റഫ്രിജറേറ്ററിലും ജോസ് മുട്ട വിരിയിക്കും
Thursday, May 16, 2013 1:50 PM IST
വി.എസ്. രതീഷ്

ആലപ്പുഴ: കേടായ റഫ്രിജറേറ്ററുകള്‍ പലപ്പോഴും വീടിന് പിന്നാമ്പുറത്തേക്ക് തള്ളുകയാണ് പതിവ്. വര്‍ഷങ്ങളോളം ഇങ്ങനെ കിടക്കുന്ന ഇവ പിന്നീട് തുരുമ്പെടുത്ത് നശിക്കുകയും ചെയ്യും. കേടായ റഫ്രിജറേറ്റുകള്‍ സാധാരണ ഗതിയില്‍ മറ്റൊരു ഉപയോഗത്തിന് സാധ്യമല്ലായെന്നതിനാലാണ് പലരും ഇവയെ ഉപേക്ഷിക്കുന്നത്. എന്നാല്‍ ഉപയോഗശൂന്യമായ റഫ്രിജറേറ്റുകളുപയോഗിച്ച് മുട്ടവിരിയിക്കുന്നതിനുള്ള ഇന്‍ക്യൂബേറ്റര്‍ നിര്‍മിച്ചിരിക്കുകയാണ് ആലപ്പുഴ നഗരസഭ കൊമ്മാടി വാര്‍ഡ് പുലിക്കാട്ടില്‍ ജോസ്. മെക്കാനിക്കല്‍ എന്‍ജിനീയറായ ഇദ്ദേഹത്തിന്റെ പരീക്ഷണ ഫലമായി ഉടലെടുത്ത ഈ 'റഫ്രിജറേറ്റര്‍ ഇന്‍ക്യൂബേറ്ററില്‍' നിന്നും നൂറിലേറെ മുട്ടകള്‍ ഒരേസമയം വിരിയിച്ചെടുക്കാന്‍ കഴിയും.

റഫ്രിജിറേറ്റര്‍ ഇന്‍ക്യൂബേറ്ററിലൂടെ മുട്ട വിരിയുമോയെന്ന സംശയം പ്രകടിപ്പിക്കുന്നവരോട് വീടിന് ചുറ്റുമുള്ള കൂടുകളിലുള്ള 100 കണക്കിന് കോഴികളും താറാവുകളും വാത്തുകളുമാണ് ഇദ്ദേഹത്തിന്റെ ഉത്തരം. പഴയ റഫ്രിജിറേറ്റര്‍ ഉപയോഗിച്ച് ഇന്‍ക്യൂബേറ്ററുണ്ടാക്കിയതിനുപിന്നിലൊരു കഥയുണ്ട്. പത്തുവര്‍ഷത്തോളം വിദേശത്ത് ജോലി നോക്കിയശേഷം തിരികെ നാട്ടിലെത്തിയ ജോസ് സ്വയംതൊഴില്‍ എന്ന ലക്ഷ്യത്തോടെ 25 കാടക്കോഴികളെ വളര്‍ത്തിത്തുടങ്ങി. ഉപഭോക്താക്കളുടെ ആവശ്യത്തിനനുസരിച്ച് കാടകളെ നല്കാന്‍ സാധിക്കാതെ വന്നതോടെയാണ് കൂടുതല്‍ കുഞ്ഞുങ്ങളെ വീട്ടില്‍ത്തന്നെ വിരിയിക്കുന്നതിന് ഇന്‍ക്യൂബേറ്റര്‍ വാങ്ങാന്‍ ജോസ് തീരുമാനിച്ചത്.

എന്നാല്‍ ഇന്‍ക്യുബേറ്റര്‍ വാങ്ങാന്‍ ശ്രമിച്ചപ്പോഴാണ് സാധാരണക്കാര്‍ക്ക് താങ്ങാവുന്ന വിലയല്ല ഇതിനുള്ളതെന്ന് മനസിലായത്. തുടര്‍ന്ന് കുറഞ്ഞവിലയില്‍ ഇന്‍ക്യുബേറ്ററുണ്ടാക്കാനാകുമോയെന്ന പരീക്ഷണമാണ് ഇത്തരത്തിലൊരു ഉത്പന്നത്തിന്റെ കണ്ടുപിടുത്തത്തിലേക്ക് ജോസിനെ നയിച്ചത്. വീടുകളിലെ ഉപയോഗശൂന്യമായ റഫ്രിജറേറ്ററിന്റെ ഫ്രീസറെടുത്തുമാറ്റി പകരം മുട്ടകള്‍ അടുക്കിവയ്ക്കുന്നതിനുള്ള പ്രത്യേകതട്ടുകളുണ്ടാക്കി തുടര്‍ന്ന് ഹീറ്റിംഗ് കോയില്‍, വായുസഞ്ചാരത്തിന് എയര്‍പമ്പ്, സര്‍ക്കുലേറ്റിംഗ് ഫാന്‍ എന്നിവ സജ്ജീകരിക്കുന്നതോടെയാണ് ജോസിന്റെ റഫ്രിജിറേറ്റര്‍ ഇന്‍ക്യൂബേറ്റര്‍ തയാറാകുന്നത്. ഒരു വോള്‍ട്ടിന്റെ മൂന്നു ബള്‍ബുകളാണ് ഈ ഇന്‍കുബേറ്ററിലുപയോഗിച്ചിരിക്കുന്നത്.

ആവശ്യത്തിനുള്ള ചൂട് റഫ്രിജറേറ്ററിലാകുമ്പോള്‍ ബള്‍ബുകള്‍ തനിയെ കെടും. 40 വോള്‍ട്ടിന്റെ ബള്‍ബാണ് ഉപയോഗിക്കുന്നതെങ്കില്‍ ഈ ഇന്‍ക്യൂബേറ്ററില്‍ ഒരു ബള്‍ബ് മതിയാകുമെന്ന് ജോസ് പറയുന്നു. തണുപ്പ് പിടിച്ചുനിര്‍ത്തുന്നതുപോലെ തന്നെ ചൂടും റഫ്രിജിറേറ്ററിനകത്ത് നിലനിര്‍ത്താന്‍ കഴിയുമെന്നതിനാല്‍ മറ്റ് ഇന്‍ക്യൂബേറ്ററുകളില്‍ ഉപയോഗിക്കുന്നത്ര വൈദ്യുതി ഇതിന് വേണ്െടന്നും ഇദ്ദേഹം പറയുന്നു. സംസ്ഥാനത്തിനകത്തുനിന്നും പുറത്തുനിന്നുമുള്ള ആളുകള്‍ ജോസിന്റെ ഈ റഫ്രിജിറേറ്റര്‍ ഇന്‍ക്യൂബേറ്ററെക്കുറിച്ചറിഞ്ഞ് വാങ്ങുന്നതിനായി പുലിക്കാട്ടില്‍ വീട്ടിലേക്കെത്തുന്നുണ്ട്. ഉപയോഗിച്ചു നോക്കി ഗുണമേന്മ ഉറപ്പുവരുത്തിയതിനുശേഷം മാത്രമാണ് ആവശ്യക്കാര്‍ ഇദ്ദേഹം റഫ്രിജിറേറ്റര്‍ ഇന്‍ക്യൂബേറ്റര്‍ വില്ക്കുന്നത്.