ഫോണുമായി ബന്ധിപ്പിക്കാം; സ്മാർട്ട് ജാക്കറ്റുകൾ എത്തുന്നു

സ്മാര്‍ട്ട് ഫോണുകള്‍ക്കും വാച്ചുകള്‍ക്കും പിന്നാലെ സ്മാര്‍ട്ട് ജാക്കറ്റുകള്‍ എന്ന ആശയത്തിന് ചിറകുമുളയ്ക്കുകയാണ്. ഗൂഗിളും ലെവൈസും കൈകോര്‍ക്കുന്ന ഈ പദ്ധതി വിജയം കണ്ടാല്‍ വലിയൊരു മാറ്റത്തിനാവും തുടക്കം കുറിക്കപ്പെടുന്നത്.

ആദ്യമായാണ് ഗൂഗിളും ലെവൈസും ചേര്‍ന്നൊരു നിര്‍മ്മാണത്തിനൊരുങ്ങുന്നത്. കണ്ടാല്‍ സാധാരണ ലെവൈസ് ജാക്കറ്റാണെന്നു തോന്നുമെങ്കിലും ഇന്‍ററാക്ടീവ് ഡെനിം ഉപയോഗിച്ചാണ് ഈ ജാക്കറ്റുകള്‍ നിര്‍മിക്കുന്നത്. ഇതോടൊപ്പം കൈയില്‍ ഘടിപ്പിക്കുന്ന ഒരു ബ്ലൂടൂത്ത് ഉപകരണവും ഉണ്ടാകും. പ്രൊജക്ട് ജാക്വാര്‍ഡെന്നു പേരിട്ടിരിക്കുന്ന ഈ നിര്‍മാണം 2015ല്‍ ഗൂഗിള്‍ പ്രഖ്യാപിച്ചിരുന്നു. തുണിയിലേക്ക് തുന്നിച്ചേര്‍ത്തിരിക്കുന്ന സര്‍ക്യൂട്ടുകളുടെ സഹായത്താലാണ് ജാക്കറ്റ് പ്രവര്‍ത്തിക്കുക.

ചെറിയ കഫിന്‍ പോലെയുള്ള ബ്ലൂട്ടൂത്ത് ഉപകരണം ജാക്കറ്റിന്‍റെ കൈയിലുള്ള ഹോളിലേക്ക് ഘടിപ്പിക്കുന്നതോടെ നമുടെ ചലനങ്ങളും പ്രവര്‍ത്തികളുമെല്ലാം ഫോണില്‍ രേഖപ്പെടുത്തും. ഇത് പ്രവര്‍ത്തന സജ്ജമായിക്കഴിഞ്ഞാല്‍ പാട്ടുമാറ്റാനോ ഫോണ്‍ വിളിക്കാനോ ഒന്നും നമ്മള്‍ ബുദ്ധിമുട്ടണ്ട. എന്താണ് ആവശ്യമെന്ന് വെറുതെ പറഞ്ഞാല്‍ മാത്രം മതിയാകും. ഇന്‍കമിംഗ് കോളുകളോ മെസേജുകളോ ഉണ്ടെങ്കില്‍ വൈബ്രേഷനിലൂടെ ജാക്കറ്റ് നമ്മളെ അറിയിക്കും.

ഇങ്ങനെയൊക്കെയാണെങ്കില്‍ ജാക്കറ്റ് കഴുകാന്‍ സാധിക്കുമോ എന്നാണ് ആലോചിക്കുന്നതെങ്കില്‍ കഴുകാം എന്നാണ് ഉത്തരം. പക്ഷേ കഴുകുന്നതിനു മുമ്പായി ഇതിലെ ബ്ലൂടൂത്ത് ഡോംഗിള്‍ ഊരി മാറ്റേണ്ടതാണ്.

ഈ വര്‍ഷം അവസാനത്തോടെ വിപണിയിലെത്തുമെന്ന് പ്രതീക്ഷിക്കുന്ന ജാക്കറ്റിന്‍റെ വില ഏകദേശം ഇരുപത്തിമൂവായിരം രൂപയാണ്.