ജി​യോ പണി തുടങ്ങി; വാലിഡിറ്റിയും സ്പീഡും വെട്ടി, നിരക്ക് കൂട്ടി

സൗജന്യത്തിനും ഓഫറുകൾക്കും ശേഷം റിലയൻസ് ജിയോ ഇൻഫോകോം ഡാറ്റാ പായ്ക്കുകളുടെ നിരക്കുയർത്തി. ഒപ്പം ഡാറ്റാ സ്പീഡിലും വെട്ടിക്കുറയ്ക്കൽ നടത്തിയിട്ടുണ്ട്.

ഏറെ ജനപ്രീതി ലഭിച്ച 399 രൂപയുടെ ഡാറ്റാ പായ്ക്ക് പരിഷ്കരിച്ചതാണ് പുതിയ നിരക്കിലെ ഏറ്റവും ശ്രദ്ധേയം. 399 രൂപയ്ക്കു ലഭിച്ച ഡാറ്റ പായ്ക്ക് ലഭിക്കാൻ ഇനിമുതൽ 459 രൂപ നല്കണം. ഉപയോക്താക്കൾക്ക് തിരിച്ചടി നല്കി മറ്റൊരു മാറ്റംകൂടി പുതിയ നിരക്കിലുണ്ട്. ദിവസേന ഒരു ജിബി വീതം 56 ദിവസത്തേക്ക് ഉപയോഗിക്കാവുന്ന 309 രൂപയുടെ പായ്ക്ക് ഉപേക്ഷിച്ചു. ഇനി മുതൽ ഏറ്റവും കുറഞ്ഞ റീചാർജ് പായ്ക്ക് 399 രൂപയാണ്.

വേഗം കുറച്ചു

ദിവസേന 128 കെബിപിഎസ് വേഗത്തിലുള്ള ഇന്‍റർനെറ്റ് സേവനം നല്കിയ സ്ഥാനത്ത് 64കെബിപിഎസ് ആയി കുറച്ചു. കഴിഞ്ഞയാഴ്ച പ്രഖ്യാപിച്ച കാഷ്ബാക്ക് ഓഫറിനു ശേഷമുള്ള നിരക്കുമാറ്റമാണിത്.

പോസ്റ്റ് പെയ്ഡ് വരിക്കാർക്ക്

വാലിഡിറ്റി കുറച്ചതാണ് പോസ്റ്റ് പെയ്ഡ് വരിക്കാർക്കു നല്കിയ ഇരുട്ടടി. ഇനി മുതൽ 30 ദിവസത്തെ ബില്ലിംഗ് ആയിരിക്കും. നേരത്തേ മൂന്നു മാസം കൂടുന്പോഴായിരുന്നു ബിൽ നല്കിയിരുന്നത്. കൂടാതെ, ഇനിമുതൽ പോസ്റ്റ് പെയ്ഡ് വരിക്കാരിൽനിന്ന് സെക്യൂരിറ്റി ഡെപ്പോസിറ്റ് വാങ്ങുകയും ചെയ്യും. ദിവസേനയുള്ള ഇന്‍റർനെറ്റ് വേഗം 64 കെബിപിഎസ്. ജിയോയുടെ പുതിയ പോസ്റ്റ് പെയ്ഡ് പ്ലാനുകളും വിവരങ്ങളും പട്ടികയിൽ.

പ്രീ പെയ്ഡ് വരിക്കാർക്കും പൊള്ളും

പ്രീ പെയ്ഡ് വരിക്കാരുടെ പായ്ക്കുകളുടെ നിരക്കുയർത്തുകയും കാലാവധി വെട്ടിക്കുറയ്ക്കുകയും ചെയ്തു. 399 രൂപയ്ക്ക് 84 ദിവസത്തെ കാലാവധി നല്കിയിരുന്നത് 70 ദിവസമായി വെട്ടിക്കുറച്ചു.

459 രൂപയുടെ പ്ലാൻ ഉപയോഗിച്ചാൽ 84 ദിവസത്തെ കാലാവധി ലഭിക്കും. 509 രൂപയ്ക്ക് 56 ദിവസം കാലാവധി നല്കിയിരുന്നത് 49 ദിവസമായും വെട്ടിക്കുറച്ചിട്ടുണ്ട്.

എന്നാൽ, വലിയ തുകകളുടെ 999, 1,999, 4,999 രൂപയുടെ പ്ലാനുകൾക്ക് കാലാവധിയിൽ മാറ്റമില്ല. യഥാക്രമം 90, 180, 360 ദിവസങ്ങളാണ് ഈ പ്ലാനുകളുടെ കാലാവധി. എന്നാൽ, ഡാറ്റയുടെ അളവ് വെട്ടിക്കുറച്ചിട്ടുണ്ട്. 999 രൂപയ്ക്ക് 90 ജിബി ഡാറ്റ നല്കിയിരുന്നത് 60 ജിബി ആയി വെട്ടിക്കുറച്ചു.

1999 രൂപയുടെ പ്ലാനിൽ 155 ജിബി ഡാറ്റയിൽനിന്ന് 125 ജിബിയായും 4,999 രൂപയുടെ പ്ലാനിൽ 380 ജിബിയിൽനിന്ന് 350 ജിബിയായും കുറച്ചു.