ബസ് ഉടമകള്‍ക്ക് ഉറപ്പൊന്നും നല്‍കിയിട്ടില്ല; നടപടികള്‍ തുടരും: മന്ത്രി ആര്യാടന്‍
Monday, September 9, 2013 6:19 AM IST
ന്യൂഡല്‍ഹി: സംസ്ഥാന സര്‍ക്കാര്‍ എന്തെങ്കിലും ഉറപ്പുകള്‍ നല്‍കിയതിനെ തുടര്‍ന്നല്ല സ്വകാര്യ ബസ് ഉടമകള്‍ സമരം പിന്‍വലിച്ചതെന്ന് ഗതാഗതമന്ത്രി ആര്യാടന്‍ മുഹമ്മദ്. ബസ് അപകടങ്ങള്‍ ഒഴിവാക്കാനുള്ള കര്‍ശന നടപടികളുമായി സര്‍ക്കാര്‍ മുന്നോട്ടുപോകും. ഇക്കാര്യത്തില്‍ നിയമം കര്‍ശനമായി നടപ്പാക്കുമെന്നും മന്ത്രി പറഞ്ഞു. കേരളത്തില്‍ സ്വകാര്യ ബസ് ഉടമകള്‍ ആരംഭിച്ച സമരം മണിക്കൂറുകള്‍ക്കകം പിന്‍വലിച്ചിരുന്നു. സമരം പിന്‍വലിക്കുന്നതിന് സര്‍ക്കാര്‍ ചില ഉറപ്പുകള്‍ ബസ് ഉടമകള്‍ക്ക് നല്‍കിയെന്ന വാര്‍ത്തകളോട് പ്രതികരിക്കുകയായിരുന്നു മന്ത്രി ആര്യാടന്‍.

ബസുടമകളുടെ പരാതി നിയമത്തിനുള്ളില്‍ നിന്നുകൊണ്ട്് പരിഹരിക്കാന്‍ കഴിയുന്നതാണെങ്കില്‍ അക്കാര്യം പരിശോധിക്കും. സ്പീഡ് ഗവേണര്‍ സര്‍ക്കാര്‍ നല്‍കണമെന്ന ആവശ്യം അംഗീകരിക്കാന്‍ കഴിയില്ലെന്ന് മാധ്യമ പ്രവര്‍ത്തകരുടെ ചോദ്യത്തിന് മറുപടിയായി മന്ത്രി പറഞ്ഞു. നിയമങ്ങള്‍ അനുശാസിക്കുന്ന തരത്തില്‍ ബസ് ഇറക്കേണ്ട ചുമതല ഉടമകള്‍ക്കാണ്. ബസിന്റെ എന്‍ജിന്‍ കേടായാല്‍ സര്‍ക്കാരിന് നല്‍കാന്‍ കഴിയില്ല. ടയറും സര്‍ക്കാര്‍ നല്‍കണമെന്നു പറഞ്ഞാല്‍ എങ്ങനെ ശരിയാകുമെന്നു മന്ത്രി ചോദിച്ചു.