പശുവിനെ വിവാഹം ചെയ്ത് 74കാരി; കാരണം വിചിത്രം..!

Monday, July 24, 2017 2:58 AM IST

ഭർത്താവ് മരിച്ചുപോയ 74 കാരി രണ്ടാമത് വിവാഹം ചെയ്തത് ഒരു പശുവിനെ. കാരണവുമുണ്ട്, മരിച്ചുപോയ ഭർത്താവിന്‍റെ പുനർജന്മമാണത്രേ ആ പശു. കംബോഡിയയിലാണ് സംഭവം. ക്രാറ്റീ പ്രവിശ്യയിലുള്ള ഖിം ഹാംഗ് ആണ് ആചാരങ്ങളെല്ലാം അനുസരിച്ച് അഞ്ചു മാസം പ്രായമുള്ള പശുവിനെ ഭർത്താവായി സ്വീകരിച്ചത്.

ഖിമ്മിന്‍റെ ഭർത്താവ് ടോൽ ഖുത് ഒരു വർഷം മുന്പാണ് മരണമടഞ്ഞത്. അദ്ദേഹത്തിന്‍റെ ആത്മാവ് തന്നോടു സംസാരിച്ചുവെന്നും ഉടനെ ആ പശു തന്‍റെ അടുക്കലെത്തി സ്നേഹത്തോടെ മുട്ടിയുരുമ്മുരയും ചെയ്തുവെന്നും ഖിം പറഞ്ഞു. ഇതാണ് ആ പശുവിനെത്തന്നെ വിവാഹം കഴിക്കാനുള്ള തീരുമാനത്തിനു കാരണം.

തങ്ങളുടെ അച്ഛന്‍റെ പുനർജന്മമാണിതെന്ന് ഖിമ്മിന്‍റെ മക്കളും വിശ്വസിക്കുന്നു. കാരണം ഇവരോടുള്ള പശുവിന്‍റെ പെരുമാറ്റവും വളരെ സ്നേഹത്തോടെയാണ്. ടോൽ ഉപയോഗിച്ചിരുന്ന മുറിയിലാണ് ഈ പശുവിന്‍റെയും താമസം. മുറിയിലുള്ള ജനാലയിൽ കൂടി ടോൽ നോക്കുന്നതു പോലെ തന്നെ പശുവും തന്നെ നോക്കുമെന്നാണ് ഖിം പറയുന്നത്.

തന്‍റെ മരണശേഷവും ഈ പശുവിനെ സംരക്ഷിക്കണമെന്ന് ഖിം തന്‍റെ മക്കളോട് ആവശ്യപ്പെട്ടു. കംബോഡിയ മുഴുവൻ ചർച്ചാ വിഷയമായ ഈ പശുവിനെ കാണാൻ നിരവധിയാളുകളാണ് ദിനംപ്രതി വന്നുകൊണ്ടിരിക്കുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.