മനുഷ്യന് മനുഷ്യനേക്കാൾ പ്രിയം നായകളോട്

Thursday, April 5, 2018 3:49 PM IST

നൂറ്റാണ്ടുകൾക്കു മുന്പുതന്നെ മനുഷ്യന്‍റെ വീടുകളിൽ ഇടം നേടിയ മൃഗമാണ് നായ. മനുഷ്യനോട് ഇത്രയധികം വിധേയത്വം പുലർത്തുന്ന മറ്റൊരു മൃഗമില്ല. നായ്ക്കൾക്ക് മനുഷ്യരെ വളരെ ഇഷ്ടമാണെന്ന് എല്ലാവർക്കും അറിയാം. മനുഷ്യന് തിരിച്ചും അങ്ങനെതന്നെയാണ്. എന്നാൽ മനുഷ്യന് മറ്റൊരു മനുഷ്യനേക്കാൾ നായ്ക്കളോട് ഇഷ്ടമുണ്ടെന്നാണ് ഒരു പഠനം തെളിയിച്ചിരിക്കുന്നത്.

സ്വന്തക്കാരുടെ കാര്യമല്ല പറയുന്നത്. അപരിചിതനായ വ്യക്തിയോട് തോന്നുന്നതിനേക്കാൾ ഇഷ്ടവും സഹതാപവും ഒരു അപരിചിതനായ ഒരു നായയോട് തോന്നുമെന്നാണ് ഈ പഠനം പറയുന്നത്. ഹാരിസണ്‍സ് ഫണ്ട് എന്ന സംഘടനയാണ് ഇതു സംബന്ധിച്ച പഠനം നടത്തിയത്.

പഠനത്തിന്‍റെ ഭാഗമായി ഇവർ ഒരു പരീക്ഷണം നടത്തി. ആദ്യം തങ്ങളുടെ വെബ്സൈറ്റിലൂടെ ഒരു കുഞ്ഞിന്‍റെ ചികിത്സയ്ക്കായി പണം നൽകണമെന്ന് അപേക്ഷിച്ചു. കുഞ്ഞിന്‍റെ ഫോട്ടോയോടൊപ്പമായിരുന്നു അപേക്ഷ. ഒരാഴ്ചയ്ക്കു ശേഷം കുഞ്ഞിനു പകരം ഒരു നായ്ക്കുട്ടിയുടെ ചികിത്സയ്ക്കായ് പണം നൽകണമെന്ന് അപേക്ഷിച്ചു.

കുഞ്ഞിന്‍റെ ചികിത്സയ്ക്ക് കിട്ടിയതിനേക്കാൾ ഇരട്ടി പണമാണ് നായ്ക്കുട്ടിയുടെ ചികിത്സയ്ക്ക് കിട്ടിയത്. സമാനമായ നിരവധി പരീക്ഷണങ്ങൾ നടത്തിയാണ് മനുഷ്യന് മനുഷ്യനേക്കാൾ നായ്ക്കളോടാണ് സ്നേഹം എന്ന നിരീക്ഷണത്തിലെത്തിയത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.