പുതിയ ഫോസിലുകൾ കിട്ടി; മനുഷ്യവംശത്തിന്‍റെ ചരിത്രം മാറും

Friday, June 9, 2017 1:05 AM IST

മനുഷ്യകുടുംബത്തിലെ ആദിമ പൂർവികരെപ്പറ്റിയുള്ള ശാസ്ത്ര പഠനങ്ങളിൽ തിരുത്ത്. എത്യോപ്യയിൽ രണ്ടു ലക്ഷം വർഷങ്ങൾക്കു മുൻപായിരുന്നു പൂർവികരുടെ വാസം എന്ന നിഗമനമാണ് മാറുന്നത്. സ്ഥലവും കാലവും മാറി. മൊറോക്കോയിൽ മൂന്നു ലക്ഷമോ മൂന്നര ലക്ഷമോ വർഷം മുന്പായിരുന്നു മനുഷ്യന്‍റെ പൂർവികരെന്നു ശാസ്ത്രം കരുതുന്നവരുടെ വാസം.

മൊറോക്കോയിലെ മാറാകേഷിൽനിന്നു 100 കിലോമീറ്റർ അകലെ ജെബൽ ഇർഹൂദ് എന്ന സ്ഥലത്തെ ബേറൈറ്റ് ഖനികളിൽനിന്നു ലഭിച്ച അസ്ഥികളും പല്ലും തലയോട്ടിയുമാണ് ഈ നിഗമനത്തിലേക്കു നയിച്ചത്. 1960കളിൽ ലഭിച്ച കഷണങ്ങൾക്കുശേഷം കഴിഞ്ഞ ദശകത്തിലും അവിടെ ഗവേഷണം നടത്തി അസ്ഥിശകലങ്ങൾ എടുത്തു. കംപ്യൂട്ടറധിഷ്ഠിത പഠനങ്ങളിലൂടെ ഇവയുടെ പ്രായം മൂന്നു ലക്ഷത്തിനും മൂന്നര ലക്ഷത്തിനുമിടയ്ക്കു വർഷം വരുമെന്നു കണക്കാക്കി. എത്യോപ്യയിൽനിന്നു കണ്ടെത്തിയ ഹോമോ സാപിയൻസ് അസ്ഥികൾക്കു രണ്ടു ലക്ഷം വർഷമേ പഴക്കമുള്ളൂ.

ഇതോടെയാണ് ആഫ്രിക്കയുടെ വടക്കു കിഴക്കുനിന്നു വടക്കു പടിഞ്ഞാറോട്ട് പൂർവികരുടെ "നാട്' മാറ്റിയത്. നേച്ചർ മാസിക ഇതു സംബന്ധിച്ച പ്രബന്ധം ഈയാഴ്ച പ്രസിദ്ധീകരിച്ചു. ജർമനിയിലെ ലൈപ്സിഗിലുള്ള മാക്സ് പ്ലാങ്ക് ഇൻസ്റ്റിറ്റ്യൂട്ട് ഫോർ എവല്യൂഷണറി ആന്ത്രപ്പോളജിയിലെ ഴാങ് ഴാക്ക് യൂബ്ലിൻ ആണു പ്രബന്ധകർത്താവ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.