ഇന്ത്യയിലും ഇനി റോബോട്ടുകൾ ശസ്ത്രക്രിയ നടത്തും

ന്യൂഡൽഹിയിലെ സഫ്ദർജംഗ് ആശുപത്രി ചരിത്രത്തിൽ ഇടംപിടിക്കാനൊരുങ്ങുന്നു. ശസ്ത്രക്രിയകൾ നടത്താൻ ശേഷിയുള്ള റോബോട്ടുകളെ വാങ്ങാൻ കേന്ദ്രസർക്കാർ അനുമതി നൽകിയതോടെയാണ് സഫ്ദർജംഗ് ആശുപത്രിയും വാർത്തകളിൽ ഇടംപിടിച്ചത്. റോബോട്ടുകൾ സർജറി നടത്തുന്ന ആദ്യത്തെ സർക്കാർ ആശുപത്രിയാവും സഫ്ദർജംഗ്. 18 കോടിരൂപയാണ് ഒരു റോബോട്ടിന്‍റെ വില.

ഇത് സാധ്യമാകുന്നതോടെ അഞ്ചു ലക്ഷം മുതൽ പത്തു ലക്ഷം രൂപവരെ‌ ചെലവു വരുന്ന ശസ്ത്രക്രിയകൾ കുറഞ്ഞ ചെലവിൽ സഫ്ദർജംഗ് ആശുപത്രിയിൽ നടത്താനാവുമെന്ന് യൂറോളജി വിഭാഗം തലവൻ അനൂപ്കുമാർ അറിയിച്ചു. റോബോട്ടിക് സർജറി നടപ്പിലാക്കുന്നതിലൂടെ ചികിത്സാചെലവു മാത്രമല്ല ശസ്ത്രക്രിയയുടെ സമയവും കുറയുമെന്നും അദ്ദേഹം പറഞ്ഞു.

പ്രോസ്റ്റേറ്റ് കാൻസറിനു സാധാരണ നടത്തുന്ന ശസ്ത്രക്രിയയ്ക്ക് നാലു മണിക്കൂറാണു വേണ്ടതെങ്കിൽ ഇതേ ശസ്ത്രക്രിയ റോബോട്ടിനെ ഉപയോഗിച്ചു നടത്തുന്പോൾ വേണ്ടിവരുന്നത് ഒരു മണിക്കൂർ മാത്രമാണെന്നും അനൂപ്കുമാർ കൂട്ടിച്ചേർത്തു‌. നേരത്തെ, യൂറോ-ഒാങ്കോളജി വിഭാഗം 3ഡി ലാപ്രോസ്കോപ്പി ശസ്ത്രക്രിയയും നടത്തിയിരുന്നു. സർക്കാർ ആശുപത്രികളിൽ 3 ഡി ലാപ്രോസ്കോപ്പിക് സർജറി നടത്തുന്ന ആദ്യ ആശുപത്രിയും സഫ്ദർജംഗായിരുന്നു.

3 ഡി ലാപ്രോസ്കോപ്പി സംവിധാനം നിലവിൽ വന്നതോടെ ശസത്രക്രിയയ്ക്കായി രോഗിയുടെ ശരീരം കീറിമുറിക്കേണ്ട കാര്യമില്ലാതായി. കീ ഹോളിലൂടെ തന്നെ ആന്തരാവയവങ്ങൾ 3 ഡി രൂപത്തിൽ സ്ക്രീനിൽ കണ്ടാണ് ഡോക്ടർമാർ ശസ്ത്രക്രിയ നടത്തുന്നത്. റോബോട്ടിക് സർജറി സംവിധാനം കൂടി നിലവിൽ വരുന്നതോടെ ശസ്ത്രക്രിയയ്ക്കിടെ സംഭവിക്കാവുന്ന പിഴവുകളിലും വലിയ കുറവുവരുമെന്നാണ് വിലയിരുത്തുന്നത്. റോബോട്ടീസ് സർജറി സംവിധാനം നിലവിൽ വരുന്നതോടെ ഒരേ ദിവസം നടത്താനാവുന്ന ശസ്ത്രക്രിയയുടെ എണ്ണം ഇരട്ടിയാക്കാനാവും.