ഡല്‍ഹിയില്‍ മരം നടാന്‍ സ്ഥലമില്ലെന്ന് വനംവകുപ്പ്
Thursday, May 16, 2013 6:39 PM IST
ന്യൂഡല്‍ഹി: രാജ്യതലസ്ഥാനത്തു മരം നടാനുള്ള സ്ഥലമില്ലെന്ന് വനംവകുപ്പ്. നഗരവത്കരണവും മറ്റു വികസനപ്രവര്‍ത്തനങ്ങളും മൂലം ചെടികള്‍ പോലും നട്ടുപിടിപ്പിക്കാന്‍ സ്ഥലമില്ലാതെ വനംവകുപ്പ് ബുദ്ധിമുട്ടുകയാണെന്ന് വകുപ്പ് വക്താവ് എ.കെ. ശുക്ള പറഞ്ഞു.

റോഡ് നിര്‍മാണത്തിനും ഡല്‍ഹി മെട്രോ, ഫ്ളൈ ഓവറുകള്‍, തുടങ്ങിയവയുടെ നിര്‍മാണത്തിനായി നൂറുകണക്കിനു മരങ്ങളാണ് ഡല്‍ഹിയില്‍ നശിപ്പിച്ചത്. വെട്ടിമാറ്റുന്ന ഒരു മരത്തിനു പകരം 10 മരങ്ങള്‍ വച്ചുപിടിപ്പിക്കണമെന്നാണ് നിയമം. എന്നാല്‍ മരങ്ങള്‍ നടാന്‍ സ്ഥലമില്ലാത്തതാണ് പ്രശ്നമെന്നും അദ്ദേഹം കൂട്ടിച്ചേര്‍ത്തു.

2012നും 2013നുമിടയില്‍ 17 ലക്ഷത്തോളം തൈകളാണ് നട്ടുപിടിപ്പിച്ചിട്ടുള്ളത്. എന്നാല്‍ ഇവയില്‍ മിക്കവയും ചെറുമരങ്ങളും ചെടികളുമാണ്. 2001ല്‍ ഡല്‍ഹിയിലെ പച്ചപ്പ് 151 സ്ക്വയര്‍ കിലോമീറ്റര്‍ മാത്രമായിരുന്നു. എന്നാല്‍ 2011-ല്‍ അത് 296 സ്ക്വയര്‍ കിലോമീറ്ററായി ഉയര്‍ത്താന്‍ സാധിച്ചിട്ടുണ്െടന്നും ശുക്ള പറഞ്ഞു.