ഡൽഹിയിലെ "എൽജി’ പ്രവർത്തിക്കുന്നില്ലെന്നു ട്വീറ്റ്; ബുദ്ധിമുട്ടിൽ ഖേദിക്കുന്നെന്ന് എൽജി

Saturday, June 16, 2018 8:31 PM IST

ലഫ്. ഗവർണറുമായുള്ള അധികാര വടംവലിയെ തുടർന്ന് ഡൽഹി മുഖ്യമന്ത്രി അരവിന്ദ് കേജരിവാൾ ലഫ്. ഗവർണർ അനിൽ ബൈജലിന്‍റെ ഓഫീസിൽ സമരം തുടരുകയാണ്. ഇതേതുടർന്ന് ലഫ്. ഗവർണർ തന്‍റെ ഓഫീസ് പ്രവർത്തനങ്ങൾ വീട്ടിലേക്കു മാറ്റി. മുഖ്യമന്ത്രിയും മന്ത്രിമാരും സമരത്തിലായതിനാൽ ഡൽഹി സർക്കാരുമായി ബന്ധപ്പെട്ട ഫയലുകൾ ലഫ്. ഗവർണർക്കു ലഭിക്കുന്നില്ല.

ഈ സാഹചര്യത്തിലാണ് ഡൽഹി സർക്കാരിന്‍റെ പ്രവർത്തനങ്ങൾ നിലച്ചതിനെ സംബന്ധിച്ച് ബോളിവുഡ് സംവിധായകൻ ശിരിഷ് സുന്ദർ ട്വീറ്റ് ചെയ്യുന്നത്. "എൽജി പ്രവർത്തിക്കുന്നില്ല. മറ്റുള്ളവരെ പ്രവർത്തിക്കാൻ സമ്മതിക്കുന്നുമില്ല. നിങ്ങൾക്ക് ഡൽഹിയിൽ സർവീസ് സെന്‍ററുണ്ടോ’ എന്നായിരുന്നു സംവിധായകന്‍റെ ട്വീറ്റ്. എൽജി ഇന്ത്യയെ ടാഗ് ചെയ്തുകൊണ്ടായിരുന്നു സുന്ദറിന്‍റെ ട്വീറ്റ്. ഇതിന് എൽജി കന്പനി നൽകിയ മറുപടി ട്വിറ്ററിൽ ചിരി പടർത്തി.

"നിങ്ങൾക്കുണ്ടായ ബുദ്ധിമുട്ടിൽ ഖേദിക്കുന്നു. ബന്ധപ്പെടേണ്ട വിവരങ്ങൾ നേരിട്ട് അയയ്ക്കുകയാണെങ്കിൽ ഞങ്ങൾ സഹായം നൽകാം’ എന്നായിരുന്നു എൽജി കന്പനിയുടെ മറുപടി. നിമിഷനേരം കൊണ്ട് ഈ മറുപടി ട്വിറ്ററിൽ വൈറലായി. എൽജിയുടെ മറുപടി കണ്ട് ലഫ്.ഗവർണർ പോലും ചിരിക്കുന്നുണ്ടാകുമെന്നായിരുന്നു ഒരാളുടെ ട്വീറ്റ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.