ബിഗ് സല്യൂട്ട്..! കേരളത്തിന്‍റെ മാലാഖ ലിനിക്ക് അന്താരാഷ്ട്ര മാസികയുടെ ആദരം

Monday, June 4, 2018 5:01 PM IST

നിപ്പാ വൈറസ് മരണംവിതച്ച പേരാമ്പ്രയിൽ രോഗബാധിതരെ ചികിത്സിക്കുന്നതിനിടെ ജീവൻ വെടിഞ്ഞ നഴ്സ് ലിനിക്ക് ആദരമർപ്പിച്ച് ലോകപ്രശസ്ത അന്താരാഷ്ട്ര മാസിക "ദ എക്കണോമിസ്റ്റ്'. മാസികയുടെ ചരമക്കോളത്തിലാണ് ലിനിയെക്കുറിച്ച് പ്രതിപാദിച്ചിരിക്കുന്നത്. "ട്രീറ്റിംഗ് എ മിസ്റ്ററി ഡിസീസ്' എന്ന തലക്കെട്ടോടെ ആരംഭിക്കുന്ന ലേഖനത്തിൽ ലിനി മരണക്കിടക്കയില്‍ ഭര്‍ത്താവ് സജീഷിനെഴുതിയ കരളുലയ്ക്കുന്ന കത്തും ഉള്‍പ്പെടുത്തിയിട്ടുണ്ട്. മനസാക്ഷിയുള്ള നഴ്സ് എന്നാണ് ലേഖനത്തിൽ ലിനിയെക്കുറിച്ചുള്ള പരാമർശം. ലണ്ടനിലെ വെസ്റ്റ് മിനിസ്റ്ററില്‍ നിന്ന് പ്രസിദ്ധീകരിക്കുന്ന ദ എക്കണോമിസ്റ്റിൽ ഇടം നേടുന്ന ആദ്യ മലയാളിയാണ് ലിനി.

നിപ്പാ വൈറസ് ബാധിച്ച് പേരാമ്പ്ര താലൂക്ക് ആശുപത്രിയിൽ ചികിത്സ തേടിയെത്തിയവരെ പരിചരിക്കുന്നതിനിടെയാണ് ലിനിക്കും വൈറസ് ബാധയേറ്റത്. ചങ്ങരോത്ത് സൂപ്പിക്കടയിലെ വളച്ചുകെട്ട് മൊയ്തു ഹാജിയുടെ ഭാര്യ കണ്ടോത്ത് മറിയം. മറിയത്തിന്‍റെ ഭർത്തൃ സഹോദരന്‍റെ മക്കളായ സാലിഹ്, സാബിത്ത് എന്നിവരാണ് ഈ വൈറസ് ബാധയെ തുടർന്ന് ആദ്യം മരിച്ചത്. അതിനു പിന്നാലെയാണ് സാബിത്തിനെ പരിചരിച്ച ലിനിക്കും ഈ വൈറസ് പിടിപെട്ടത്. ഈ വൈറസ് മറ്റാരിലേക്കും പിടിപെടാതിരിക്കുവാൻ ലിനിയുടെ മൃതദേഹം ബന്ധുക്കൾക്ക് വിട്ടുകൊടുത്തിരുന്നില്ല. മാസ്ക് ധരിച്ച് മാത്രമാണ് ബന്ധുക്കൾക്ക് മൃതദേഹം കാണുവൻ അവസരം നൽകിയത്. മരിച്ചയുടൻ തന്നെ ലിനിയെ വൈദ്യുത ശ്മശാനത്തിൽ ദഹിപ്പിക്കുകയായിരുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.