേഴ്സൽ വാഹന വിഭാഗത്തിൽ 17.07 ശതമാനവുമാണ് വളർച്ച.
മുച്ചക്രവാഹനങ്ങളുടെ വില്പന 1.32 ശതമാനവും ഇരുചക്രവാഹനങ്ങളുടെ വില്പന 9.61 ശതമാനവും ഉയർന്നു.