കുളമല്ലിത്, പത്തനംതിട്ട ബസ് സ്റ്റാൻഡ്; വൈറലായി ഹ്രസ്വചിത്രം

Thursday, June 14, 2018 2:35 PM IST

കാലവർഷത്തിൽ തകർന്നുകിടക്കുന്ന പത്തനംതിട്ട മുനിസിപ്പൽ ബസ്‌ സ്റ്റാൻഡിൽ നടക്കുന്ന ഒരു സംഭവത്തെ അടിസ്ഥാനമാക്കി നിർമിച്ച "ഒരു ബസ് സ്റ്റാൻഡ് കഥ’ എന്ന ഹ്രസ്വചിത്രം വൈറലാകുന്നു. ബസ് സ്റ്റാൻഡിലിറങ്ങിയ ഒരാളുടെ 2000 നോട്ടിന്‍റെ കെട്ട് കാണാതെപോകുന്നതോടെ തുടങ്ങുന്ന കഥയിൽ ആനുകാലിക രാഷ്ട്രീയ സംഭവ വികാസങ്ങളും ചർച്ച ചെയ്യുന്നു.

എംപി, എംഎൽഎ, മുനിസിപ്പാലിറ്റി ഇവരിൽ ആരെങ്കിലും ബസ് സ്റ്റാൻഡ് നന്നാക്കണമെന്നും ജനങ്ങൾക്ക് സുഗമമായി യാത്ര ചെയ്യാൻ എന്നാണ് കഴിയുന്നതെന്ന ആശങ്ക പങ്കുവയ്ക്കുന്ന ഈ രണ്ടു മിനിട്ട് ചിത്രം പിറ്റിഎ മീഡിയ ഓണ്‍ലൈൻ പേജിൽ ആണ് റിലീസ് ചെയ്തത്.

"ഒരു ബസ് സ്റ്റാൻഡ് കഥ’ ഇതിനോടകം 13000 പേർ കണ്ടുകഴിഞ്ഞു.കാർട്ടൂണിസ്റ്റ് ഷാജി മാത്യുവിന്‍റെ കഥയിൽ കലാസ്റ്റാർ കബീർ, അജിത് ചെങ്ങറ, റാഷിദ്, റെജി ഫോട്ടോഷോപ്പ് എന്നിവരാണ് അഭിനയിച്ചിരിക്കുന്നത്. ‌

മുമ്പ് ഈ ബസ് സ്റ്റാന്‍റിന്‍റെ ശോചനീയാവസ്ഥയെകുറിച്ച് ഫേസ്ബുക്കിൽ പോസ്റ്റിട്ട ഇലന്തൂർ സ്വദേശി സൂരജിനെ പോലീസ് അറസ്റ്റ് ചെയ്തിരുന്നു. തന്നെ അപകീർത്തിപ്പെടുത്തുവാൻ ശ്രമിക്കുകയാണെന്ന സ്ഥലം എംഎൽഎ വീണ ജോർജിന്‍റെ പരാതിയെ തുടർന്നായിരുന്നു ഈ നടപടി.

സംഭവം മാധ്യമങ്ങളിൽ വാർത്തയായതോടെ എംഎൽഎയ്ക്കെതിരേ വൻ പ്രതിഷേധമായിരുന്നു സോഷ്യൽമീഡിയയിൽ ഉയർന്നത്. ഇതിനു പിന്നാലെയാണ് ബസ് സ്റ്റാന്‍റിന്‍റെ ശോചനീയാവസ്ഥ ചൂണ്ടിക്കാട്ടിയുള്ള ഹ്രസ്വചിത്രം സാമൂഹ്യമാധ്യമങ്ങളിൽ വ്യാപകമായി പ്രചരിക്കുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.