സാക്ഷരതയില്‍ കേരളത്തെ തോല്‍പിച്ച് ത്രിപുര
Monday, September 9, 2013 3:31 PM IST
അഗര്‍ത്തല: സാക്ഷരതയില്‍ ഒന്നാം സ്ഥാനമെന്ന കേരളത്തിന്റെ അവകാശവാദവും പഴങ്കഥയായി. വടക്കു-കിഴക്കന്‍ സംസ്ഥാനമായ ത്രിപുരയാണ് സാക്ഷരതയില്‍ കേരളത്തെ തോല്‍പിച്ചത്. 94.65 ശതമാനമാണ് ത്രിപുരയിലെ സാക്ഷരത. കേരളത്തില്‍ നിലവില്‍ 93.91 ശതമാനമാണ് സാക്ഷരരായവരുടെ നിരക്ക്.

കഴിഞ്ഞ മാസം 10 മുതല്‍ 25 വരെ സംസ്ഥാനത്ത് നടത്തിയ കണക്കെടുപ്പിലെ വിവരങ്ങള്‍ അടിസ്ഥാനമാക്കിയാണ് ത്രിപുര ഇക്കാര്യം വ്യക്തമാക്കിയത്. കോല്‍ക്കത്തയിലെ ഇന്ത്യന്‍ സ്റാറ്റിസ്റിക്കല്‍ ഇന്‍സ്റിറ്റ്യൂട്ട് ആണ് കണക്കെടുപ്പ് നടത്തിയത്. സാക്ഷരതയില്‍ 2001 ലെ സെന്‍സസില്‍ പന്ത്രണ്ടാം സ്ഥാനത്തായിരുന്ന ത്രിപുര 2011 ലെ സെന്‍സസില്‍ നാലാം സ്ഥാനത്തേക്ക് എത്തിയിരുന്നു. തുടര്‍ന്നാണ് ഇപ്പോള്‍ ഒന്നാം സ്ഥാനത്തേക്ക് മുന്നേറിയതെന്ന് മുഖ്യമന്ത്രി മാണിക് സര്‍ക്കാര്‍ പറഞ്ഞു. 2011 ല്‍ ത്രിപുര 87.75 ശതമാനം സാക്ഷരത കൈവരിച്ചിരുന്നതായി അദ്ദേഹം ചൂണ്ടിക്കാട്ടി.

കഴിഞ്ഞ വര്‍ഷം ഓഗസ്റില്‍ എട്ട് ജില്ലാ മജിസ്ട്രേറ്റുമാരെ ഉള്‍പ്പെടുത്തി സര്‍ക്കാര്‍ നടത്തിയ സര്‍വേയില്‍ സംസ്ഥാനത്തെ 37 ലക്ഷം പേരില്‍ 131,634 പേര്‍ മാത്രമാണ് നിരക്ഷരരെന്ന് വ്യക്തമായിരുന്നു. ഈ സര്‍വേ റിപ്പോര്‍ട്ടിലൂന്നി നടത്തിയ ചിട്ടയായ പ്രവര്‍ത്തനമാണ് ത്രിപുരയെ ഒന്നാം സ്ഥാനത്ത് എത്തിച്ചത്. അവശേഷിക്കുന്നവരെ സാക്ഷരരാക്കാന്‍ 8152 കേന്ദ്രങ്ങളിലായി 8254 വോളന്റിയര്‍മാര്‍ അക്ഷീണം പരിശ്രമിക്കുകയായിരുന്നു.

വോളന്റിയര്‍മാരുടെ പ്രവര്‍ത്തനം നിരീക്ഷിക്കാന്‍ 85 മാസ്റര്‍ പരിശീലകരെയും ചുമതലപ്പെടുത്തിയിരുന്നു. സാമൂഹ്യക്ഷേമ വകുപ്പിന് കീഴിലുള്ള അംഗന്‍വാടി ജീവനക്കാരും ഈ ഉദ്യമത്തില്‍ പങ്കാളികളായി.