ജമ്മുവിൽ സ്‌ഥിരതാമസമാക്കിയിരിക്കുന്നത് 13,700ൽ അധികം വിദേശികൾ
Wednesday, January 11, 2017 9:08 PM IST
ജമ്മു: മ്യാൻമറിലെ റോഹിങ്ക്യ വംശജർ അടക്കം 13,700ൽ അധികം വിദേശികൾ ജമ്മു കാഷ്മീരിൽ സ്‌ഥിരതാമസം ആക്കിയതായി സർക്കാർ. 2008 നും 2016നും ഇടയിലുള്ള കാലയളവിൽ വിദേശികളുടെ എണ്ണം 6,000 ഓളം പേരുടെ വർധനയുണ്ടാതായും ജമ്മു കാഷ്മീർ സർക്കാർ അറിയിച്ചു. നിയമസഭയിൽ ബിജെപി എംഎൽഎ രാജേഷ് ഗുപ്തയ്ക്ക് രേഖാമൂലം നൽകിയ മറുപടിയിലാണ് ജമ്മു കാഷ്മീർ മുഖ്യമന്ത്രി മെഹ്ബൂബ മുഫ്തി ഇക്കാര്യം വ്യക്‌തമാക്കിയത്.

ജനുവരി ആറുവരെയുള്ള കണക്കനുസരിച്ച് 13,433 ബർമീസ്, ടിബറ്റൻ പൗരന്മാർക്കൊപ്പം മറ്റു രാജ്യങ്ങളിൽ നിന്നുള്ള 322 വിദേശികളും സംസ്‌ഥാനത്ത് താമസിക്കുന്നുണ്ട്. 2008ൽ 7,093 പേരായിരുന്നു വിദേശികളായി കാഷ്മീരിൽ ഉണ്ടായിരുന്നത്. എന്നാൽ 2014ൽ എത്തിയതോടെ 12,560 ആയി ആകുകയും പിന്നീടു 2016ൽ എത്തിയപ്പോൾ വിദേശ പൗരന്മാരുടെ എണ്ണം 13,755 ആയി ഉയരുകയും ചെയ്തായി മുഖ്യമന്ത്രി അറിയിച്ചു. ഇവരിൽ ഭൂരിഭാഗവും ജമ്മുവും സാംബ ജില്ലയിലുമാണ് താമസിക്കുന്നതെന്നും മെഹ്ബൂബ മുഫ്തി കൂട്ടിച്ചേർത്തു.

അനധികൃത കുടിയേറ്റം ഉൾപ്പെടെ 17 എഫ്ഐആറുകൾ റോഹിങ്ക്യ വംശജർക്കെതിരെ രജിസ്റ്റർ ചെയ്തിട്ടുണ്ട്. എന്നാൽ സൈന്യത്തിനെതിരെ കാഷ്മീരിൽ നടന്ന കലാപത്തിൽ ഇവരിൽ പങ്കാളികളായതായി കണ്ടെത്തിയിട്ടില്ലെന്നും മെഹ്ബൂബ മുഫ്തി മറുപടി നൽകി.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.